په‌نتاگۆن ڕایگه‌یاند: “به‌له‌مه‌ سه‌ربازییه‌كانی سه‌ر به‌هێزه‌ ده‌ریاییه‌كانی ئێران كه‌شتییه‌كی ئه‌مریكییان ده‌ست به‌سه‌ر كردووه‌. له‌كاتێكدا كه‌شتییه‌كه‌ ئاڵای دوورگه‌كانی مارشاڵی هه‌ڵكردبوو”. كه‌ناڵی “سی.ئێن.ئێن له‌ به‌رپرسانی ئێرانیی گواسته‌وه‌ كه‌ “ئه‌گه‌رچی كه‌شتییه‌كه‌ ئاڵای دوورگه‌كانی مارشاڵی هه‌ڵكردبوو. به‌ڵام له‌پاش به‌دواداچوون بۆ ئه‌و كه‌یسه‌ ده‌ركه‌وت، كه‌شتییه‌كه‌ بازرگانییه‌و، ناكۆكی و كێشه‌ی دارایی هه‌یه‌ له‌گه‌ڵ فه‌رمانگه‌ی به‌نده‌ره‌كانی ئێراندا”.

ئاژانسه‌كه‌ له‌ سه‌رچاوه‌یه‌كی ئاگاداری گواسته‌وه‌: “فه‌رمانگه‌ی به‌نده‌ره‌كانی ئێران، په‌نای بردۆته‌ به‌ر دادگاكان بۆ چاره‌سه‌ركردنی كێشه‌ داراییه‌كانی له‌گه‌ڵ ئه‌و كه‌شتییه‌دا، دادگاش فه‌رمانی ڕاگرتنی كه‌شتییه‌كه‌ی ده‌ركردووه‌. بۆیه‌ ده‌ست به‌جێ ئه‌و فه‌رمانه‌ی دادگا جێبه‌جێ كرا”. گوتیشی: “كه‌شتییه‌كه‌ به‌نیازبوو له‌ ته‌نگه‌ی هورمز تێپه‌ڕ ببێت. به‌رله‌وه‌ی ده‌ست به‌سه‌ر بكرێت به‌هه‌موو سه‌رنشینه‌كانییه‌وه‌ كه‌ هه‌موویان ئه‌ورووپین. ڕه‌نگه‌ هاووڵاتی ئه‌مریكیشیان له‌نێودابێت”. به‌رپرسه‌كانی ئه‌مریكا جه‌ختیان له‌وه‌ كرده‌وه‌: “هێزه‌ ده‌ریاییه‌كانی سوپای پاسداران په‌یوه‌ندییان به‌كه‌شتییه‌كه‌وه كردووه‌، داوایان لێكردووه‌ ڕووگه‌ی خۆی بگۆڕێت.

كاتێ كه‌شتییه‌كه‌ گوێ به‌و ئاگاداركردنه‌وانه‌ نادات، به‌له‌مێكی ئێران فیشه‌كێك بۆ وریاكردنه‌وه‌یان ده‌ته‌قێنێت. له‌پاش ئه‌وه‌، كه‌شتییه‌كه‌ ملكه‌چی فه‌رمانی ئێرانییه‌كان ده‌بێت و، ڕووگه‌ی خۆی ده‌گۆڕێت”. وته‌بێژی فه‌رمی په‌نتاگۆنیش له‌ لێدوانێكی سه‌رپێیدا سه‌باره‌ت به‌ ڕووداوه‌كه‌ گوتی: “ته‌قه‌كردنی تاران له‌و كه‌شتییه‌ گونجاو نییه‌، به‌تایبه‌تی چونكه‌ 30 سه‌رنشینی له‌سه‌ره‌”. هه‌روه‌ها گوتی: “هێزی ده‌ریاوانی ئه‌مریكا، ده‌ست به‌جێ كه‌شتی جه‌نگی و فڕۆكه‌ی بۆ كۆكردنه‌وه‌ی زانیار و چاودێری نارده‌ شوێنی ڕووداوه‌كه‌”.