گه‌وره‌ به‌رپرسێكى سه‌ربازى به‌ریتانیا بۆ یه‌كێك له‌ میدیاكانى ناوخۆى وڵاته‌كه‌ى ئاشكراى كرد، كه‌ ئه‌و وڵاته‌ بڕیاریداوه‌ دوو هه‌زار راوێژكاری سه‌ربازی ره‌وانه‌ى ئوردن بكات و هاوكات فڕۆكه‌ی چاودێریكردنیش وه‌ك پلانێك بۆ خۆئاماده‌كردن له‌ شه‌ڕى دژ به‌ رێكخراوی ده‌وڵه‌تی ئیسلامی ناسراو به‌ داعش، ره‌وانه‌ى ئوردن ده‌كات.

گه‌وره‌ به‌رپرسه‌كه‌ روونیكرده‌وه‌، بۆ ئه‌وه‌ى په‌یوه‌ندى به‌ هێزه‌كانی هاوپه‌یمانی نێوده‌وڵه‌تی له‌ ئوردن، وه‌ك هه‌ماهه‌نگییه‌ك بۆ پاڵپشتیكردنی هێزه‌كانی پێشمه‌رگه‌و هێزه‌ عێراقییه‌كان، دوو هه‌زار راوێژكاری سه‌ربازى بریتانیا ره‌وانه‌ى ئوردن ده‌كرێن.

بڕیاری چڕكردنه‌وه‌ی به‌شدارییه‌كانی به‌ریتانیا له‌پاڵ ئه‌و بڕیاره‌ی وڵاتی ئوردن دێت بۆ فراوانكردنی گورزه‌ ئاسمانییه‌كانیان دژ به‌ بنكه‌و باره‌گاكانی داعش له‌ سووریاو عێراق.به‌كارهێنانی فڕۆكه‌ سیخوڕییه‌كانیش بۆ ئه‌وه‌یه‌ ئامانجه‌كان بۆ هێزه‌ هاوپه‌یمانه‌كان دیاری بكه‌ن و پێشده‌چێت ناردنی ئه‌و فڕۆكه‌ بێ فڕۆكه‌وانانه‌ له‌ مانگی نیسانی داهاتوو بگات.