بایز تاڵەبانی وەزیری دارایی و ئابووری لەدیمانەیەكی گوڵان دا باسی لە بەرنامەو كاری داهاتووی وەزارەتەكەیان كرد، ئاماژەی بەوەدا كە ئەو پرۆژانەی بەهۆی دواكەوتنی پەسەندكردنی بودجەوە تەواو نەبووە لەساڵی نوێ جێبەجێ دەكرێت، سەبارەت بە یاسای بودجەی حزبەكان وەزیری دارایی و ئابووری گووتی: ئەو یاسایەم تاكو ئێستا نەبینیوە، هاوكات یاسای تایبەت بەكاركردن لەكەرتی تایبەت كە لەلایەن وەزارەتی كاروكاروباری كۆمەڵایەتییەوە دەرچووە سەڕەرای ئەوەی یاسایەكی باشە، بەڵام بەقورساییەكی دانا بۆ سەر بودجەی حكومەت، هاوكات پێی وابوو بەپێی پێویست كار بۆ ناوچە دابڕاوەكان نەكراوە، سەبارەت بەوەی وەزارەتەكان داواكاری و داخوازییەكی زۆریان هەیە وەزیری دارایی و ئابووری لەم دیمانەیەدا ئاماژە بەوە دەكات كە داواكارییەكانی ئوتۆمبێل و كەمالییات دڵتەنگی دەكات.



گوڵان: هەڵبەتە كاركردن لە وەزارەتێكدا كە ئابووری وڵاتەكە لە قۆناغی راگوزەركاری بێ و نەگەیشتبێتە ئابووری بازاڕ، واتە خاوەنی فەلسەفە و سیاسەتی ئابووری دیاریكراو نەبین، ئایا كاركردن لەم وەزارەتەدا، قورس نییە ؟ ئەو ئاستەنگانە چین كە دێنە پێشتان؟
بایز تاڵەبانی: لە هەرێمی كوردستان بودجە یەكلایەنەیە، ئەوەش كاریگەرییەكی یەكجار زۆری كردۆتە سەر ئابوورییەكەمان، چونكە ئێمە هەرچی داهاتمان هەبێت دەگەڕێتەوە بۆ لای حكومەتی عێراقی فیدڕاڵ جگە لە داهاتی شارەوانییەكان و كارەبا و تەندروستی نەبێت كە بۆ خۆیان دەگەڕێتەوە، هەرچی داهاتێكی تر هەبێت وەكو باجەكان و گومرك و... تاد، ئەوەی دەردەكەوێت و وەسڵی پێی بڕاوە و بێگومان هەموو داهاتێكیش وەسڵی بۆ دەبڕدرێت و لە كۆتاییدا مقاسەیەكی پێدەكرێت لەوێوە لێمان دەبڕن، ئەمەش دەبێتە هۆی ئەوەی بڵێین بودجەمان یەكلایەنەیە كە بودجەش یەكلایەنە بوو مانای وایە كارەكانی ئێمە سنووردارە، ئەمەش كاریگەرییەكی گەورەی كردۆتە سەر بارودۆخی ئابووری هەرێمی كوردستان، كە نەتوانین داهاتەكانی خۆمان بە تەواوی وەربگرینەوە و بۆ ئەوەی ئیش و كاری وەزارەتی دارایی و ئابووری خۆمان پتر پەرەبستێنی و هەنگاوی زۆرتر و باشتر بنێین و ئەو بودجەیەی لە بەغداوەش بۆمان دێت سنووردارە و دابەشی سەر(12) مانگی دەكرێت و ئەمەش هەموو جارێك بەسێ جار دەگاتە دەستی ئێمە، سەرەڕای ئەمانەش ئێستاكە ئەو وەزارەتانەی كە پێوەندییان بە ژێرخانی ئابووری و خزمەتگوزاریەوەیە لە ئیشكردنی خۆیان بەردەوامن، هەر بۆ نموونە لە بواری كشتوكاڵەوە هەنگاوی باشمان هاویشتووە، بانكی كشتوكاڵی كراوەتە و قەرز بە جووتیاران دەدات، هەروەها لە بواری پیشەسازییەوە بانكی پیشەسازی كراوەتەوە و سلفە بە پیشەسازیكاران دەدەن، بانكی خانووبەرەو و سندووقی نیشتەجێبوون بۆ چارەسەركردنی كێشەی نیشتەجێیبوون و ئاوەدانكردنەوەی گوندەكان رۆڵێكی كاریگەر و بەرچاویان هەیە، پارەیەكی یەكجار زۆر بۆ بواری نیشتەجێكردن خەرجكراوە و لەسەر ئاستی عێراقیشدا تا ئێستا كاری لەمجۆرە نەبووە.
