فەهیم عەبدوڵڵا سەرۆكی ئەنجومەنی پارێزگای دهۆك بۆ گوڵان:پارێزگای دهۆك پێشوازی لە سەرجەم ئاوارەكانی عێراق كردووە، بەڵام حكومەتی بەغدا هێندەی دەوڵەتانی كۆمەكبەخش هاوكاری نەكردووین

فەهیم عەبدوڵڵا سەرۆكی ئەنجومەنی پارێزگای دهۆك بۆ گوڵان:پارێزگای دهۆك پێشوازی لە سەرجەم ئاوارەكانی عێراق كردووە، بەڵام حكومەتی بەغدا هێندەی دەوڵەتانی كۆمەكبەخش هاوكاری نەكردووین
پارێزگای دهۆك لە ماوەی شەڕی داعشدا، ئەو پارێزگایەی كوردستانە بووە كە پێشوازی لە زۆرترین ئاوارەی رۆژئاوا و ناوخۆی كوردستان و ناوچەكانی عێراق كردووە. هەروەها بە هۆی داگیركردنی موسڵ لەلایەن داعشەوە خزمەتگوزاری بەشێكی ناوچەكانی دەشتی نەینەوا كەوتووەتە سەرشانی ئەم پارێزگایە. بۆ قسەكردن لەسەر رەوشی پارێزگای دهۆك و چۆنیەتی مامەڵەكردن لەگەڵ ئەم واقیعە تایبەتییە، ئەم دیمانەیەمان لەگەڵ فەهیم عەبدوڵڵا سەرۆكی ئەنجومەنی پارێزگای دهۆك كرد و بەمجۆرە وەڵامی پرسیارەكانی گوڵان-ی دایەوە.



* ماوەی دوو ساڵە هەرێمی كوردستان و پارێزگای دهۆك بە دۆخێكی تایبەتدا تێپەڕ دەبێت، بەتایبەتی هاتنی ژمارەیەكی یەكجار زۆری ئاوارە و پەناهەندە و بڕینی بەشە بودجەی هەرێم و قەیرانی دارایی، ئایا لەو دوو ساڵەدا تاچەند ئاستەنگتان بۆ درووست بووە بەتایبەتی لە پرسی ئەو ژمارە زۆرەی ئاوارە؟
- بێگومان كاریگەرییەكە زۆر بووە، چونكە دوای كەوتنی موسڵ و ئەو كارەساتەی بەسەر شنگال هات، زیاتر لە یەك ملیۆنێك و 100 هەزار كەس لە موسڵ و زوممار و دەشتی نەینەوا ماڵ و حاڵی خۆیان جێهێشت و روویان كردە پارێزگای دهۆك، كە هاتنی ئەم شەپۆلی ئاوارەیەش سەرەڕای ئەوەی حكومەتی هەرێم و رێكخراوە مرۆییەكان درێغییان نەكردووە لە هاوكاریكردنی ئەم پارێزگایە، بارگرانییەكی گەورەی لەسەر ئیدارەی پارێزگای دهۆك و خەڵكی ئەم پارێزگایە درووست كرد، لە رووی تەندروستی و كارەبا و رێگەوبان و دابینكردنی سووتەمەنی و دەستەبەركردنی جێگە و رێگە بۆیان. چونكە تەنیا لە بواری كارەبادا كە حاڵی حازر كوردستان خۆی بە دەست قەیرانی كارەباەوە دەناڵێنێت، ئەوا زیاتر لە 113 مێگاوات كارەبا بۆ كەمپی ئاوارەكان دابین كراوە. ئەمە سەرەڕای بەرزبوونەوەی نرخی كاڵاكان و هەڵكشانی كرێی خانوو لەم شارەدا.
