ئه‌نجوومه‌نی ئاسایش داوا له حوسییه‌كانی یه‌مه‌ن ده‌كات داموده‌زگاكانی حكوومه‌ت چۆڵ بكه‌ن
له كۆبوونه‌وه‌كه‌دا ئه‌و پڕۆژه یاسایه‌ی كه له لایه‌ن به‌ریتانیا و ئوردنه‌وه ئاماده كرابوو گفتوگۆی له‌سه‌ر كرا و دواتر به كۆی ده‌نگ په‌سه‌ند كرا. له پڕۆژه یاساكه‌دا داوا له چه‌كداره حوسییه‌كان ده‌كرێت به‌بێ مه‌رج هێزه‌كانیان له نێو ئه‌و داموده‌زگایانه‌ی حكوومه‌ت كه داگیریان كردووه بكێشنه‌وه و ئه‌و سه‌ركردانه‌ش كه به‌ند كراون ئازاد بكرێن.
له به‌شێكی دیكه‌ی پڕۆژه یاساكه‌دا داوا له چه‌كداره حوسییه‌كان كراوه خۆیان له هه‌ر جۆره هه‌نگاوێكی یه‌ك لایه‌نه به‌دوور بگرن و به‌شداری له هه‌وڵه‌كانی نه‌ته‌وه یه‌كگرتووه‌كان بۆ دۆزینه‌وه‌ی چاره‌سه‌رێكی سیاسی بكه‌ن و ره‌وشی ئه‌منی یه‌مه‌ن ئاسایی بكه‌نه‌وه. هه‌ر له‌و پڕۆژه یاسایه‌دا داوا له باڵی دوورگه‌ی عه‌ره‌بی قاعیده كراوه كه واز له توندوتیژی بهێنێت و بۆ به‌رقه‌رار كردنی ئاشتی هه‌وڵ بدات.
