له‌ یه‌مه‌ن شه‌ڕوپێكدادان و بۆردومان له‌ شارى عه‌ده‌ن و ناوچه‌كانى دیكه‌ به‌رده‌وامه‌ و به‌ پێى سه‌رچاوه‌كان، شه‌ڕه‌كه‌ بووه‌ته‌ شه‌ڕى شه‌قام و كۆڵان به‌ كۆڵان له‌ ناوه‌ڕاستى شارى عه‌ده‌ن كه‌ ده‌كه‌وێته‌ باشوورى رۆژئاواى ئه‌و وڵاته‌وه‌. شاهید حاڵه‌كان له‌ نزیك شه‌ڕه‌كان به‌ ئاژانسى ده‌نگوباسى رۆیته‌رزیان راگه‌یاندووه‌، به‌ هۆى شه‌ڕه‌وه‌ ژماره‌یه‌ك ماڵى هاوڵاتیان له‌ له‌ ناوه‌ڕاستى شارى عه‌ده‌ن سوتێنراون و چه‌كدارانى حوسیش له‌ پێشڕه‌وییه‌كانیان له‌ ناو شاره‌كه‌ به‌رده‌وامن.

هاوكات له‌و فڕۆكه‌كانی جه‌نگی هاوپه‌یمان به‌ ڕابه‌رایه‌تی سعوودیه‌ چوار هێرشی دیكه‌یان دژى چه‌كدارانى حوسى له‌ یه‌مه‌ن ئه‌نجام داوه‌ و له‌ هێرش و بۆردومانه‌كانى ئه‌مڕۆشدا، فرۆكه‌كانى هاوپه‌یمانى عه‌ره‌بى به‌ چڕى چه‌كدارانى حوسییان بۆردومان كردووه‌ ، به‌ڵام هێشتا زیانه‌كان نه‌زانراوه‌. لایه‌كى دیكه‌وه‌ یه‌كه‌م بارهه‌ڵگرى هاوكارى پزیشكى خێرا گه‌یه‌ندراییه‌ شارى عه‌ده‌ن، ئه‌مه‌ش دواى ئه‌وه‌ى رێكخراوه‌ نێوده‌وڵه‌تییه‌كان هۆشدارى ئه‌وه‌یاندا، كه‌ ژیان و گوزه‌رانى دانیشتوانى شاره‌كه‌ رووبه‌ڕووى كاره‌ساتى مرۆیى بووه‌ته‌وه‌.