ئەو پرۆژانەی كە تەواویش نابێت بۆ ساڵی داهاتوو لە جێبەجێكردنیان بەردەوام دەبن و پارەی تەرخانكراوی پرۆژەكانیش پارێزراو دەبێت
گوڵان: بە هۆی دواكەوتنی پەسەندكردنی بودجەی ساڵی(2010)، هەڵبەتە پارە و داهاتێكی زۆر ماوەتەوە لە پرۆژانەی كە ئەنجام نەدراوە، ئایا ئەو پارە و بودجانە چی بەسەردێت یان لە پرۆژەكان خەرج دەكرێت، دواكەوتنی پەسەندكردنی بودجەكە چ كێشە و گرفتێكی بۆ ئێوە دروست كردووە؟
بایز تاڵەبانی: هەموو ساڵێك بودجەی ئێمە دوا دەكەوێت، چونكە سیستەمی پەرلەمانی كوردستان ئاوایە دەبێ بودجە لە مانگی تشرینی یەكەمەوە بڕوات، بەڵام بەدەستی ئێمە نییە، لەبەر ئەوەی تا ئێستا بە فەرمی بودجەی كوردستان وەكو ژمارەیەك بە ئێمە نەدراوە بەتایبەتی ئەمساڵیش، لەم رۆژانە لە تەلەفزیۆنێ گوێم لێی بوو وەزیری دارایی عێراق دەڵێ ئێستاكە بودجە دەنێرینە ئەنجوومەنی وەزیران، بەلای كەمەوە بودجەكە لە ئەنجوومەنی وەزیرانی عێراق دەربچێت بەرچاو ڕوونییەك بۆ ئێمە دیار دەبێت كە ئێمە چۆن كار لەسەر بودجەكەمان بكەین، گەرچی لابەلا ژمارەیەكمان لە بودجەكە وەرگرتووە لەسەر ئەم ژمارەیە كاری بودجەمان تەواوكردووە لەم هەفتەیەدا ڕەوانەی ئەنجوومەنی وەزیرانی هەرێمی كوردستان دەكرێت و لە پاشان دەچێتە پەرلەمان، هەر دواكەوتنی بودجەیە بۆتە هۆكاری دواكەوتنی پرۆژەكانمان سەرەڕای ئەم دواكەوتنەش وەزارەتی پلاندانانی خۆمان لەگەڵ وەزارەتەكانی تر كاری باشیان ئەنجامداوە و ئەم پڕۆژانەی پێویستن و ئەولەویەتیان هەیە لەلایەن وەزارەتی پلاندانانەوە دابەشی سەر وەزارەتەكان كراوە و ئێستا كە وەزارەتی دارایی تەمویلیان دەكات و ئەو پرۆژانەی كە تەواویش نابێت و لە ساڵی داهاتوو لە جێبەجێكردنیان بەردەوام دەبن و پارەی تەرخانكراوی پرۆژەكانیش پارێزراو دەبێت.
هەر چەندەی لە پەرلەمان گفتوگۆ لەسەر بودجە بكرێت باشە بۆ ئەوەی بودجەیەكی تەواو و رێكوپێك دەربكەوێت
گوڵان: پێشبینی ئەوە دەكەیت ئەمساڵیش بودجە بكەوێتە بەر ململانێیەكی سیاسی لە ناو پەرلەمانی كوردستاندا؟
بایز تاڵەبانی: باسەرەتا باسی عێراق بكەین، ئەگەر پەرلەمانی عێراق بەم شێوەیە بێت و حكومەت تا ئێستا پێكنەهێنراوە و ئایا حكومەتی كۆن بڕیار لەسەر بودجەكە دەدات یان چاوەڕوانی حكومەتی نوێ دەكەین، نازانین، ئەگەر حكومەتی ئێستا بڕیاری لەسەر بدات و پەرلەمان دابنیشێت ئەوە زووتر بودجەكە بڕیاری لەسەر دەدرێت و پەسەند دەكرێت، بەڵام وەكو بارودۆخەكەی عێراق دەبینین كە دەكەوێتە ناو ململانێ، خۆی بودجە خەمڵاندنە دیارە بەپێی كار و ئاڕاستەی حكومەت دادەنرێت و دەینێرێت بۆ ئەنجوومەنی وەزیران و ئەنجوومەنی وەزیران زیاتر بۆچوونەكانی خۆی لەسەر دەردەبڕێت و لە هەر شوێنێك هەڵەیەك هەبێـت یان بۆچوونی تری لەسەر بابەتێكی دیاریكراو هەبێت ئەوا دەگێڕدرێتەوە و ئەو هەڵەیە و بابەت و بۆچوونانە چاك دەكرێنەوە و دەچێـتەوە ئەنجوومەنی وەزیران و لە پاشان ئەوان پەسەندی دەكەن و دەچێتەوە پەرلەمانی كوردستان و هەر چەندەی لە پەرلەمان گفتوگۆی لەسەر بكرێت باشە بۆ ئەوەی بودجەیەكی تەواو و رێكوپێك دەركەوێت.
یاسای بودجەی حزبەكان دراوە بە حكومەت، بەڵام من تا ئێستا زۆر زانیاریم لەسەر ئەم یاسایە نییە
گوڵان: پرۆژەی یاسای بودجەی حزبەكان كە ئێستا لە پەرلەمان وتووێژی لەسەر دەكرێت تا چەند ئاگاداری ئەم بودجەیەن، ئایا لەو بودجەیە رەچاوی ژمارەی ئەندامانی حزب و مێژوو كراوە یا تەنیا باس لە ژمارەی وردەكاریەكەی كورسی پەرلەمانی دەكرێت، ئایا راوبۆچوونی ئێوە وەكو وەزارەتی دارایی وەرگیراوە و چییە؟
بایز تاڵەبانی: یاسای بودجەی حزبەكان تا ئێستا من نەم دیتووە، بەڵام دراوە بە حكومەت و ئەگەر درا بە پەرلەمان ئومێدەوارم بە زووترین كات دەربچێت بۆ ئەوەی یاسایەكە بێـتە مەیدانی كارپێكردنەوە، تاوەكو میزانیەكەی خۆمان بە گوێرەی حزب و رێكخراوەكان و لەسەر ئەوبنەمایە رێك بخەین، لە راستیدا من تا ئێستا زۆر زانیاریم لەسەر ئەم یاسایە نییە.
پرۆژە لەلای ئێمە باشتر رادەگەیەنرێت و باشتریش جێبەجێ دەكرێت هەر بۆیە ئەو پارەیەی بۆ وەبەرهێنان دادەنرێت بەشی ئێمە ناكات
گوڵان: ئەمساڵ وەزارەتەكان پلان و بەرنامەی زۆریان هەبوو بۆ پرۆژەكان، بەڵام كاتێك بودجەیان بۆ دەرچوو هەموو رایانگەیاند لەبەر كەمی بودجەكەیان تەنیا لە (10%)ی پرۆژەكانیان بۆ ئەنجام دەدرێت، بۆچی خەمڵاندنی وەزارەتەكان لەگەڵ ئێوەدا ئەو كەلێنە گەورەیەی تێدایە؟
بایز تاڵەبانی: دیارە بودجە لە دوو بەش پێكدێت، بودجەیەكی بەگەڕخستن و بودجەیەكیش وەبەرهێنانە، بودجە خۆی لە بنەڕەتەوە كە لەبەغداوە دێت دیاریكراوە بڕی بودجەی بەگەڕخستن ئەوەندەیە و وەبەرهێنانیش ئەوەندەیە.
