كاتژمێرە زیرەكەكان گۆڕانێكی نوێ بوو لە جیهانی كاتژمێردا كە مێژووی بەرهەمهێنانی یەكەم كاتژمێر بۆ هەزار ساڵ زیاتریش دەگەڕێتەوە. كاتژمێرە كلاسیكیەكان پێویستیان بە قورمیش كردن بوو، دواتر بە باتری كاریان دەكرد و لەم دواییەدا كاتژمێری زیرەك كە ئەركەكانی بەرفراوانترن لە كاتژمێرێكی ئاسایی بۆ كاركردن پێویستیان بە شەحنكردنەوەیە. كاتژمێری جۆری PowerWatch 2 بۆ كاركردن وزەی ناوێت و وزەكەی خۆی لە گەرمای دەستی بەكارهێنەرەكەی وەردەگرێت.
شاشەی كاتژمێرەكە 1.2 ئینجە و رەنگییە، وزەی خۆی لەگەرمی وەردەگرێت، جا چ گەرمی دەستی بەكارهێنەرەكەی بێت یان تینی خۆر. زۆربەی تایبەتمەندییەكانی كاتژمێرێكی هۆشمەندی تێدایە، وەك GPS و هەستەوەری تایبەت بە چالاكی بەكارهێنەرەكەی. بۆ كاتژمێرێك كە وزەكەی خۆی لە گەرمای خۆر و دەستی بەكارهێنەرەكەی وەربگرێ، نابێ چاوەڕوانییەكی زۆریشی لێكبرێت، هیچ پرۆگرامێك، جگە لە پرۆگرامەكانی خۆی وەرناگرێت، ناكرێت پەیوەندی پێوە بكرێت و كاركردەكانیشی سنووردارن، بەڵام لە قوڵایی دەریاشدا دەكرێت مەلەی پێبكرێت و كێشەی بۆ نایەتە پێش و بەردەوام لێدانی دڵی بەكارهێنەرەكەشی نیشان دەدات.