* باسی كاروباری ناوچە كوردستانییەكانی دەرەوەی ئیدارەی هەرێمت كرد، بەتایبەتی شنگال و زوممار و سنوونێ و چەندین شار و شارۆچكەی دەشتی نەینەوا كە ئێستا بە ئەمری واقیع گەڕاونەتەوە ناو باوەشی نیشتمان، ئەمەش كاریگەری لەسەر بارگرانی و فراوانبوونی دیموگرافی و ئیداری پارێزگای دهۆك درووست كردووە، ئایا توانیوتانە رووبەڕووی ئەم واقیعە نوێیە ببنەوە و كێشەكان چارەسەری بۆ بدۆزنەوە؟
- لە راستیدا پێش كەوتنی موسڵیش، ئەو ناوچانە، بە شنگال و زوممار و تەلەعفەر كە زۆربەی دانیشتووانەكەی توركمانن، هەروەها تلكێف و بەعشیقە و بەرتلەش لە رووی دابینكردنی پێداویستی و كەل و پەلی تەندروستییەوە بارگرانی بوون لە سەر پارێزگای دهۆك. هەروەها ئەگەر باسی بارگرانی لەسەر سووتەمەنی بكەین، ئەوا تەنیا ئەو ئۆتۆمبێلانەی لەگەڵ ئاوارەكاندا هاتوون و لەلایەن بەڕێوەبەرایەتی هاتوچۆی دهۆك تۆمار كراون، زیاتر لە 30 هەزار ئۆتۆمبێلن، كە هەموویان لەسەر پشكی پارێزگای دهۆك بەنزین و گازوایل وەردەگرن. لە بارەی پرسی ئەوەی چۆن رووبەڕووی ئەم دۆخە دەبینەوە، ئەوا خۆ ناكرێت ئێمە دەستەوەستان بین و قەیرانێكە و دەبێت رووبەڕووی ببینەوە، ئەگەرچی دەستەبەركردنی ئەو خزمەتگوزارییانەش لەسەر حیسابی خەڵكی ئیمە بێت. ئێمە سوپاسی خەڵكی پارێزگای دهۆك و هەموو خێرخوازەكان دەكەین كە هاوكاری ئیدارەی پارێزگاكەمان دەكەن. لە راستیدا هەموو ئەو شاندانەش كە دێن و سەردانمان دەكەن، خۆشحاڵ دەبن بە شێوازی دەستەبەركردنی خزمەتگوزاری و شوێنی نیشتەجێبوون و دابینكردنی پێداویستییەكان بۆ ئاوارەكان. ئومێدی ئێمە ئەوەیە جارێكی دیكە خەڵكەكە بتوانن بگەڕێنەوە بۆ ئەو ناوچانەی ئازادكراون و بتوانرێت خزمەتگوزارییە سەرەتاییەكانیان بۆ دابین بكرێت. وەك شنگال و سنوونێ و زوممار و سەرجەم ناوچەكانی رۆژئاوای دیجلە. مەترسیی راستەقینە ئەوەیە كە لە شەڕی رزگاكردنی موسڵدا رەنگە دوو هێندەی ئاوارەكانی ئێستای نیشتەجێبووی دهۆك، ئاوارەی دیكە روو بكەنە شارەكەمان، یان هەر هیچ نەبێت لەو ژمارەیەی ئێستا ئاوارەكان زیاتر ئاوارەی دیكە بەرەو دهۆك بێن، لەبەر ئەوە هەمیشە ئەم مەترسییە بە بیر وەزیر و پەرلەمانتار و لایەنە خێرخوازییەكان دەهێنینەوە بۆ ئەوەی بە لای كەمەوە ئامادەكارییە سەرەتاییەكان دەستەبەر بكەن.