بێگومان مووچە ئیفلیج بوون دەخاتە سەر بودجەی بەگەڕخستن(تەشغیلی)،، چونكە ئاستی مووچە یەكجار زۆرە، ئەو بودجەیەش ئەوەندە نییە یان ئیمكانیاتی ئەوەی تێدانییە هەڵیبگریت و بیخەیتە سەر بودجەكەی وەبەرهێنان، چونكە بودجەی وەبەرهێنان بە ئاسایی خۆی زۆر بە كەمتر دێت لە بودجەی بەگەڕخستن، لەلای ئێمەش وەكو عێراق نییە، ئەمن و ئاسایش هەیە و پاڵنەر و داخوازی ئێمەش زۆرە و وێرانكاری و كارەساتەكانی بەسەر كوردستانیش داهاتووە زۆر زیاتر و گەورەترە، لەبەر ئەوە پرۆژە لەلای ئێمە باشتر رادەگەیەنرێت و باشتریش جێبەجێ دەكرێت هەر بۆیە ئەو پارەیەی بۆ وەبەرهێنان دادەنرێت بەشی ئێمە ناكات ..
بێگومان ئەو یاسایەی لە وەزارەتی كاروكاروباری كۆمەڵایەتی دەرچووە، ئەمە قورساییە بۆ سەر بودجەی بەگەڕخستن
گوڵان: وەزارەتی كاروكاروباری كۆمەڵایەتی یاسایەكی دەركردوە بۆ ئەوەی هەر كەسێك لە كەرتی تایبەت كاربكات بڕە پارەیەكی بدرێتێ ئایا ئەمە تا چەند بودجەی بەگەڕخستنی قورس كردووە؟
بایز تاڵەبانی: ئەم بڕە پارەیەی بۆ ئەم یاسایە دیاریكراوە لەسەر بودجەی بەگەڕخستنە، بەڵام ئێمە حیسابی ئەوەشمان كردووە و لە كاتی دەرچوونی ئەو بڕیار و یاسایانە پرس بە وەزارەتی دارایی و ئابووری كراوە و ئاگادارین و بڕیار و رای خۆشمان داوە بۆ جێبەجێكردنی، بێگومان ئەمە قورساییە لەسەر بودجەی بە گەڕخستن، بەڵام كارێكی ئەوەندە پیرۆز و گرنگە لە پێناوی دۆزینەوەی هەلی كار بۆ گەنج و بێكاران بۆیە پەسەندمان كردووە و حیسابیشی بۆ كراوە.
یاسای وەزارەتی دارایی و ئابووری دەرچووە كە یاسای ژمارەی(115) بەپێی ئەو یاسایە یەك وەزارەتی دارایی هەیە
گوڵان: مەسەلەی سیستەمی دوو ئیدارەیی كە پێشتر هەبوو، ئایا تا ئێستا چ هەنگاوتان ناوە بۆ ئەوەی دوو ئیدارەكە یەكتر بگرێتەوە؟
بایز تاڵەبانی: یاسای وەزارەتی دارایی و ئابووری دەرچووە كە یاسای ژمارەی(115) بەپێی ئەو یاسایە یەك وەزارەتی دارایی هەیە، یەك وەزیر و یەك بریكاری وەزیرە و بەڕێوەبەرایەتییە گشتییەكانی دەست نیشان كردووە و چوار راوێژكاری هەیە و هەندێ بەڕێوەبەرایەتی گشتی هەبوو نەماوە و هەندێكی دیكە تازە دانراوە جاران لە كۆندا نەبوون، ئێستا ئێمە لەم قۆناغەداین بەپێی بڕیار و یاساكەی پەرلەمان دەبێ سیستەمێك دابنێین و سیستەمەكەش لەلای ئێمە تەواوبووە لە هەفتەی رابردوو چۆتە ئەنجوومەنی وەزیران و بەپێی یاساكە ئەو سیستەمە شیدەكاتەوە كە وەزارەتی دارایی و ئابووری لەچی پێكدێت و هەیكەلی وەزارەتەكەمان بە ڕێكوپێكی داناوە و چاوەڕوانی وەڵامدانەوەی ئەنجوومەنی وەزیران دەكەین وبۆئەوەی دەست نیشانی بەڕێوەبەرەگشتیەكان لەسەر بنەمای بەڕێوەبەرایەتیەگشتیە تازەكان بكەین، ئینجا ئێمەش لەسەری دەستبەكاردەبین .
ئەگەر لە عێراقی فیدڕاڵ مووچەی خانەنشینی زیادی كرد ئەوە ئێمەش زیادی دەكەین
گوڵان: لێرەو لەوێ دەنگۆی ئەوە هەیە لەتەمەنی كەمترلە (63)ساڵ مووچەخۆران خانەنشین دەكرێت ئەمە چۆنە و ئایا بڕیاری زیادكردنی مووچەی خانەنشینی هەیە ؟
بایز تاڵەبانی: تا ئێستا هیچ بڕیارێكی وامان بۆنەهاتووە كە لە خانەنشینی كەم بكەینەوە یان زیاد بكەین، بۆمووچەی خانەنشینان و مووچە بەگشتی بڕیاری پەرلەمان هەیە دەبێ ئێمە وەكو بەغدا سەرفی بكەین، ئەگەر لە عێراقی فیدڕاڵ مووچەی خانەنشینی زیادی كرد، ئەوە ئێمەش زیادی دەكەین، ئەگەر ئەوان كەمی بكەن بۆی هەیە ئێمە دەستكاری نەكەین.
