رێكخراوی‌ نه‌ته‌وه‌یه‌كگرتووه‌كان له‌ راپۆرتێكدا سه‌باره‌ت به‌ بارودۆخی‌ ژیان له‌ كه‌رتی‌ غه‌ززه‌ی‌ ژێر كۆنترۆڵی‌ حه‌ماس، ده‌ڵێت ئه‌م ناوچه‌یه‌ له‌ ساڵی‌ 2020 به‌ دواوه‌ شوێنی‌ ژیان كردن نابێت، ئه‌گه‌ر پێویستیه‌ سه‌ره‌تاییه‌كانی‌ بۆ دابین نه‌كرێت.

راپۆرته‌كه‌ی‌ رێكخراوی‌ نه‌ته‌وه‌یه‌كگرتووه‌كان ده‌ڵێت پڕۆژه‌ بنچینه‌ییه‌كانی‌ وه‌ك راكێشانی‌ تۆڕی‌ ئاو، ته‌ندروستی‌، په‌روه‌رده‌ و سیسته‌می‌ زێراب، به‌پێێ‌ زیادبوونی‌ رێژه‌ی‌ دانیشتووانی‌ ناوچه‌كه‌، په‌ره‌ی‌ پێنه‌دراوه‌.
به‌پێی‌ پێشبینییه‌كان، هه‌تا ساڵی‌ 2020، ژماره‌ی‌ دانیشتووانی‌ غه‌ززه‌ له‌ یه‌ك ملیۆن و 600 هه‌زار كه‌سی‌ ئێستاوه‌ ده‌گاته‌ 2 ملیۆن و 100 هه‌زار كه‌س، كه‌ خزمه‌تگوزایی‌ زیاتر له‌ ناوچه‌كه‌ پێویست ده‌كات.
راپۆرته‌كه‌ پێشبینی‌ ئه‌وه‌ی‌ كردووه‌ كه‌ هه‌تا ساڵی‌ 2020، كه‌رتی‌ غه‌ززه‌ پێویستی‌ به‌ دوو هێنده‌ی‌ قوتابخانه‌كانی‌ ئێستا و 800 قه‌ره‌وێڵه‌ی‌ نه‌خۆشخانه‌ ده‌بێت و هه‌ر ئێستاش له‌گه‌ڵ‌ قه‌یرانی‌ خانوو به‌ره‌وڕووه‌.
كه‌رتی‌ غه‌ززه‌ له‌ ساڵی‌ 2007 هه‌تا ئێستا، دوای‌ ئه‌وه‌ی‌ له‌لایه‌ن گرووپی‌ توندڕۆی‌ حه‌ماس كۆنترۆڵ‌ كرا، له‌لایه‌ن ئیسرایل و میسره‌وه‌ گه‌مارۆی‌ خرایه‌ سه‌ر، بۆ پێشگیری‌ له‌ گه‌یشتنی‌ چه‌ك و ته‌قه‌مه‌نی‌ به‌ چه‌كداره‌كانی‌ حه‌ماس.