سەلمان بن عەبدولعەزیز، پادشای سعودیە، سەرلەبەیانی رۆژی چوارشەممە ٢٩ی نیسان بەگوێرەی فەرمانێکی شاهانە، چەند پۆستێکی لە ئیدارەکەیدا گۆڕی. لەنێو ئەو فەرمانانەشدا مقرن بن عەبدولعەزیز وەک جێنشینی سعودیە لەسەر کارەکەی لادرا و لەجێی ئەو محەممەد بن نایف کرا بە جێنشینی و لە هەمان کاتیشدا وەک وەزیری ناوخۆی سعودیە مایەوە.

هەر لە چوارچێوەی ئەو بڕیارانەدا، شا سەلمان کوڕەکەی خۆی (محەممەد بن سەلمان)ی کردە یاریدەدەری جێنشینی شانشینی سعودیە.

چاوەڕێدەکرێت ئێوارەی ئەمڕۆ چوارشەممە جێنشینی نوێ و یاریدەدەرەکەی لە کۆشکی شاهانەی سعودیە سوێند بخۆن.

هەروەها سعود فەیسەڵ کرا بە راوێژکاری کاروباری دەرەوەی شانشینی سعودیە و لە پۆستی وەزیری دەرەوە لادرا، لەجێی ئەویش عادل جوبەیر باڵیۆزی سعودیە لە ئەمریکا، کە ماوەیەکە زۆرترین لێدوان دەدات لەنێو سەرکردەکانی سعودیەدا و یەکەمین کەس بوو دەستپێکردنی هێرشی ئاسمانیی سعودیە و هاوپەیمانانی بۆسەر حوسییەکان راگەیاند، پۆستی وەزیری دەرەوەی پێدرا.

شا سەلمان چەند گۆڕانکارییەکی دیکەی لە وەزارەتەکانی دیکەشدا کرد، وەک پۆستی وەزیری تەندروستی و چەند پۆستێکی دیکەش لە وەزارەتەکانی ئابووری و پلاندانان.

سەبارەت بە پۆستە سەربازییەکانی وەزارەتی بەرگریش، شا سەلمان چەند گۆڕانکارییەکی دیکەی کردووە کە تا ئێستا درێژەی ئەو گۆڕانکارییانە نەزانراون.





















روداو