لەساڵی ئایندەش پێشینەی خانووبەرە هەر وەكو خۆی دەمێنێتەوە
گوڵان: لە ساڵی نوێ دا پرۆژەتان بۆ بەردەوامبوونی پێشینەی خانووبەرە چییە، ئایا وەكو خۆی دەمێنێتەوە؟
بایز تاڵەبانی: پێشینەی خانووبەرە هەر وەكو خۆی دەمێنێت، خۆزگە ئیمكانیاتمان هەبووایە و زیاترمان بكردبووایە، هەر چەندە لە ماوەی رابردوو بڕە پارەیەكی زۆرمان بۆ پێشینەی خانووبەرە سەرفكردووە و ئێستا كە گوندەكانیش دەتوانن لەم پێشینەیە سوودمەند بن و پێشتریش پێشینەی خانووبەرە دەدرا، بەڵام بۆ باشتركردنی بڕی(90) ملیارد دیناریش زیادكرا، بەڵام لەو ئاستەش رانەوەستاوە، بەڵكو تا ئێستا بڕی(400) ملیارد دینار وەكو پێشینەی خانووبەرە بە هاووڵاتیان دراوە، چونكە ئەنجوومەنی وەزیران بڕیارێكی تری دا، تاوەكو لە پێدانی پێشینەی خانووبەرە بەردەوام بین، بۆیە ئەو پارەیەی خۆمان دامان نابوو و ئەو بڕە پارەیەی بۆ باشتركردنی لە لایەن پەرلەمانەوە دانرا بوو هەر هەمووی سەرفكرا تا گەیشتە ئەو ئاستەی كە بووە(400) ملیارد دینار و هاووڵاتیان زۆر سوودیان لێ وەرگرتووە رۆژ لە دوای رۆژ خەڵكەكە پتر رووی تێدەكات، بەتایبەتی لەبەر ئەوەش كە زیادەی ناخرێتە سەر و بە ماوەیەكی درێژخایەنیش دەدرێتەوە و ئەمە لە هیچ وڵاتێكدا ئاوا نییە تا ڕادەیەكی وا لە عێراقیش ئەمە نییە.
خانەقین و كەركووك و شەنگال و هەموو ناوچە دابڕاوەكانی دیكەش شاری كوردستانن و كار و پڕۆژەمان بۆیان ئەنجام داوە
گوڵان: گلەیی و گازاندەی ئەوە لە شارێكی وەكو خانەقین وكەركوك هەیە كە دەڵێن حكومەتی كوردستان هیچ بودجەیەكی بۆ تەرخان نەكردووین، جەنابتان چ لێكدانەوەیەكتان بۆ ئەمە هەیە؟
بایز تاڵەبانی: خانەقین و كەركووك و شەنگال و هەموو ناوچە دابڕاوەكانی دیكەش شاری خۆمانن و كوردستانە و بەپێچەوانەوە ئێمە وەكو حكومەتی كوردستان كارو ئیشی باشمان بۆ ئەم ناوچانەكردووە، بەڵام بەپێی پێویست نەبووە و ئەوەی كردوومانە واجبە و مافی خۆیانە، بەڵكو پێویست بەوە دەكات دە هەندەیان بۆ بكرێت، بەڵام ئەوانە بودجەكەیان لە حكومەتی بەغدایە ئەوانیش بەپێی پێویست كاریان بۆ ناكەن، بەڵام حكومەتی كوردستان ئاراستەی ئاوایە ئەوەی لە توانا و ئیمكانیات هەبێت بۆیان بكەین و ئێمە ساڵانە و لە داهاتووش كار و پرۆژەی دیار و باشمان هەبووە بۆ ناوچە دابڕاوەكانمان و بۆ نموونە چەندەها فەرمانبەرمان لە خانەقین و كەركووك و شارەكانی دیكە هەیە كە مووچە لە حكومەتی كوردستان وەردەگرن، هەروەها چەندین پرۆژەی وەكو ئاو و كارەبا و بەنداو رێگاوبان،.. تاد.
لەسەر بودجەی حكومەتی هەرێمی كوردستان بۆ ئەم ناوچانە ئەنجام دراوە، تەنیا لە سنووری شاری كەركووكدا پتر لە (55) گوند لەسەر بودجەی حكومەتی كوردستان ئاوەدان و تازەكرانەوە، هەروەها ئەو فەرمانبەرانەی لەم شارانە تەنسیب كراون تا ئێستاش حكومەتی عێراق ئامادە نییە (10) دینار مووچەیان پێبدات، بەڵكو ئێستاش مووچەكانیان هەر لە كوردستان وەردەگیرێت و هەر ئەمساڵ بۆ مامۆستایانی ئەم شارانە و بۆ باشتر كردنی گوزەرانیان لە پلەی وەزیفیدا پلەی تایبەتمان بۆیان داناوە و ئەمەش لە میلاكدا تۆماركراوە، ئەوەی بۆ ئەوانمان كردووە زۆر كەمە، ئەگەر ئیمكانیات هەبووایە هەزار ئەوەندەمان بۆیان دەكرد، چونكە ئەم ناوچانە هەقی خۆیانە زۆر دەردەسەری و مەرگەساتیان دیتووە و زۆر خراپیان لێقەوماوە هەرچی بۆیان بكەین هەر كەمە.
