بینیامین نەتەنیاهۆ سەرۆك وەزیرانى ئیسرائیل داواى لە وڵاتە گەورەكانى دنیا كرد هەڵوێستیان لەبارەى بەرنامە ناوكەییەكەى ئێران توندتر بكەن.

نەتەیناهۆ لە بەیاننامەیەكدا راى گەیاند، ئێران تا ئێستە هەوڵى وێرانكردنى ئیسرائیل دەدا و هەڕەشەیە بۆ سەر ئاشتیی دنیا.

زیاتر گوتى، پێویستە وڵاتە گەورەكان سەر بۆ ئێران دانەنوێنن و داوای لێ بكەن چالاكی پیتاندنى یۆرانیۆم بووەستێنێ و ئەو بڕە یۆرانیۆمە چڕكراوەى هەیەتى لەناوی بەرێ، جگە لەوانەش وێستگەی ناوكەییی ژێرخاكى قوم هەڵوەشێنێتەوە.

نەتەنیاهۆ گوتى، ئەمە پوختەى هەڵوێستى ئیسرائیلە كە گۆڕانكاری تیادا نایەتە كردن و دووپاتی كرد، ئەمەش رێگەى سەرەكییە بۆ پێشگرتنی ئێران لە دروستكردنى بۆمبى ناوكەیی، مۆنیتكارلۆ گواستییەوە.

لێدوانەكەى نەتەنیاهۆ رۆژێك پێش دەست پێكردنى كۆبوونەوەى نێوان ئێران و وڵاتانى 5+1 دێ كە چاوەڕوان دەكرێ سبەى چوارشەم لەبارەى پرسى ناوكەییی ئێران لە بەغدا وتوێژ ساز بكەن.

خولی یەكەمى گفتوگۆكانى ناوكەیی ئێران لە 14ی نیسان/ئەپریلى رابردوو لە ئیستەنبۆڵ ساز كرا كە زیاتر لە 2 ساڵ بوو وەستا بوو.