ژماره‌یه‌ك له‌ ئه‌ندامانی كۆنگرێس رایانگه‌یاند بڕیاره‌ سبه‌ی كۆشكی سپی داوا له‌ كۆنگرێس بكات رێگای پێ بدات سه‌رله‌نوێ هێز دژی چه‌كدارانی تیرۆریستی داعش به‌كار بهێنێت ، ئه‌م پێشنیاره‌ی ئیداره‌ی ئه‌مه‌ریكا یه‌كه‌م جاره‌ به‌ فه‌رمی داوا ده‌كرێت هێزی سه‌ربازی دژ به‌ تیرۆریستانی داعش به‌ كار بهێنرێت . ئیداره‌ی ئه‌مه‌ریكا له‌لایه‌ن خۆیه‌وه‌ ده‌لێت كه‌ ئه‌م هه‌ڵمه‌ته‌ یاساییه‌ پشت به‌ په‌سه‌ندكردنی بڕیارێكی سه‌رده‌می جۆرج بۆشی كوڕ ده‌به‌ستێت كه‌ ساڵی دووهه‌زارو دوو دژ به‌ عێراق و ساڵی دووهه‌زارو یه‌كیش دژ به‌ رێكخراوی تیرۆریستی قاعیده‌و گروپه‌ توندره‌وه‌كان ده‌ریكرد .

بۆب كۆركه‌ر سیناتۆری ئه‌مه‌ریكی و سه‌رۆكی لێژنه‌ی په‌یوه‌ندییه‌كانی ده‌ره‌وه‌ له‌ ئه‌نجومه‌نی پیران له‌لایه‌ن خۆیه‌وه‌ رایگه‌یاند كه‌ دانیشتنه‌كان سه‌باره‌ت به‌ داواكاری ئیداره‌ی ئه‌مه‌ریكا له‌منزیكانه‌ ده‌ستپێده‌كات . ئیداره‌ی ئۆباما به‌ر له‌ پێشكه‌ش كردنی داوا فه‌رمییه‌كه‌ له‌ گه‌ڵ ژماره‌یه‌ك یاساناس و ئه‌ندامانی كۆنگرێس دانیشتوون و ئه‌مه‌ش وا ده‌كات كه‌ ره‌زامه‌ندی له‌ سه‌ر داواكه‌یان مسۆگه‌ر بكات . شایانی باسه‌ ئه‌مه‌ریكا و وڵاتانی هاوپه‌یمان له‌ مانگی ئابی رابردووه‌وه‌ هه‌ڵمه‌تێكی ئاسمانی دژ به‌ چه‌كدارانی تیرۆریستی داعش ده‌ستپێكردووه‌ .