لەگەڵ دەستپێکردنی ھەڵمەتی بانگەشەی ھەڵبژاردنی سەرۆکایەتی لە سوریا , ئەمڕۆ لەشاری قامشلو کە لەژێر دەسەڵاتی ھێزەکانی (پەیەدە)یە رێپێوانێکی جەماوەری گەورە بۆ پشتگیریکردن لە سەرۆکی سوریا بەشار ئەسەد سازکرا , کە تێیدا ئاڵای حزبی بەعس و وێنەی بەشار ئەسەد بەرزکرابووە و بەشداربووان پشتگیر خۆیان بۆ بەشار ئەسەد دووپات دەکردەوە ..


لەو رێپێوانەی شاری قامشلۆ چەندین سەرۆک ھۆزی عەرەبی بەشدار بوون کە لەناوچەکانی دیکە ھاتبوون , ھەروەھا چەندین سەرکردەی سەربازی رژێمی سوریا و پارێزگاری حەسەکە و پیاوانی ئاینی ئیسلامی و مەسیحی و دورزەکان تێیدا بەشداربوون ...
رێپێوانەکەی لەلایەن لێژنەکانی بەرگری و دژە تیرۆر و ھێزەکانی حزبی بەعسی سوریا پارێزگاری لێ دەکرا ...

بەپێی ووتەی شایەتحاڵەکان, لەنزیک رێپێوانەکەی دوو ھەلیکۆپتەری سوپای سوریا نیشتووتەوە کە چەندین بەرپرسی گەورەی حکومەتی سوری و گەورە بەرپرسانی سەربازی و گەورە پیاوانی ھۆزە عەرەبییەکان تێدابوو کەلەدەرەوە ناوچەکانی پارێزگای حەسەکە ھاتبوون بۆ بەشداریکردن لەو رێپێوانە .

ھۆکاری ھاتنی ئەو کەسانەش بەفرۆکە بەھۆی ئەوەبووە کە رێگەی ووشکانی نییە لەنێوان شارەکان بۆیە رێگەی ئاسمانی بەکاردێت بۆ گواستنەوە ..

ھەروەھا شایەتحاڵەکان دەڵێن دەنگۆیەک لەناو شاری قامشلۆ بڵاوبووتەوە , گوایە بەشار ئەسەد بەنیازە سەردانی شارەکە بکات و لەوانەشە ئەم کارە لەم رۆژانەی داھاتوو بێت و پێش ئەنجامدانی ھەڵبژاردنەکانی سەرۆکایەتی لەسوریا ..