ڕێپۆرتێرانی بێ‌سنوور: ئەمساڵ 80 میدیاکار لە جیهان کوژراون
ڕادیۆ ئەڵمانیا بە پشتبەستن بە زانیاریی ڕێکخراوی هەواڵنێرانی بێ‌سنوور، بڵاوی کردووەتەوە، لە ساڵی 2018ی زاییندا زیاتر لە 80 هەواڵنێر و میدیاکار لە کاتی چالاکیی میدیاییدا لە شوێنی جیاجیای جیهان گیانیان لەدەست داوە.
بەپێی هەمان سەرچاوە، نیوەی ئەو میدیاکارانە بەهۆی شەڕ و ئاڵۆزیی لە وڵاتانی ئەفغانستان، سووریا، مەکزیک، یەمەن و هیندستان گیانیان لەدەست داوە.
ڕێکخراوی هەواڵنێرانی بێ‌سنوور لە بەرانبەر ئەو ئامارانەدا نیگەرانیی دەربڕیوە کە ئەمنیەت و ئاسایشی گیانیی میدیاکاران و ڕێپۆرتێران لە کاتی ڕووماڵی رووداوەن و بەتایبەت لەو ناوچانەی شەڕ و توندوتیژییان تیدایە، لە مەترسیدایە و دەبێ زیاتر گرنگییان پێ بدرێت.
لە درێژەی ئەو ڕاپۆرتدا ئەماژە بە ڕەوشی دەستگیر و زیندانیکردنی ڕۆژنامەنووس و هەواڵنێران لە وڵاتانی "میسر، تورکیا، چین و سعوودیە" کراوە و باس لەوەش کراوە کە ئازادی ڕادەربڕین و نووسین و ڕۆژنامەنووسیی بێلایەن لە زۆرێک لە وڵاتان لەگەڵ بەربەستی جیدی بەرەوڕوویە.
باسنيوز
