چەکدارانی رێکخراوی تیرۆریستی داعش 700 کەسی رفێندراو دەکوژن.

ئەمڕۆ چوارشەممە 19/12/2018، روانگەی سووری بۆ مافەکانی مرۆڤ لە بەیاننامەیەکدا رایگەیاندووە، داعش یەک هەزار و 350 کەسی مەدەنی و سەربازی رفاندووە و خزاندبوونییە ناو گرتووخانەکانی.

روانگەی سووری بۆ مافەکانی مرۆڤ ئاماژەی بەوەش داوە، لەو ژمارەیە، داعش 700 کەسی لە پارێزگای دێرەزوور لە رۆژهەڵاتی سووریا، کوشتووە.

کوشتنی ئەو رفێندراوانە هاوکاتە لەگەڵ هێرشی فراوانی هێزەکانی سووریای دیموکرات (هەسەدە) بۆ سەر بنکە و بارەگاکانی داعش لە ناوچە جیاوازەکانی پارێزگای دێرەزوور.

هەسەدە هێزێکی سەربازییە و بە پشتیوانیی ئەمریکا بۆ رزگارکردنەوەی ناوچە داگیرکراوەکانی رۆژئاوای کوردستان و سووریا لە رێکخراوی تیرۆریستی داعش، پێکهاتووە. یەکینەکانی پاراستنی گەل (یەپەگە)ی باڵی سەربازیی پارتی کرێکارانی کوردستان (پەکەکە) لە رۆژئاوی باڵی سەرەکیی ئەو هێزەیە.










باسنيوز