ئامێرە دیجیتالییەكانی تایبەت بە ئەمنییەت و چاودێری و هەروەها كامێرە چاودێرییەكان، رۆڵێكی گرنگ دەبینن لە پاراستنی ئەمنییەتدا، ئێستا كە لەماڵ نەبی بە ئاسوودەیی دەتوانی گەشت بكەی، چونكە كامێرە چاودێرییەكان لە هەر مەترسییەك و هەر كێشەیەكی ئەمنی ئاگادارت دەكەنەوە، منداڵ و گیانلەبەرانی ماڵەوەت بەهۆی ئەوانەوە پارێزراوترن، دەتوانی لە دوورەوە سەیری ماڵەوە بكەی و ئەگەر منداڵەكان شتێكیان بۆ هاتە پێش یان ماڵیان شێواند و هاروهاجیان كرد، ئاگاداریان بكەیەوە. كامێرای چاودێری كوندەپەپۆش یەكێكە لەوانە.
كامێرای كوندە پەپوو كە بە (Ulo) ناسراوە ستایلەكەی وەك كوندەپەپوویەك دەچێت، لەگەڵ هەردوو سیستەمی ئەندرۆید و ئای ئۆئێس دەگونجێت. كردارەكانی كوندەكە سەیرن بۆ نموونە كاتێك باترییەكەی كەم دەبێتەوە و شەحنی دادەبەزێت، هەست بەوە دەكەی ماندوویە و خەریكە بنووێت، كاتێك كە وێنە دەگرێت چاودادەگرێت، كاتێك كە لەسەر پەخشی راستەوخۆش بێت چاوەكانی كۆندەكە بەدوای مەبەستەكەدا دەسوڕێنەوە. هەر كردارێك لە ماڵەوە رووبدات لەخۆیدا تۆمار دەكات و بە ئیمێل بۆ بەكارهێنەرەكەی بەڕێ دەكات. هەر سێ رۆژ جارێك دەبێ شەحن بكرێتەوە، دەكرێت هەمیشەش لە كارەبادابێت، كوندەپەپۆپەكە زانیارییەكان كە تۆماری دەكات بە شێوەی راستەوخۆ بۆ ئیمێل یان مۆبایل بەڕێ دەكات.