كۆمەڵەی چاپخانەكانی كوردستان گلەیی و داواكاریان هەیە
سۆران عەبدولرەحمان، لە لێدوانێكدا بە ئاژانسی هەواڵی پەیامنێری راگەیاند: ئەندامانی كۆمەڵەكەمان كە چاپخانەیان هەیە و تا ئێستا ناویان لە كۆمەڵەكەمان تۆماركردوە 55 ئەندامن و پڕۆسەی تۆماركردنیش بەردەوامە.
سەرۆكی كۆمەڵەی چاپخانەكانی كوردستان گوتی: بەداخەوە دام و دەزگا و وەزارەتەكان بە تایبەت وەزارەتی پەروەردە كە ساڵانە پڕۆگرامێكی زۆری قوتابیان چاپدەكات وەك پێویست كاری چاپكردن لای ئێمە ئەنجام نادەن و دەچنە دەرەوە بە نرخ و تێچویەكی زۆر کتێب چاپدەكەن.
سۆران عەبدولرەحمان، گلەیی ئەوەی لە وەزارەتی پەروەردەی هەرێم كرد كە تا ئێستا وەزارەتی پەروەردەی هەرێم لەگەڵیان دانەنیشتووە بۆ ئەوەی بزانن ئێمە بە چ كوالیتی و نرخ و قەبارەیەك و تا چەندە دەتوانین پەرتۆكیان بۆ چاپبكەین. لەو روەشەوە خەریكە كاری چاپكردن لە هەرێم لاوازی تێدەكەوێت بە پێچەوانەوە ئەگەر وەزارەتی پەروەردە كارەكانی لای ئێمە بكات و پلانی خۆیمان پێشكەش بكات، ئێمە لەماوەی 10 ساڵدا دەتوانین توانای چاپكردنی تەواوی پەرتوك و كارەكانیان بگرینە ئەستۆ و گرفتی كادیر و تەكنیك و هونەر و لایەنەكانی دیکەشمان بەهێزتر بكەین. لەو روەشەوە لایەنە پەیوەندارەكانمان ئاگادار كردوەتەوە، بەڵام بەداخەوە تا ئێستا وەڵامێكی ئەنجامدارمان بەدەست نەگەیشتووە.
