ده‌سه‌لاتدارانی توركیا بیست و یه‌ك كه‌سیان به‌ گومانی تێوه‌گلانیان و چوونه‌ ناو رێكخراوی تیرۆریستی داعش ده‌ستگیركرد . ده‌ستگیركردنی ئه‌م گومانلێكراوانه‌ له‌ شاری ئه‌سته‌نبول و شاری كوچیلی و هه‌ندێ ناوچه‌ی دیكه‌ى نزیك سنووری سوریا بوو .

به‌پێی هه‌واڵێكی ئاژانسی ئه‌نادۆڵ سێ له‌و ده‌ستگیركراوانه‌ بیانیین و ده‌سه‌لاتدارانی توركیا پێشبینیان كردووه‌ كه‌ ئه‌م كه‌سانه‌ پلانیان دانابوو بۆ چوونه‌ ناو سوریا و په‌یوه‌ندی كردن به‌ داعشه‌وه‌ . هاوكات به‌پێی سه‌رچاوه‌كان، چه‌ندین چه‌ك و ته‌قه‌مه‌نی و به‌ڵگه‌نامه‌ی گرنگی رێكخراوی تیرۆریستی داعش كه‌وته‌ به‌ر ده‌ستی پۆلیس .

شایانی باسه‌ زۆر له‌ وڵاتانی رۆژئاوا توركیا تۆمه‌تبار ده‌كه‌ن به‌وه‌ی رێگه‌ له‌ تیرۆریستان ناگرێت له‌ رێگه‌ی سنووری توركیاوه‌ بچنه‌ ناو سوریا . توركیاش به‌رده‌وام ئه‌و تۆمه‌تانه‌ ره‌تده‌كاته‌وه‌ .