* ناسەقامگیرییەكانی كوردستانی باكوور و داخستنی ناوبەناوی دەروازەی برایم خەلیل و تەقاندنەوەی بۆری نەوتی كوردستان بارگرانی لەسەر كوردستان و رەوشی بازرگانی و ئابووری هەرێم درووست كردووە، ئایا ئەو ناسەقامگیری و كێشانەی نێوان سوپای توركیا و هێزەكانی پەكەكە تاچەند كاریگەری لەسەر رەوشی كاروبارەكانتان كردووە؟
- بە دڵنیاییەوە كاریگەرییەكە یەكجار زۆرە، وەك دەزانن ئەوە نزیكەی مانگێكە ئەو دەروازەیە داخراوە، ئاشكرایەش ئەمەش كاریگەری لەسەر جموجووڵی بازاڕ هەیە، نەك تەنیا حكومەتی مەحەلی پارێزگای دهۆك، بەڵكو كاریگەری گەورەی لە سەر داهاتی حكومەتی هەرێمیش هەبووە. پێمخۆشە ئاماژە بەوەش بكەن كە پشكی شێری شەڕی بەرەنگاربوونەوەی داعش بەر پارێزگای دهۆك دەكەوێت، چونكە بەرەیەكی یەكجار گەورەی هەیە لەگەڵ ئەم شەڕەدا، كە پێویست دەكات كارەبا بۆ بەرەكانی شەڕ دابین بكەین، هەروەها لە بواری رێگەوبانیش، كە بەڕێوبەرایەتی رێگەوبانی دهۆكیش هاوكار بوون بۆ پێشمەرگە و بۆ سەنگەرلێدان، كە جار هەبووە كەسانی تەكنیكی و شۆفێرەكانیشمان شەرەفی شەهیدبوونیان پێبڕاوە. كەواتە ئێمە لە ئیدارەی پارێزگای دهۆك بارگرانییەكی گەورە كەوتۆتەسەر شانمان. دواتر ئەوەی پێوەندی بە رۆژئاواوە هەبێت، كە بۆ پەیداكردنی پێداویستیە بنەڕەتیەكان پشت بە باشووری كوردستان دەبەستن و هاوسنووربوونیشیان لەگەڵ دهۆكدا ئەوەندەی دیكە بارگرانی لەسەر ئەم پارێزگایە درووست كردووە.
* ئایا ئەمە ئەو ناوچانەش دەگرێتەوە كە چەكدارانی پەكەكەی لێیە و ئایا تا چەند رێگرە لەوەی ئاوەدان بكرێتەوە؟
- ئێمە ئەوە لەبەرچاو ناگرین كە كێی لێیە و كێی لێ نییە، بەڵكو گرنگ ئەوەیە ئەوانە خەڵكی ئێمەن و میللەتی ئێمەن و پێویستە ئەوەندەی لە تواناماندا بێت خزمەتیان بكەین. بۆ نموونە ئێمە توانیومانە كارەبا بۆ زۆرێك لەو ناچانە دابین بكەین، ئەگەرچی بڕەكەشی كەم بێت، لەگەڵ چاككردنی ئەو رێگەیانەی تێكیان داوە، بە هەمان شێوەی دابینكردنی ئاو، واتە توانیومانە هەندێ خزمەتگوزاری سەرەتایی بگەیەنین، ئەگەرچی لە ئاستی پێویست و لە ئاست تمووحی ئێمەشدا نین. هەرچەندە ئێمە هەر بە خەمخۆرییەوە كار دەكەین بۆ پێشكەشكردنی خزمەتگوزاری بۆیان بۆ ئەوەی ئەم خەڵكانە دڵگەرم بن بۆ گەڕانەوە بۆ سەر ماڵ و حاڵی خۆیان.