بانكەكانی حكومەتی كوردستان متمانەیەكی زۆریان لە لایەن خەڵكەوە پەیداكردوە
گوڵان: بانكەكانی ئەهلی لە كوردستاندا بەشێوەیەكی نایاسایی و دوور لە رێنمایی قەرز بە هاووڵاتییان دەدەن بەتایبەتی ئەو زیادەیەی كە دەخرێـتە سەری زۆرە و ماوەی قەرزەكانیش درێژخایەن نییە بۆ ماوەیەكی كورتە گەرچی لە جیهاندا بە گشتی پارەدانان لە بانك قازانجی(10%)ە و لە كوردستان(6%)ە، تاكەی بانكە ئەهلییەكان سەرقاڵی كاری لاوەكی دەبن و ئایا بیرتان لەوە كردۆتەوە سیستەمی بانكەكان بگۆڕن یان چاوخشاندنەوەیەكیان لە بارەوە بكەن؟
بایز تاڵەبانی: لەسەرەتای وەڵامی ئەم پرسیارەدا با باسی بانكی حكومی خۆمان بكەم ئێستاكە هاووڵاتیان بەبێ حیساب روویان تێكردووە و بانكەكانمان متمانەیەكی زۆریان لە لایەن خەڵكەوە پەیداكردوە و دانانی پارە لە بانكەحكومیەكان لە ئاستێكدایە ژمارەكان زۆر بۆ سەرەوەیە، بەڵام لە بارەی بانكە ئەهلییەكانەوە تەنیا لیژنەیەك هەیە لەسەر ئاستی بانكی ناوەندی بەغدایە و (پارێزگاری بانك) لیژنەی تایبەتیان هەیە و مۆڵەت دەدەن بەوبانكانە و چاودێری كارەكانیشیان دەكەن و لە كوردستانیشە دوو بانك هەیە لقی ئەو بانكەن لە هەولێر و لە سلێمانی و ئەم دوو بانكە لیژنەیان هەیە بۆ چاودێریكردنیان و دیارە ئەو بانكانە هەندێكیان تووشی شكست هاتن ئێستا كە لە رێگای بانكی ناوەندی حكومەتی عێراقی و لقی كوردستان دەیانەوێت هەندێك كێشە و گرفتەكانیان كەم بكەنەوە و، داواكارم بانكە ئەهلییەكان پتر سەرپەرشتیاریان هەبێت و خۆیان كۆمەڵەیەكیان هەبێت بۆ ئەوەی زیاتر لە یەكتر بگەن و پتر پێوەندییان هەبێت و ئێمەش وەكو حكومەت پتر بتوانین سەرپەرشتیار بكەین.
هەر كەسێك لە كەرتی تایبەت كاربكات زەمانی هەیە، زەمانەتەكەش خاوەن كار(8%) و حكومەتیش (4%)ی بۆ دەدات
گوڵان: ساڵانە رێژەیەكی زۆر دەرچووانی زانكۆ و پەیمانگا و قۆناغەكانی ئامادەییمان دەبێت، هەموو ئەمانەش هەوڵدەدەن لە كەرتی گشتی لە حكومەت دابمەزرێن ئێوە چ بەرنامە و پلانێكتان بۆ ئەمانە هەیە، ئایا دەتوانن هەموو ئەمانە دابمەزرێنن و بودجەی بەگەڕخستن توانای ئەو هەموو دامەزراندنەی ئەمانەی هەیە؟
بایز تاڵەبانی: ئەگەر هەموو ئەو دەرچووانە لە كەرتی گشتی لە حكومەت دابمەزرێنین ئەوە بێگومان هەموو بودجەكەی بەگەڕخستن لە 100% دەبێـتە مووچە، بۆیە دەبێ بیر لە كاری دیكە بكەینەوە بۆ ئەو مەبەستەش حكومەتی كوردستان بیری لە دامەزراندنی دەرچووان و بێكاران كردەوە لە ناو كەرتی تایبەت و هەندێك هەنگاویشی ناوە، ئەمەش ئەوەیە هەر كەسێك بیەوێت لە كەرتی تایبەت كار بكات حكومەت تا(150) هەزاری پێدەدات، سەرەڕای ئەوەش یاسای زەمان بۆ فەرمانبەرانی كەرتی تایبەتیش دانراوە كە پێشتر خاوەن كار(12%) و فەرمانبەرەكەش (5%) ی دەدا، بەڵام ئێستا كە بۆ هەموو كەسێكە لە هەر شوێنێكی كەرتی تایبەت كاربكات و زەمانەتەكەش خاوەن كار(8%) و حكومەتیش (4%) بۆ دەدات و ئەمانەش پاڵپشتی و هاوكاركردنە بۆ كەرتی تایبەت و بۆ ئەو كەسەش كە كاریان لەلا دەكات و ئەمە تا ڕادەیەك چارەسەرێكە بۆ دەرچووانی زانكۆ و پەیمانگە و هەر كەسێكی بیكاربێـت، لەلایەكی دیكە خەڵكانی خۆمان كە لە زانكۆ یان پەیمانگا یان لە ئامادەییەكان دەردەچن و دەیانەوێت دابمەزرێن ئەوە ئەركی ئێمەیە و لەسەرمان پێویستە دایانبمەزرێنین و كاریان بۆ بدۆزینەوە.
گوڵان: نادادپەروەری لە سیستەمی مووچەكاندا هەیە و كەلێنێكی گەورە لە نێوان مووچە نزمەكان و مووچە تایبەتیەكان هەیە، ئایا هیچ بەرنامەیەك لەبەر دەستدا هەیە بۆ پێداچوونەوە بە سیستەمی مووچە؟
بایز تاڵەبانی: حەز دەكەم بە ئەمانەتەوە باسی ئەوە بكەم لە راستیدا مووچە لە بەغدا چۆنە لەلای خۆشمان بە هەمان شێوەیە جگە لە پەرلەمانتار و وەزیر، ئەو مووچەیەی كە وەزیری و پەرلەمانتار لە كوردستان وەری دەگرن كەمترە و نیوەی ئەو موچەیە نییە كە وەزیر و پەرلەمانتار لە بەغدا وەری دەگرن .
حساب بۆ نەوت كراوەتەوەو فعلەن حیسابەكەش پارەی هاتۆتەناوێ
گوڵان: تا چەند داهاتی پیترۆڵ لە پرۆژەكانی خزمەتگوزاری خەرج دەكرێـت و داهاتی پیترۆڵ گەڕاوەتەوە بۆ حكومەتی هەرێمی كوردستان، ئایا ئەو داهاتە چەندە؟
بایز تاڵەبانی: دیارە بە نیسبەت نەوتەوە پەرلەمان لە یاساكەی خۆیدا داوای كردووە ئەمساڵ لە چەند ماددەیەكی یاساكەیدا چەندحسابێك بۆ وەزارەتی نەوت بكرێـتەوە و وەزارەتی نەوت حیسابەكانی كردۆتەوە و ئێستا لە وەزارەتی داراییە، ئەوەی هاتووە و زانراوە لە حیسابێكیانەوە پارەی هاتۆتە ناوێ و لەم حیسابەش ئاگاداری پەرلەمان كراوەتەوە و پرۆژەكانیش بەقەدەر ئەو پارەیە پێشكەش بە پەرلەمان كراوە و ئێستا كە لە پەرلەمانە بۆ ئەوەی پەسەند بكرێن، بێگومان ئەوەی لە یاسای بودجەی ئەمساڵی رابردوو (2010)ە هاتووە بۆكردنەوەی حیساب بۆ ئەوەی پارەی نەوت بێتە ناوئەو حیسابە فعلەن ئەو حیسابەكراوەتەوە.
