كورته‌ فلمێ "میسی یێ به‌غدا" یێ ده‌رهێنه‌رێ كورد سه‌هیم عومه‌ر خه‌لیفه‌، خه‌لاتێ باشترین فلم د فیسته‌ڤالا فلمێن مارسیلیا ل فه‌ره‌نسا وه‌رگرت.



سه‌هیم عومه‌ر خه‌لیفه‌ ب ئاژانس و رادیۆیا په‌یامنێر راگه‌هاند، فلمێ وی د گه‌را دوویێ یا فیسته‌ڤالا فلمێن مارسیلیا پشكداربو و ل گه‌ل 65 فلمان د پشكا كێبه‌ریێ دا بون.



ئیماژه‌ دا وێ چه‌ندێ ژی، "میسی یێ به‌غدا" كاری د فیسته‌ڤالێ دا خه‌لاتێ زێڕین وه‌ك باشترین فلم ب ده‌ست خو بخه‌ت، كو لێژنا دادوه‌ریا فیسته‌ڤالێ ژ 10 سینه‌ماكاران پێكهابتو.



"میسی یێ به‌غدا" ب ڤێ خه‌لاتێ ده‌بیته‌ خودانێ 33 خه‌لاتێن جیهانی و ب رێكا ڤی فلمی و كورته‌ فلمێ "خاكێ په‌هه‌له‌وانا" هه‌تا نها 57 خه‌لات وه‌رگرتینه‌.



ل چه‌ند رۆژێن بوری دا، كورته‌ فلمێ "میسی یێ به‌غدا" ناڤێ وێ د لیستا درێژا ئۆسكارێ دا بو سالا 2015 هاته‌ تۆماركرن.