* ئایا تاچەند گرژی و دۆخە نائاساییەكەی نێوان پارتە كوردستانییەكان كاریگەری لەسەر لاواز بوونی رۆڵی ئەنجومەنی پارێزگای دهۆك كردووە؟
- لە راستیدا رەنگە ئەو كاریگەرییەی نەبووبێت لەسەر ئەنجومەنی پارێزگا، بەڵام هەروەك ئێوەش دەزانن ئێمە لە چوارچێوەی یاسای ژمارە 3ی ساڵی 2009ی پەرلەمانی كوردستان كە بە یاسای ئەنجومەنی پارێزگاكان ناودەبرێت كاروبارەكان بەڕێوەدەبەین، بەڵام بە دڵنیاییەوە لە رووی عەمەلییەوە كاری ئێمە چاودێری و دەركردنی هەندێك بڕیار و رێنماییە، بەڵام بە هۆی بێ بودجەیی و بارگرانی لە سەر یەكە ئیدارییەكانی پارێزگاكە، ئەوا جگە لە هاوكاریی یەكتر هیچ رێگەیەكەی دیكەمان لەبەردەمدا نەماوەتەوە، بەڵام نابێت ئەو هاوكارییە لەسەر حیسابی بەرژەوەندی گشتی بێت. ئەوەتا لە ناوەڕاستی هەفتەی رابردوو بوو بەڕێوەبەری گشتی تەندروستی دهۆكمان بانگێشتی ئەنجومەن كرد، وەكو میوان بەدواداچوونمان لەسەر زۆر گرفت و كێشە كرد، ئەگەرچی نابێت ئەو راستییە لە یاد بكەین كە ئەم بەڕێوبەرایەتییە هەوڵ و كۆششێكی زۆر گەورەیان لە ئەستۆ گرتووە بە رادەیەك جەنابی سەرۆك بارزانی خۆی سوپاسی رۆڵی ئەوانی كرد بۆ گەیاندنی خزمەتگوزاریی تەندروستی بۆ بەرەكانی شەڕ و دانیشتووانی ناوچە ئازادكراوەكان. لەبەر ئەوە ناچارین تەبایی و هەماهەنگی و هاوكارییەكی باشمان لەگەڵ ئیدارەی پارێزگای دهۆك هەبێت، بۆ تێپەڕاندنی ئەم قەیرانە.
* هەر سەبارەت بە ئەنجومەنەكەتان ماوەیەك پێش ئێستا یەكگرتووی ئیسلامی كوردستان كۆمەڵێك پۆستی وەرگرت، ئایا ئەمە بەو واتایە نایەت كە ئەنجومەنی پارێزگای دهۆك سەرقاڵی دامەزراندنی حكومەتی خۆجێیە و ئایا بەنیاز نین ئەم حكومەتە خۆجێیە فراوانتر بكەن؟
- ئێمە هەر لە سەرەتای پێكهێنانی ئەنجومەنی پارێزگا و ئیدارەی خۆجێیەتی پارێزگای دهۆك بە نیەتپاكی روومان كردە لایەنەكانی دیكە، بەڵام هەروەك ئاشكرایە رۆژێك دوای دەستەبەركاربوونمان رووداوەكانی موسڵ و شنگال هاتنەئاراوە و ئێمەش كەوتنیە دۆخێكی نائاساییەوە. بەڵام پاش خۆگونجاندمان لەگەڵ قەیران و دۆخە سەختەكە، ئیدی پێویست بوو لەگەڵ لایەنەكان بكەوینە گفتوگۆ و سەرەتا لەگەڵ یەكگرتووی ئیسلامی رێككەوتین، و وردە وردە پۆست وەردەگرن و فەرمانیان بۆ دەردەچێت، ئەوەی لە دەسەڵاتی ئەنجومەنی پارێزگایە ئێمە ئەنجاممانداون، ئەوەی لە دەسەڵاتی پارێزگایە ئەوەش خەریكە جێبەجێ دەبێت، ئەوانی دیكە چاوەڕێی فەرمانی ئەنجومەنی وەزیران و هەندێكیان پێویست بەوە دەكات لە وەزارەتی ناوخۆ فەرمانیان بۆ دەربچێت. كە ئێمە چاوەڕیی دەرچوونیان دەكەین. رەنگە هەنگاوی داهاتوومان لەگەڵ برایانی مەسیحی بێت. هەروەك دەزانن مەسیحییەكان