عه‌بدولفه‌تاح سیسی: بكوژانی قبتییه‌كان به سزای خۆیان ده‌گه‌یه‌نین
له وتارێكی ته‌له‌ڤزیۆنیدا سیسی رایگه‌یاند كه بانگهێشتی ئه‌نجومه‌نی به‌رگری نیشتیمانیم كردووه كه ده‌ستبه‌جێ به شێوه‌یه‌كی به‌رده‌وام چاوه‌دێری پێشهاته‌كان بكات و بڕیاری پێویست و رێوشوێنی به په‌له وه‌ربگرێت .
گوتیشی له‌و ساته‌وه هه‌موومان هه‌ست به ناره‌حه‌تی و خه‌م و توره‌یی ده‌كه‌ین و ئه‌و تیرۆره‌ی كه به‌رۆكی هاووڵاتیانی میسری گرتووه ، هه‌مان ئه‌و تیرۆره‌یه كه ته‌واوی جیهانی گرتۆته‌وه .
روونیشیكرده‌وه كه میسر و ته‌واوی وڵاتانی جیهان له شه‌رێكی به‌رده‌وامی رێكخراوه تیرۆریستییه‌كانن و ئێستاش كاتی ئه‌وه‌یه به‌بێ دووفاقی مامه‌ڵه‌ی له گه‌ڵ بكه‌ین و میسریش شكستی به تیرۆریستان هێناوه و توانای ئه‌وه‌شی هه‌یه له‌ناوی ببات و به‌مه‌ش به‌رگری له مرۆڤایه‌تی ده‌كات .
سیسی داوای كرد كه گه‌شتكردنی هاوولاتیانی میسر بۆ لیبیا قه‌ده‌غه بكرێت و ئه‌وانه‌ی له‌و وڵاته‌شن بگه‌رێنه‌وه میسر، داوای له وه‌زیری ده‌ره‌وه‌ی وڵاته‌كه‌ی كرد كه بچێته نیویۆرك و په‌یوه‌ندی به ته‌واوی سه‌ركرده‌كانی وڵاتان بكات و رابگه‌یه‌نێت كه ئه‌وه‌ی له لیبیا رووده‌دات كاریگه‌ری له سه‌ر ئاسایشی نێو ده‌وڵه‌تی ده‌بێت .
