دروستكردنی كڵاش، كاری بەدەست دروستكردنی پێلاوێكی تایبەتمەندە بەكورد كە بەكڵاش ناسراوە، دروستكردنی كڵاش دەگەڕێتەوە بۆ (500) ساڵ لەمەوبەر جگە لەپیاوان ئافرەتانیش بەشدارن لەدروستكردنی و زیاتر لەناوچەی سلێمانی و دەرووبەری دروست دەكرێ، بەتایبەت لەهەڵەبجە وەك مەڵبەندێكە بۆ دروستكردنی چەند جۆر كڵاشی نایاب، كڵاش لەكۆندا و لەئێستاشدا بەشێوەیەكی بەرفراوان بەكاردێت، لەشۆڕش و ڕاگواستن و كارە قورسەكان وەك كەرەستەیەكی بەهێزی خۆڕاگری تەندروست بەكاریان هێناوە، ئێستا بۆ جوانی و درەنگ تێكچوون و بەمەبەستی تەندروستی بەكاردێت، چونكە لەڕووی تەندروستیەوە هیچ زیانێك بەپشت و جومگەكان ناگەیەنێت و بەهیچ شێوەیەك بۆن پەیدا ناكات، ئەوەش ئەو تایبەتمەندییەیە كە كڵاش لەپێڵاوەكانیتر جیادەكاتەوە، ئەوەی شایەنی باسە ئەو ماددانەی كڵاشیان لێ دروست دەكرێت بریتین لە لۆكەو پەمۆ و پێستی چێڵ و لە40 كاتژمێردا كڵاش دروست دەكرێت، ئەو كاتەش بەپێی جۆری كڵاشەكە دەگۆڕێت و هەندێ جۆری كڵاشی نایاب زیاتر لەپێنج ڕۆژی دەوێت بۆ دروستكردنی.
ئا: رەوەند بەختیار