بەرپرسی دەزگای هەواڵگری CIA ئەمەریكا پێی وایە ئەستەمە جارێكی دیكە سووریا و عێڕاق وەكوو خۆیان لێ بێتەوە، بەڵكوو بەرەو دابەشبوون دەڕۆن و هەرگیز بڕیار لەلای حكوومەتی مەركەزی ئەو 2 وڵاتە نابێت.

جۆن برێنان، بەرپرسی دەزگای هەواڵگریی ئەمەریكا لە دیمانەیەكیدا ئاماژە دەدات كە بە گومانە لەوەی سووریا و عێڕاق وەكوو جارانی لێ بێتەوە و خاكەكەیان بە یەكگرتوویی بمێنێتەوە، هەروەها دەڵێت ئەستەمە حكوومەتی مەركەزی بتوانێت رێبەرایەتیی هەموو وڵات بكات.

لە دیمانەكەدا كە بۆ كەناڵی CTC Sentinel ئەنجامی داوە دەڵێت: "من نازانم كە ئایا لە داهاتوودا سووریا و عێڕاق دەتوانن یەكپارچەیی خاكەكەی خۆیان بپارێزن؟ بە بۆچوونی من ئەوە زۆر ئەستەمە. لەو 2 وڵاتە شەڕی مەزهەبی زۆر هەیە، بۆیە وای بۆ دەچم لە داهاتوو چەند ناوچەیەكی فیدرالی دروست ببێت و جیا ببنەوە".

باسی لەوەش كرد گرووپی تیرۆریستیی داعش توانیویەتی لە یەمەن بە هاوكاریی رێكخراوی ئەلقاعیدە خۆی دروست بكات و ژێر بە ژێر كاری هاوبەش دەكەن.





باسنيوز