وەزیری بەرگریی حكومەتی كەنەدا رایگەیاند، وڵاتەكەی بەنیازە بە بەهای یەك ملیۆن دۆلار هاوكاریی مرۆیی پێشكەش بە عێراق بكات، بە ئامانجی هاوكاریكردنی ئەو هاووڵاتیانەی بەهۆی شەڕو پێكدادانەكانی نێوان چەكدارانی داعش و هێزە ئەمنییەكان زیانیان بەركەوتووە.

جیسۆن كینی، وەزیری بەرگریی حكومەتی كەنەدا لە بەیاننامەیەكدا رایگەیاند: "بڕێك كۆمەكی مرۆییمان بۆ هاوكاریكردنی ئاوارە عێراقییەكان كۆكردووەتەوە، هاوكات دەزگای (GlobalMedic) بۆ یارمەتییە مرۆییەكان كە بارەگاكەی لە شاری تورینتۆیە، لەم هەڵمەتەدا هاوكارە".

كینی گوتیشی: "وەزارەتی گەشەپێدانی نێودەوڵەتی كەنەدا سەرپەرشتی گەیاندن و دابەشكردنی هاوكارییەكان دەكات بۆ ئاوارەكانی عێراق، كە ئامێری پاككردنەوەی ئاو، پێداویستی پاككردنەوەو پێداویستی تایبەت بە منداڵانی تازە لە دایكبوو لەخۆدەگرێت".

سەرەڕای پێشكەشكردنی هاوكاری مرۆیی، حكومەتی كەنەدا لە رووی مەشق و راهێنانی سەربازیشەوە هاوكاریی حكومەتی عێراق دەكات و یەكێكیشە لەو وڵاتانەی لەگەڵ هاوپەیمانی نێودەوڵەتی كە ویلایەتە یەكگرتووەكانی ئەمریكا سەركردایەتی دەكات، بنكەو بارەگاكانی چەكدارانی داعش لە عێراق بۆردوومان دەكات.









رووداو