بە هیچ شێوەیەك نەمان هێشتووە نەخۆشخانەكانمان لەسەر داو دەرمان یان هەر پێداویستییەكی دیكە بێت كاریان بوەستێت
گوڵان: پێت وانییە بواری تەندروستی بودجەیەكی كەمی بۆ دانراوە بەرامبەر بەو هەموو نەخۆشانەی كە ئێستا لە كوردستان هەیە، بەتایبەتی نەخۆشی شێرپەنجە تەنیا لە مانگێكدا لە سلێمانی 2200 كەس تووشبووە و ڕەوانەی نەخۆشخانەی هیوا كراون و لەشارەكانی دیكەی كوردستانیش ئەم نەخۆشیانە زۆرە ؟
بایز تاڵەبانی: ئەگەر ئەمجۆرە میزانیانە كەم بێت لەلای خۆمانەوە دەمودەست لە بودجەی یەدەگ یان لە بودجەی تر بۆیان زیاد دەكەین، ئەگەر سەردانی نەخۆشخانەی هیوا لە سلێمانی یان ئەوەی هەولێر بە هەمان شێوە بكەین،دەبینین خەڵكێكی زۆریان لێیە تووشی نەخۆشی شێرپەنجەبوون، ئەم جۆرە نەخۆشیەش پێویستی بە جورحەیەك هەیە لەلای خۆمان پێی دەڵێن كیمیاوی،ئەم جورحانە بۆ هەر نەخۆشێك بۆ یەك وەجبە نزیكەی (5) هەزار دۆلاری تێدەچێ،ئەمەش لەسەر حكومەتە و بۆیان دابین دەكات و بە هیچ شێوەیەك نەمان هێشتووە نەخۆشخانەكانمان بوەستێت لەسەر داو دەرمان یان هەر پێداویستییەكی دیكە بێت و هەر كاتێك پێویستیان بە پارە هەبێت بۆیان ئامادە دەكەین و هاوكاریان دەكەین.
لە بواری تەندروستیش بنكە و تاقیگە لە خاڵە سنوورییەكان هەیە كە پشكنینی تایبەت بەداو دەرمان ئەنجام دەدەن
گوڵان: لێرە و لەوێ دەبینین بڕێكی زۆر كاڵا و شمەك و داو دەرمانی ئێكسپایەر دێتە بازاڕەكانی كوردستان، تا چەند ناوچە سنووریەكان و دەروازەكان توانراوە كۆنترۆل بكرێت، ئایا ئەمە لەدەست ئێوەیە یان هەما هەنگیتان لەگەڵ وەزارەتە و لایەنە پێوەنددارەكان هەیە؟
بایز تاڵەبانی: دیارە لە هەموو دەروازە سنوورییەكان ئێستاكە تاقیگەی تایبەتی هەیە و پشكنینی تایبەتی بۆ كاڵا و شمەكەكان ئەنجام دەدەن هەر بابەتێكی خراپ و بەسەرچوو ببینین و لە پشكنین دەرنەچێت ناهێڵن بێتە كوردستان و لە بواری تەندروستیش بنكەیان لە خاڵە سنوورییەكان هەیە كە پشكنینی تایبەت بەداو دەرمان و پێداویستی پزیشكی ئەنجام دەدەن و بەبێ ئەم بنكانە داودەرمان و كەلوپەلەكانی دیكەی پزیشكی نایەنە كوردستان.
دانانی مەرج و چەسپاندنی ڕێنمایی لەسەر كۆمپانیاكانی هێنانی ئۆتۆمبێل پێوەندی بە وەزارەتی بازرگانی و پیشەسازییەوە هەیە
گوڵان: ماوەیەك لەمەوبەر هاوردەكردنی ئۆتۆمبێل سنوورداركرا، بەڕادەیەك رێگا لە هاتنە ناوەوەی ئۆتۆمبێلی مۆدیلی 2008 بەخوارەوە نادرێت؟ ئایا ئێوە بەنیازنین كۆمپانیاكانی هێنانی ئۆتۆمبێل پابەندی هەندێك ڕێنمایی گشتی بكەن وەكو نرخ و بەرپرسیارێتی لە نەبوونی مواسەفات و هێنانی یەدەگ؟
بایز تاڵەبانی: بوونی ئەم هەموو ئۆتۆمبێلە لە كوردستان مانای ئەوەیە كە خەڵكەكەی ئێمە بارودۆخی دارایی و ماددی باشە و تا ئاستێكی ئاوایە شەقام و رێگا و بانەكانی كوردستان توانای ئەو هەموو ئۆتۆمبێلەیان نەماوە، هەر بۆیە ئەو بڕیارەماندا كە ئۆتۆمبێلی لە خوارەوەی مۆدیل 2008 نەهێتە بازاڕەكانی كوردستان و بەنیازین بۆ ئەمساڵیش بە هەمان شێوە ئۆتۆمبێل بێـتە كوردستان، دانانی مەرج و چەسپاندنی ڕێنمایی لەسەر كۆمپانیاكانی هێنانی ئۆتۆمبێل پێوەندی بە وەزارەتی بازرگانی و پیشەسازییەوە هەیە و ئەوانیش مەرج و ڕێنماییان لەسەر هێنانی ئۆتۆمبێل داناوە.
