وەزارەتی دەرەوەی تورکیا هۆشداریی دەداتە هاووڵاتییانی وڵاتەکەی لە گەشتکردن بۆ ئەمریکا، بەهۆی توندوتیژییەکان بەهۆی سەرکەوتنی کاندیدی کۆمارییەکان.

لە بەیاننامەیەکدا، کە رۆژی یەکشەممە 13ـی تشرینی دووەمی 2016 میدیا تورکییەکان بڵاویان کردووەتەوە، وەزارەتی دەرەوەی تورکیا رایدەگەیەنێت، کە بەهۆی گردبوونەوە و خۆپیشاندانی ناڕازییەکان بە سەرکەوتنی دۆناڵد ترەمپ، کاندیدی کۆمارییەکان لە هەڵبژاردنی سەرۆکایەتیی ئەمریکا، ”مەترسی و دڵەڕاوکییە کۆمەڵایەتییەکان“ لە ئەمریکا روو لە زیاد بوونن.

وەزارەتی دەرەوەی تورکیا لە بەیاننامەکەیدا، کە پەیامی هۆشدارییە و ئاراستەی هاووڵاتییانی تورکیای دانیشتوو لە ئەمریکا و گەشتیارانی تورکیای کردووە، داوا لە هاووڵاتییانی دەکات ئاگاداری خۆیان بن.

ئەو هۆشدارییەی وەزارەتی دەرەوەی تورکیا دوای چەند هۆشدارییەکی باڵیۆزخانە و کونسوڵخانەکانی ئەمریکا لە تورکیا دێت، کە داوایان لە هاووڵاتییانی ئەمریکی لە تورکیا کردبوو ئاگاداری خۆیان بن و نەچنە شوێنە گەشتیارییەکان.

رۆژی سێشەممە 8ـی تشرینی دووەمی 2016، هەڵبژاردنی سەرۆکایەتیی ئەمریکا بەڕێوە چوو، کە تێیدا هیلاری کلینتۆن، کاندیدی دیموکراتەکان و دۆناڵد ترەمپ، کاندیدی کۆمارییەکان رکابەریی یەکتریان دەکرد و رۆژی چوارشەممە 9ـی تشرینی دووەمیش لە ئەنجامە بەراییەکاندا دەرکەوت، دۆناڵد ترەمپ بووە سەرۆکی ژمارە 45ـی ئەمریکا.

لە چەند رۆی رابردوودا و بەهۆی سەرکەوتنی دۆناڵد ترەمپەوە، لە شار و ناوچە جیاوازەکانی ئەمریاەوە، لایەنگرانی دیموکراتەکان بۆ سەرۆکایەتیی ئەمریکا دژی سەرکەوتنی ترەمپ، خۆپیشاندانیان ئەنجام دەدەن و لە بەشێک لە خۆپیشاندانەکانیش، توندوتژی کەوتووەتەوە.













باسنيوز