بەشێكی زۆر گرنگی پێكهاتەكی كۆمەڵایەتی دهۆكن، لەبەر ئەوە لەگەڵ لایەنە سیاسی و كەسایەتیەكانیان دەكەویتە گفتوگۆ و ئومێد دەكەین لە ماوەیەكی كورتدا بگەینە رێككەوتن بۆ ئەوەی ئەوانیش بەرپرسیارێتییەكانی خۆیان لە ئەستۆ بگرن. ئەوەی پێوەندی بە یەكێتی و گۆڕانەوە هەبێت، ئەوا ئەمە پەیوەستە بە هەل و مەرجە سیاسییەی لە سەرتاسەری هەرێمی كوردستان لە ئارادایە. ئێمەش چاومان لەوەیە كە برایانی یەكێتی بەتایبەتی، دۆخی ئێمە لە پارێزگای هەڵەبجە لەبەرچاو بگرن. بۆچوونی شەخسی من ئەوەیە نابێت لەسەر بنەمای ژمارەی كورسییەكان مامەڵە لەگەڵ برایانی یەكێتی بكەین، دەبێت ئەوانیش بە هەمان شێوە هەڵسوكەوت بكەن، چونكە ئەم دوو لایەنە بەرپرسیارێتی سەرەكییان لە ئەستۆیە، چ لە بەرەكانی جەنگ و چ لە ئەركی پاراستنی ئارامی و ئاسایشی ناوخۆیی. لەبەر ئەوە خوازیارین لەسەر پۆستێك لێرە و لەوێ ئاستەنگ درووست نەبێت، بەڵكو كار بۆ رێكخستنەوەی ناوماڵی كورد بكەین بۆ ئەوەی ببینە گەورەترین پشت و پەنا بۆ پێشمەرگەكان لە بەرەكانی شەڕدا. لەگەڵ گۆڕان ساردییەك هەیە، كە هیواخوازین ئەو ساردییەش بڕەوێتەوە، چونكە پێمان خۆشە هەمو لایەنەكان ئەرك و بەرپرسیارێتییەكان بگرنەئەستۆ و پۆستەكانی خۆیان وەربگرن. من دەڵێم هەرچەندە هەمیشە ئێمە وەك پارتی زۆرینە بووین لە پارێزگای دهۆك، ئەوەش نە بە كودەتا و نە بە شێوازی ناشەرعی بووە، بەڵام دەبێت خۆمان رابێنین لەسەر ئەوەی كە ئێستا سەردەمی ئەوەیە هەموو لایەك لە دەسەڵات بەشدار بن.
* لەكاتێكدا پارەی پەرەپێدانی پارێزگاو بودجەی هەرێمی كوردستان راوەستاوە لەم دۆخە سەختەدا پشت بە چ سەرچاوەیەكی داهات دەبەستن بۆ بەڕێوەبردنی كاروبارەكانتان؟ ئایا بەغدا و حكومەتی هەرێمی كوردستان تایبەتمەندێتی پارێزگاكەیان لەبەرچاو گرتووە؟
- پێم خۆش بوو ئەم پرسیارەتان كرد، لە راستیدا مامەڵەی حكومەتی فیدڕاڵ لەگەڵ ئێمەدا بەتایبەتی پارێزگای دهۆك و ئاوارەكانی ئەم شارە، تەنانەت وەك مامەڵەی وڵاتە كۆمەكبەخشەكانیش نییە، ئەمە لە كاتێكدا زۆربەی ئەو ئاوارانەی لە پارێزگاكەی ئێمەدان عەرەبن و خەڵكی موسڵ و ئەبنار و فەللوجە و تەنانەت بەسرە-شی تێدایە، وەك ئەوەی ئێمە بەشێك نەبین لە عێراق و بیانی بین. واتە ئەگەرچی هەندێ دەرمان و بڕە پارەیەكیان ناردووە بۆ درووستكردنی كەمپ بۆ ئاوارەكان، بەڵام هەرگیز هاوكارییەكانیان لە ئاستی پێویستدا نەبووە و هیچ كاتێك هەست بەوە نەكراوە حكومەتێكی فیدڕاڵی هەبووە و پشتیوانی لەم خەڵكانە دەكات و كار بۆ كەمكردنەوەی نەهامەتییەكانیان دەكات. هەروەها نەهاتنی بوجەی پەرەپێدانی پارێزگاش كاریگەرییەكی دیار و بەرچاوی هەبووە.
