سویسرا نزیكەی 40 ملیۆن دۆلار دەداتەوە دەوڵەتی تونس، كە لە حیسابی یەكێك لە خزمەكانی زەینولعابدین بن عەلیدا هەبوو و لەلایەن حكومەتی سویسرییەوە دەستی بەسەرداگیرابوو .

میكایل لوبر، داواكاری گشتیی سویسری رایگەیاند، كە وەزارەتی دادی سویسرا رۆژی چوارشەممە بڕیاری دا، كە ئەو پارەیە بداتەوە تونس لەچوارچێوەی " مامەڵەی باش لەگەڵ دەسەڵاتدارانی تونس ".

پێشتر تونس داوای لە دەسەڵاتدارانی سویسری كردبوو، كە لەڕووی دادوەرییەوە هاوكاری بن ، بڕیاری گەڕاندنەوەی ئەو پارەیەش لەو چوارچێوەیەدا دێت ، بەڵام دەكرێ داوای پێداچوونەوەی ئەو بڕیارە بكرێت لەلایەن ئەو خزمەی بن عەلی ، لەلای دادگای تاوانی فیدرالی سویسری .

دوای رووخاندنی دەسەڵاتی بن عەلی لە تونس ، لە ئەنجامی راپەڕینەكانی " بەهاری عەرەبی "، كە لەوێوە دەستیپێكرد ، لە كانوونی دووەمی 2011 ، حكومەتی سویسری 68 ملیۆن دۆلاری خزمانی بن عەلی لە بانكە سویسرییەكاندا سڕكرد .

داواكاری گشتیی سویسری گوتی "هێشتا چەندین ملیۆن دۆلاری دیكەش لە حیسابە بانكییەكانی سویسرادان و دەمانەوێ پێشكەوتنێك لەو دۆسیەدا بەدەستبێنین "










رووداو