لابردنی سفرەكانی سەر دراو تەنیا بۆی هەیە ئاڵۆگۆڕی پارەكە ئاسانتر بكات
گوڵان: تا چەند لابردنی سفرەكانی سەر دراو لەبەرژەوەندی خەڵكی عێراق و كوردستانە و ئایا پرۆژەی ئاوا هەیە؟
بایز تاڵەبانی: تا ئێستاكە دووجار بەڕێوەبەری بانكی ئێمەیان بۆ كۆبوونەوە لە بەغدابانگ كردووە، بەڵام نەگەیشتوونەتە هیچ دەرەنجامێك، من بەڕاوبووچوونی خۆم لابردنی سفرەكان كاریگەری لەسەر بەرژەوەندی خەڵك نابێت، تەنیا بۆی هەیە ئاڵۆگۆڕی پارەكە ئاسانتر بكرێت، بەڵام لە ئایندەدا بۆی هەیە كاریگەری دروست بكات، وەكو وتم بۆ ئەمڕۆ كاریگەری نابێت.
دەزگای وەبەرهێنان كار و ئیشێكی یەكجار زۆری كردووە و پارەی وەبەرهێنەری هێناوەتە كوردستان
گوڵان: وەكو وەزیرێك تا چەند لە كارەكانی دەزگای وەبەرهێنان رازیت، بەتایبەتی وەبەرهێنان بەرەو بەڵێندەرایەتی و بازرگانی چووە نەك بەرەو بواری بەرهەمهێنان.
بایز تاڵەبانی: دەزگای وەبەرهێنان كار و ئیشێكی یەكجار زۆری كردووە و من یەكێكم لە لیژنەی باڵای ئەم دەزگایە كارەكانیشیان بواری جۆراو جۆر و باشی گرتۆتەوە و پارەی وەبەرهێنەریش دەهێنە ناو كوردستان، جگە لە سندوقی نیشتەجێكردن نەبێت ئێمە وەكو وەزارەتی دارایی هیچ جۆرە پارەیەكمان نەداوە بە دەزگای وەبەرهێنان.
هەندێ كارو داواكاری وەزارەتەكان ماندوو و سەخڵەتم دەكات
گوڵان: لە كاری چ وەزارەتێك ماندوویت، چونكە زۆرجار سستی بەڕێوەچوونی پرۆەژكانی كوردستان ئۆباڵی دەخرێتە سەر رۆتینەكانی وەزارەتی دارایی لە پێدانی سولفە و خێرا رایی نەكردنی كاری ئیداری؟
بایز تاڵەبانی: وەزارەتەكان كارەكانیان ماندووم ناكات، بە تەئكید لە هەر كۆبوونەوەیەك بێت لە ئاستی وەزارەتەكان یان بەڕێوەبەرە گشتییەكان بێت هەموویان گلەییان لە وەزارەتی دارایی هەیە، دیارە وەزارەتی دارایش ئەو ئیمكانیاتەی لەبەردەستیدایە لەسەر ئەو بنەمایە كاری بۆ دەكات، وەزارەتی دارایی ژمارەیەكە و هەموو وەزارەتەكان تموحی خۆیان هەیە و دەیانەوێت خزمەتی باش پێشكەش بكەن كە دێتە سەر مەسەلەی ئەوەی كە ئیمكانیاتەكەی بچێتە سەر وەزارەتەكەی و بچێتە بەردەستی دەبینی وەزارەتی دارایی ئەو تەمویلەی وەكو پێویست ناداتێ، چونكە وەزارەتی دارایی ئەو بڕە پارەی نییە و بڕی بودجەی كە لە عێراق بۆمان دانراوە هەر هەمووی بە یەكجار بۆمان نانێرێت، بەڵكو دابەشی سەر(12) مانگی دەكات ئەمەش بەسێ جار دەنێرێت واتە میزانیەكەی كوردستان بە(36) جار لە بەغداوە دێت، لە پاشان ئەو ئیمكانیاتە نییە ئەوەی هەر وەزارەتێك دەیەوێت بۆی دابین بكەین، لەبەر ئەوە بە تەئكید گلەیی دەكەن، من دەڵێم گلەییەكان لە شوێنی خۆیدایە،گەرچی زۆر جار لە كۆبوونەوەكانی ئەنجومەنی وەزیران دەڵێم داواكارم هەموو وەزیرێك یەك مانگ ببێتە وەزیری دارایی بۆ ئەوەی بزانێ بارودۆخی وەزارەتەكە چۆنە، چونكە بودجەكەمان سنووردارە كە دێتـە سەر ئەوە و بۆ ئەوەی باشترین پرۆژە پێشكەش بكەیت و خزمەتی وڵاتەكەت بكەی دەبینی بودجە كەمە یان نییە لەو كاتەدا دەڵێن كێشەكە وەزارەتی دارایی دروستی دەكات، من لە كارو ئیشی وەزارەتەكان نامورتاح نیم، بەڵام هەندێ جار وەزارەتە خزمەتگوزارییەكان داوای شتێك دەكەن جێبەجێ ناكرێت، بۆ نموونە من دەتوانم رەحلە و دەفتەر و پەرتووك بۆ پەروەردە ڕابگرم؟ نەخێر ناتوانم .
دەتوانم داودەرمان رابگرم؟ نەخێر ناكرێت، جاری وا هەیە داودەرمان نییە دەبێ لەسێ چوار لاوە پارە پەیدا بكەم تاوەكو داودەرمانەكە بكڕین و بێنین،ئەم كارانە زۆرماندوو و سەخڵەتەم دەكات، كاروپرۆژە خزمەتگوزارییەكانی شارەوانی و تەندروستی و كارەبا و ئاو پەروەردە.. تاد، ئەوانەمان نەڕاگرتووە و نەڕاشی دەگرین، بەڵام وەكو باسمكرد و ئیمكانیاتەكە دیاریكراو سنووردارە .