* ئەنجومەنی پارێزگای سلێمانی باسی لە شێوازەكی زۆر نامەركەزی كردووە بە رادەیەك داوای كردووە داهاتی خۆیان بۆ خۆیان بێت، ئێوە تاچەند ئاگاداری ئەو داواكارییەن و راوبۆچوونی ئێوە لەسەر شێوازی نامەركەزی چییە؟
- لە هەقیقەتدا ئێمە هەر تەنیا لە رێگەی راگەیاندنەكانەوە ئاگاداری ئەو پرسە بووین، بە تێڕوانینی من نابێت بڕیارێك بدەین كە كاردانەوە بێت لە ئاست ئەم دۆخەدا. دەبێت ئەو راستییەمان لەبەرچاو بێت كە ئێمە هەر لە زاخۆ تاوەكو دوا گوندی گەرمیان هاوچارەنووسین. من لە رووی مەبدەئیەوە لەگەڵ ئەوەدام دەسەڵات شۆڕبكرێتەوە بۆ پارێزگاكان و لەوێشەوە بۆ قەزا و ناحییەكان، ئەویش بۆ كەمكردنەوە و تێپەڕاندنی ئەو رۆتینەی هەیە كە زۆرجار خەڵكی ئێمە لە دەستی ئەو رۆتینە دەناڵێنن، بەڵام ناكرێت باس لە نامەركەزیەتی دارایی بكرێت، خۆ ئەگەر ئەمە بكرێت، ئەوا كەس لە پارێزگای دهۆك سوودمەنتر نابێت، چونكە سەردەمانێك تەنیا بەهۆی دەروازەی ئیبراهیم خەلیل كوردستان بەڕێوەدەچوو، رەنگە ئێستا وانەبێت، بەڵام خۆ وا چوار دەروازەی دیكەش دەكرێنەوە. هەروەها رەنگە هیچ پارێزگایەكی دیكەش هێندەی ئێمە بە نەوت دەوڵەمەند نەبێت كە سوودمەند دەبین لە پارەی پەترۆدۆلار، بەڵام خۆ ناكرێت ئەمە وەك كاردانەوە بێت و بێین بڵێین لەبەر ئەوەی دووچاری قەیران بووین، ئیدی با كێشەكانی خۆم چارەسەر بكەم و ئاگام لە سلێمانی و گەرمیان و هەولێر و راپەڕین نەبێت. لە راستیدا ئەمە چارەسەر نییە. هەروەها مەسەلەی گۆڕینی سیستم دەبێت بە دیراسەت بێت و كەسانی پسپۆڕ كاری لەسەر بكەن و ئەم پرۆسەیە هەنگاو بە هەنگاو بێت بەرەو نامەركەزیەتێكی ئیداری و دارایی كە هەموومان قەناعەتمان پێ هەبێت و دەرئەنجامەكەش لە بەرژەوەندی خەڵك بشكێتەوە. بەڵام ئەگەر بێم و بڵێم بە نامەركەزییەت دنیا دەكەم بە شامی شەریف،بە خوا قەد بڕوا ناكەم ئەمە سەربگرێت.
