عادل جوبه‌یر وه‌زیری ده‌ره‌وه‌ی سعودییه‌ له‌ نیویۆرك به‌ رۆژنامه‌نووسانی راگه‌یاند وا باشتره‌ ئێران ئه‌و رووداوه‌ دڵته‌زێنه‌ی كه‌ له‌ سعودییه‌ روویدا له‌ رووی سیاسییه‌وه‌ نه‌یقۆزنه‌وه‌ ، كه‌ خه‌ڵكێك گرنگترین ئه‌ركی ئاینییان به‌ جێ ده‌گه‌یاند ئه‌ویش ئه‌ركه‌كانی حه‌ج كردن بوو ، جوبه‌یر روونیكرده‌وه‌ ، ئێمه‌ هیچ شتێك ناشارینه‌وه‌ و ئه‌وانه‌ی هه‌ڵه‌یان كردووه‌ و كه‌مته‌رخه‌م بوونه‌ له‌و رووداوه‌ تونترین سزا ده‌درێن .

گوتیشی : دووباره‌ی ده‌كه‌مه‌وه‌ كه‌ كاتی ئه‌وه‌ نییه‌ ئه‌م روداوه‌ به‌سیاسی بكرێت و بقۆزرێته‌وه‌ .

راشیگه‌یاند سه‌ركرده‌كانی ئێران پێویسته‌ به‌ عه‌قل و لۆژیك سه‌یری ئه‌و رووداوه‌ بكه‌ن و چاوه‌ڕوانی ئه‌نجامه‌كانی لێكۆڵینه‌وه‌ بن .

شایانی باسه‌ رۆژی پێنجشه‌ممه‌ له‌ یه‌كه‌م رۆژی جه‌ژنی قورباندا له‌ مینا نزیك شاری مه‌ككه‌ رووداوی پاڵپێوه‌نان روویداو به‌هۆیه‌وه‌ 769 كه‌س گیانیان له‌ ده‌ستدا له‌ نێوانیاندا 130 ئێرانی تێدابوو .