سەرۆكی رێكخراوی ئەلقاعیدە بڕیاریدا رێكخراوی دەوڵەتی ئیسلامی لە عێراق و شام (داعش) هەڵبوەشێنێتەوە و تەنیا لەژێر ناوی رێكخراوی بەرەی نوسرە لە سووریا شەڕ بكات. ئەبوبەكر بەغدادی سەرۆكی داعش دەڵێ بەو بڕیارەی زەواهیری پابەند نابێ.

لە تۆمارێکی دەنگیدا كە لە كەناڵی ئەلجەزیرە بڵاوكراوەتەوە، ئەیمەن زەواهیری سەرۆكی رێكخراوی قاعیدە بڕیاریدا ئەبوبەكر بەغدادی، سەركردەی رێكخراوی دەوڵەتی ئیسلامی لە عێراق و شام تەنیا بەرپرسیاری عێراق بێت و لەژێر ناوی دەوڵەتی ئیسلامی لە عێراق بەردەوام دەبێ.هاوكات فاتیح محەممەد جۆلانی، سەركردەی بەرەی نوسرە بەرپرسیاری جو‌وڵانەوەكانی ئەلقاعیدە بێت لە سووریا.

لە تۆمارە دەنگییەکەی زەواهیریدا هاتووە: \"ئەبوبەكر بەغدادی راوێژی بە ئێمە نەكرد و دەوڵەتی ئیسلامی لە عێراق و شام-ی دامەزراند، بەمەش هەڵەیەكی گەورەی كرد، هەڵەی شێخ فاتیح محەممەد جۆلانی-ش ئەوە بوو دوای رەتكردنەوەی رێكخراوی دەوڵەتی ئیسلامی لە عێراق و شام، پەیوەندییەكانی خۆی لەگەڵ رێكخراوی قاعیدە بڕی و بەبێ ئەوەی راوێژ بە ئێمە بكات ئەو رێكخراوەی رەتكردەوە\"".

لە بەرامبەردا بەغدادی روونكردنەوەیەكی بڵاوكردووەتەوە كە تێیدا بڕیارەكەی ئەیمەن زەواهیری، سەركردەی رێكخراوی قاعیدە رەتدەكاتەوە.





رووداو"