* بەڵام حكومەتی هەرێمی كوردستان هێشتا زۆر لەدەسەڵاتەكانی بەمەركەزییەت بەڕێوەدەبات و نامەركەزییەت داواكاری زۆر لە یەكە ئیدارییەكانتانە، تەنانەت باس لەوە دەكرێت كە دەسەڵاتی ئەنجومەنی پارێزگای دهۆك زۆر سنووردارە؟
-با ئێمە خۆڵ نەكەین چاوی خەڵك، من ئەم قسەیە دەكەم و لێشی بەرپرسم، كە نە حكومەت و نە پەرلەمان و نە پارتە سیاسییەكانیش جددی نین لە مەسەلەی ئەنجومەنی پارێزگا و هەرگیز پشتیوانییان نەكردوون. چونكە ئەو مامەڵەیەی لەگەڵ ئەنجومەنی پارێزگا دەكرێت، بڕوا ناكەم لەگەڵ فەرمانگەیەكی بچووكی حكومیدا بكرێت، ئیدی لە رووی ئیمكانایاتەوە بێت، یان لە رووی تەقدیر و رێزەوە، تەنانەت یاساكەش سەقەتە و یاسای ئەنجومەنی پارێزگاكان پێویستی بە هەمواركردنەوە هەیە، هێشتا زۆر شت روون نین، كە دەبێت باشتر هەموار بكرێنەوە. ئێوە دەزانن بۆ پێداویستییەكانیان خەڵكی چاوی لە دەسەڵاتی جێبەجێكردنە. لەبەر ئەوە حەقە دەسەڵاتی زیاتر بە پارێزگاكان بدرێت، چونكە ئەو دەسەڵاتانەی هەن بەشی ئەوە ناكەن وەك پێویست خزمەتی خەڵكی پێ بكەن. بۆ نموونە با بێینە سەر باسی دابەشكردنی زەوی، پێموایە خەڵكی پارێزگاكە باشتر دەزانن ئەو زەوییە بۆچی بەكار بهێندرێت و بۆچی بەكار نەهێندرێت، واتە وەك عەرەب دەڵێت: «اهل مكة ادری بشعابها»، ناكرێت وەزیری شارەوانی بێت و بڵێت نابێت ئەمە بكرێت و ئەوە نەكرێت.
* ئاماژەتان بە مەسەلەی دابەشكردنی زەوی كرد، پیێمان باشە پرسیارێ ئەوە بكەین كە یەكێك لە گرفتە سەرەكییەكانی پارێزگای دهۆك كێشەی نیشتەجێبوونە، بەپێی ئەو زانیارییانەی دەستمان كەوتووە گوایە ئەنجومەنەكەتان بەرنامەیەكی بۆ چارەسەركردنی ئەو گرفتە هەیە، لەو بوارەدا چیتان كردووە؟
- لە راستیدا ئێمە بیرۆكەمان هەیە، بەڵام بە هۆی بێ بودجەییەوە بێ بەرنامەشین، چونكە ئەگەر بەرنامەش دابنێیت و نەتوانیت تەنانەت بەشێكیشی لێ جێبەجێ بكەیت، ئەوا وەك مەرەكەبی سەر كاغەز دەمێنێتەوە. دواتر ئاریشەی نیشتەجێبوون لە سەرتاسەری كوردستان و بەتایبەت لە دهۆك ئەوەیە شارەكانمان بە ئاسۆیی، نەك بە ستوونی گەشە دەكەن، تەنانەت ئەمە بۆ سەنتەری پارێزگای دهۆك راستە. دواتر ئێمە وا راهاتووین هەر كەسێك پارچە زەوییەكی هەبێت، كە من وای دەبینم دوای 10 ساڵی دیكە زۆربەی زەوییە كشتوكاڵییەكانی ئێمە بۆ مەبەستی نیشتەجێبوون تەرخان بكرێن، كە ئەواتە دابینكردنی خزمەتگوزاریش بۆیان زۆر ئەستەمە. راستە هەموو كەسێك مافی رەوای خۆیەتی یەكەی نیشتەجێبوونی هەبێت، بەڵام كاركردن لەسەر فراوانكردنی شارەكان بە شێوەیەكی ستوونی زۆر عەمەلیترە و دەبێتەهۆی ئەوەی زەوییەكی زۆرمان دەستكەوێتەوە كە زۆربەیان زەوی كشتوكاڵین.
Top