له‌ هێرشێكی هێزه‌ ئازه‌رییه‌كانی له‌ هه‌رێمی ناگۆرنى كاره‌باخ چوار سه‌ربازی ئه‌رمه‌نى كوژران. له‌و باره‌وه‌ وه‌زاره‌تى به‌رگری هه‌رێمی ناگۆرنى كاره‌باخ له‌ به‌یاننامه‌یه‌كدا روونى كرده‌وه‌ كه‌ هێزه‌كانی ئازه‌ربایجان چه‌ند ناوچه‌یه‌كى هێزه‌كانی ئه‌و هه‌رێمه‌یان بۆردومان كردو ته‌قه‌یان له‌ سه‌ربازه‌كانیش كردو له‌ ئاكامدا چوار سه‌رباز كوژران و ژماره‌یه‌كی دیكه‌یش برینداربوون.

ئه‌مه‌یش ئه‌و كۆششه‌ نێوده‌وڵتییانه‌ى شكست پێ هێنا كه‌ بۆ كۆتایی پێ هێنانی ناكۆكى ئه‌رمینیا و ئازه‌ربایجان له‌سه‌ر هه‌رێمی ناگۆرنى كاره‌باخ ده‌دران. هاوكات ئه‌رمینیا رایگه‌یاند كه‌ شه‌وى رابوردووتر هێزه‌كانی ئازه‌ربایجان هێرشیان كردبووه‌ سه‌ر چه‌ند گوندێكی سه‌ر سنووری ئه‌و وڵاته‌و له‌ ئاكامدا سێ كه‌سی سیڤیل كوژران و دووى دیكه‌یش برینداربوون.

جێى ئاماژه‌یه‌ ناگۆرنى كاره‌باخ هه‌رێمێكه‌ له‌سه‌ره‌تای شه‌ڕى نێوان ئه‌رمینیا و ئازه‌ربایجانه‌وه‌ به‌ یارمه‌تی سه‌ربازی و دارایی ئه‌رمینیا خۆى به‌ڕێوه‌ ده‌بات و هێزه‌كانی به‌ یارمه‌تی ئه‌رمینیا حه‌وت ناوچه‌ی ئازه‌رییان كۆنترۆڵ كردووه‌ له‌وانه‌ى له‌ چوارده‌ورى هه‌رێمه‌كه‌ن.

لاى خۆیه‌وه‌ ئازه‌ربایجانیش هه‌ڕه‌شه‌ ده‌كات ئه‌و هه‌رێمه‌ به‌ زه‌برى هێز كۆنترۆڵ بكاته‌وه‌و ئه‌رمینیاش هه‌ڕه‌شه‌ى ئه‌وه‌ ده‌كات كه‌ به‌رانبه‌ر به‌ هه‌ر هێرشێكی ئازه‌ربایجان بۆ سه‌ر هه‌رێمه‌كه‌ ده‌سته‌وسان راناوه‌ستێت.