ئه‌بو حه‌مزه‌ی میسری یان مسته‌فا كامل مسته‌فا مه‌ولود، ئه‌و توندڕه‌وه‌یه‌ كه‌ سه‌ره‌تا پاسه‌وانی یانه‌ شه‌وانه‌كانی به‌ریتانیا بووه‌ و دوای په‌یوه‌ندیكردنی به‌ گروپه‌ جیهادییه‌كان و ده‌ستگیركردنی، بڕیاره‌ له‌ دووشه‌ممه‌ی داهاتوو له‌ نیویۆرك دادگایی بكرێت.

ئه‌بو حه‌مزه‌ی ته‌مه‌ن 55 ساڵ، له‌ شاری ئه‌سكه‌نده‌رییه‌ی میسر له‌ باوكێكی ده‌ریاوان و دایكێكی مامۆستا له‌دایكبووه‌ و دوای وازهێنانی له‌ كۆڵیژی ئه‌ندازیاریی مه‌ده‌نی له‌ ساڵی 1979، چووه‌ته‌ له‌نده‌ن و وه‌ك كارمه‌ندێكی پێشوازی و پاشان پاسه‌وانی دیسكۆكان له‌ ناوچه‌ی سۆهۆ-ی له‌نده‌ن كاری كردووه‌.

ئه‌بوحه‌مزه‌ هاوسه‌رگیری له‌گه‌ڵ كچێكی به‌ریتانیی مه‌سیحیی كاسۆلیك ده‌كات و دوای چوار ساڵ ده‌ستبه‌رداری ده‌بێت، دواتر ژنه‌ موسڵمانێك ده‌هێنێت و ساڵی 1986 بڕیار ده‌دات خوێندنه‌كه‌ی ته‌واو بكات و ئینجا ره‌گه‌زنامه‌ی به‌ریتانیی وه‌رگرت، ساڵی 1987 له‌كاتی به‌جێگه‌یاندنی فه‌ریزه‌ی حه‌ج، چاوی ده‌كه‌وێت به‌ عه‌بدوڵا عه‌زام، كه‌ به‌ دامه‌زرێنه‌ری بزووتنه‌وه‌ی جیهادیی نێوده‌وڵه‌تی و كه‌سایه‌تیی داده‌نرێت و یه‌كێكیشه‌ له‌و كه‌سه‌ سه‌ره‌كییانه‌ی كه‌ دژی داگیركاریی ئه‌فغانستان بووه‌ له‌لایه‌ن یه‌كێتیی سۆڤیه‌تی پێشوو، هه‌ر ئه‌و چاوپێكه‌وتنه‌ بووه‌ بنه‌ما بۆ توندڕه‌وبوونی ئه‌بو حه‌مزه‌ و په‌یوه‌ستبوون به‌ ئیسلامه‌وه‌.

ساڵی 1989 و دوای كشانه‌وه‌ی یه‌كێتیی سۆڤیه‌ت، ئه‌بو حه‌مزه‌ چووه‌ ئه‌فغانستان و له‌وێ له‌ رووداوێكی ته‌قینه‌وه‌ی مین دا، هه‌ردوو ده‌ست و چاوێكی له‌ده‌ستدا، دواتر گه‌ڕایه‌وه‌ بۆ به‌ریتانیا و گروپێكی ته‌وندڕه‌وی له‌ لایه‌نگرانی شه‌ریعه‌ت دامه‌زران و بووه‌ ئیمامی ئه‌و گروپه‌، دواتر چووه‌ بۆسنه‌ و تا ساڵی 1995 له‌وێ مایه‌وه‌.

له‌ ساڵی 1997ه‌وه‌ ده‌ستیكرد به‌ وتاردان له‌ مزگه‌وتی (فینسپۆری پارك) له‌ باكوری له‌نده‌ن و رۆڵی گه‌وره‌ی هه‌بوو له‌ هاندانی گه‌نجان به‌ره‌و توندڕه‌وی و ئاماده‌كردن و ناردنیان بۆ سه‌ربازگه‌كانی رێكخراوی قاعیده‌، چه‌ندین جاریش زه‌كه‌ریا موسه‌و و ریچارد رید، ئه‌و دوو ده‌ستگیركراوه‌ی به‌ زیندانی هه‌تاهه‌تایی له‌ ئه‌مریكا سزادراون، سه‌ردانی مزگه‌وته‌كه‌ی ئه‌بوحه‌مزه‌یان كردووه‌، له‌دوای 11ی سێپتێمبه‌ریش ئه‌و سۆزه‌ی نه‌شارده‌وه‌ كه‌ بۆ ئوسامه‌ بن لادن هه‌یه‌تی و به‌ پیاوباش وه‌سفی له‌قه‌ڵه‌می داوه‌.

دوای داخستنی مزگه‌وته‌كه‌شی له‌ ساڵی 2003 و دۆزینه‌وه‌ی چه‌ندین پاسپۆرتی ساخته‌ و دزراو، ئه‌بو حه‌مزه‌ هه‌ر به‌رده‌وام بوو له‌ وتاردان و له‌سه‌ر شه‌قامه‌كان وتاری خۆی ده‌دا، بۆیه‌ ساڵی 2004 و له‌سه‌ر داوای ئه‌مریكا ئه‌بو حه‌مزه‌ به‌تۆمه‌تی رفاندنی چه‌ند گه‌شتیارێك له‌ یه‌مه‌ن ده‌ستگیركرا و ساڵی 2004 به‌ چوارساڵ زیندانی حوكم درا، زۆریش هه‌وڵی دا كه‌ نه‌كه‌وێته‌ده‌ست ئه‌مریكا، به‌ڵام دواجار له‌ مانگی تشرینی یه‌كه‌می 2012، ئه‌و كه‌سه‌ توندڕٍه‌وه‌ راده‌ستی ئه‌مریكا كرا و بڕیاریشه‌ له‌ رۆژی دووشه‌ممه‌ی داهاتوو له‌ نیویۆرك ده‌ست به‌ دادگایی كردنی بكرێت.






خه‌ندان