لێكۆڵینەوە لەگەڵ ئەو سەربازە بەریتانیانە دەكرێت كە لە عێراق تاوانیان ئەنجامداوە
فاتۆ بەنسودا گوتیشی: "دوای پێشكەشكردنی چەند سكاڵایەكی نوێ سەبارەت بە خراپ مامەڵەكردنی سەربازانی بەریتانی لەگەڵ بەندكراوانی عێراق لە نێوان ساڵانی 2003 ـ 2008 دادگای تاوانەكانی نێودەوڵەتی بڕیاریدا دووبارە لێكۆڵینەوە لەو كەیسە دەستپێبكاتەوە".
لای خۆیەوە حكومەتی بەریتانیا رەتیكردەوە هێزە سەربازییەكانی لە جەنگی عێراق ـ ئەمریكا لە ساڵی 2003 پێشێلكارییان ئەنجامدابێت، دووپایشیكردەوە "لەپێناو دەركەوتنی راستییەكان، هاوكاری تەواوی دادگای تاوانەكانی نێودەوڵەتی دەكات".
سەبارەت بە دووبارە دەستپێكردنەوەی لێكۆڵینەوەكان لەلایەن دادگای تاوانەكانی نێودەوڵەتی (ICC) ی تایبەت بە ئەنجامدانی تاوانی خراپ مامەڵەكردنی سەربازانی بەریتانی لەهەمبەر بەندكراوانی عێراق، دۆمینیك گریف، داواكاری گشتی بەریتانی لە بەیاننامەیەكدا گوتی: "حكومەتی بەریتانیا تەواوی ئەو دەنگۆیانە رەتدەكاتەوە كە سەربازانی بەریتانیا لە جەنگی عێراق ـ ئەمریكا لە ساڵی 2003 مامەڵەی خراپیان لەگەڵ بەندكراوانی عێراقی كردبێت".
ژمارەیەك پۆلیس و لیكۆڵەرەوەی خانەنیشین لە بەریتانیا دەزگایەكی سەربەخۆیان دامەزراندووە كە تایبەتە بە لێكۆڵینەوەی پێشێلكارییەكانی سوپای بەریتانیا دژی هاووڵاتیانی سڤیل لە عێراق، لە نێوان ساڵانی 2003 ـ 2009 تیمەكەش بەناوی تیمی سكاڵا مێژووییەكانی عێراقە(IHAT)و ژمارەیان 145 كەسەو لێكۆلەرەوەی مەدەنی خانەنیشینكراو (مارك واوك) سەرۆكایەتییان دەكات.
رووداو
