چاندنی نەمام و گوڵەکان لەناو ماڵدا جگە لەوەی جوانییەکی زۆر دەبەخشێت لەنێو ماڵدا گرنگییەکی زۆریشی ھەیە بۆ پاککردنەوەی ھەوا، بەڵام ئەوەی لێرەدا گرنگە بیزانین جۆری ئەو نەمامانەیە ڕەنگە ھەندێکیان زیانیان ھەبێت بۆ لەشی مرۆڤ.


ئەو جۆرە نەمامە کە ناوەکەی بریتییە لە "دەفناباخیە" لە زۆربەی ماڵەکان بوونی ھەیە، لە یەکێک لە وڵاتانی جیھان بووەتە ھۆی نەخۆش کەوتنی چەندین منداڵ بەھۆی دەست لێدان و یاریکردن بەو جۆرە نەمامە.


پزیشکان ئەو جۆرە ڕووەکە بە ڕووەکێکی ژەھراوی ھەژمار دەکەن و پێیان وایە کاتێک بەر دەست دەکەوێت تووشی کێشەی تەندروستیان دەکات، بەتایبەتی ڕەنگە منداڵ نەزانێت دەست بۆ دەمی دەبات لەو کاتەدا دەبێتە ھۆی ھەوکردنی ڕووپۆشی سەر زمان و ئەستور بوونی دەم و زمان و لێوەکان، جگە لەوەیش زیانێکی زۆر بە خانەکانی لەش دەگەیەنێت بە تایبەتی خانەکانی کۆئەندامی ھەناسە، مەترسی ئەو ڕووەکە لەوەدایە ئەگەر زوو چارەسەر نەکرێت ڕەنگە ببێتە ھۆی مردن.