هەموو ساڵێك هەقی خۆمانە بودجەی وەزارەتی پێشمەرگە لە بەغدا وەربگرین و سەرفی بكەین، بەڵام ئەمە ناكەن و بودجەكەمان نادەنێ
گوڵان: پێوەندیتان لەگەڵ بەغدا لە چ ئاستێكدایە، ئایا نوێنەرانی كورد لە بەغدا لە مەسەلەی دارایی ئاگاداری شەفافیەت و بودجە و داهاتی پیترۆلین؟
بایز تاڵەبانی: دەبوایە هەیئەتێك هەبووایە كە هەیئەتی سەرچاوەكانی داراییە و كوردیش ئەندامی تێدا هەبووایە بۆ چاودێری هەیئەتەكە و سەرچاوەكانی داهات و دارایی، گەرچی تا ئێستا ئەم هەیئەتە دروست نەبووە بۆ ئەوەی بزانین لە خواروو و ناوەڕاست و لە كوردستانیش چی دەكرێت و تا ئێستاكە بۆدانانی میزانیە نەبانگیان كردوین و نە پرسیان پێكردوین و هەر خۆیان میزانیەكەیان داناوە لە پاشان وتوویانە ئەوە ژمارەی میزانیەكەتانە،لەلایەكی تر هەموو ساڵێك هەقی خۆمانە بودجەی وەزارەتی پێشمەرگە لە بەغدا وەربگرین و سەرفبی بكەین، بەڵام نایكەن و ناماندەنێ و دەبێـتە هۆی ئەوەی میزانیەكەمان تێك بچێت و هەموو ساڵێك میزانیەكەمان كە عجزی تێدەكەوێت یەكێك لە هۆكارەكانی وەزارەتی پێشمەرگەیە، هەروەها بڕیاریاندا پۆلیسی گومرگ لەسەر وەزارەتی ناوخۆبێت و مووچە و بودجەی و هەموو پێداویستییەكانیان لە بەغدا بۆ سەرف بكرێت، گەرچی نەك هاوكاری و پاڵپشتی بەڵكو یەك ژووریشان بۆ دروست نەكردون، جگە لە مووچەكە هیچیان بۆ نەكردون، بۆیە دیسان كاروپێداویستی ئەوان هەموو ئێمە بۆیان دابین دەكەین، هەروەها جنسیە و سەفەر میزانییەكیان بۆیان دانابوو تەنیا ئەمساڵ بە نیوەناچڵی بۆیان ناردون، بۆ ئەمانەش هەر ئێمە پارە و پێداویستیمان پێیان داوە، گەرچی پارەكانیش لە میزانیەكانمان دەبڕن و پێشیان نادەن بۆ ئێمەشی سەرف ناكەنەوە.
كڕینی ئۆتۆمبێل ئازارم دەدا، چونكە بودجەی ئێمە بۆ پڕۆژەیە نەك بۆ كەمالیات
گوڵان: ئایا داواكاری كەمالیات و كڕینی ئۆتۆمبێل و چەند شتی لابەلای دیكەی دیكۆرات گۆڕین،چەند ئازارت دەدات؟
بایز تاڵەبانی: ئەو داواكاری و داخوازیانە كە لە وەزارەتەكانەوە بۆم بەرز دەكرێتەوە زۆر دڵتەنگ و خەفەت بارم دەكات و لە كۆبوونەوەكانی ئەنجوومەنی وەزیرانیش باسمكردووە، چونكە میزانیەی ئێمە بۆ ئەوەیە پرۆژە خزمەتگوزارییەكان و مووچەكانی پێی مسۆگەر بكەین بۆیە هەندێ شت پێویست ناكات بیكڕین بەتایبەتی كڕینی ئۆتۆمبێل پێویستە كەم بكرێتەوە و ئەنجوومەنی وەزیرانیش بڕیاری دا كڕینی ئۆتۆمبێل زۆر كەم بكرێتەوە، ئەمەش بە دەنگەوە هاتنی وەزارەتی دارایە.
ئێمە چاوەڕوانی پەرلەمان دەكەین، یاسایەك بۆ زیندانی سیاسی دەربكات ئەوكات بەپێی ئەو یاسایە مامەڵەیان لەگەڵ دەكەین
گوڵان: كێشەیەك هەیە لە كوردستان ئەویش كێشەی زیندانیە سیاسییەكانە كە وەكو بەغدا مامەڵەیان لەگەڵ ناكرێت و ماددەی(4) هەیە بۆیان جێبەجێ نەكراوە و مووچەكەش لە(500) هەزار دینار كراوەتە(390) هەزار دینار بۆ ئەمە چ بەرنامەتان هەیە؟
بایز تاڵەبانی: خۆی ئەم بابەتە لە پەرلەمانی كوردستان باس كرا و لە حكومەتیش چەندین جار دێت و دەڕوات، منیش لێرەدا باسی دەكەم لە كام شوێنی میزانیەی كوردستان هاتووە و دەست نیشانی كردبێت بڵێت ئەمە بۆ زیندانییە سیاسییەكانی كوردستانە، شتی وا نییە و پارەی وا بۆمان نەهاتووە، بەڵام زیندانی سیاسی زیندانی سیاسی خۆمانن و جێگای رێز و تەقدیرن و دەبێ ئێمە خزمەتیان بكەین و ئەوەی باشە بۆیان جێبەجێ بكەین و ئەوەی لە كوردستان ئێستاكە پێیان دەدرێت زۆر زۆر كەمە، بەڵام بۆ ئەوەندەیە، چونكە ئەو كاتە شەهیدان(400) هەزار دیناریان وەردەگرت زیندانییە سیاسییەكانمان(10) هەزار كەمتر دانرا بوو، هەر وەجبەیەك لە بەغدا پەسەند كرابێت ئێمە لە رۆژی ئیستیحقاقی پێمان داون و لەڕاستیدا لەلای ئێمەدا جیاوازی نییە لە نێوان شەهید و زیندانی سیاسی، چونكە ئەوانیش شەهیدی زیندوون، ئێستا كە ئێمە چاوەڕوانی پەرلەمان دەكەین كە یاسایەك بۆ زیندانی سیاسی دەربكات ئەوكات بەپێی ئەو یاسایە مامەڵەیان لەگەڵ دەكەین كە یاساكە دەركرا مووچەكەیان كرا(500) هەزار دینار،(600) هەزار دینار، یەك ملیۆن دینار ئەوە جێبەجێی دەكەین و هەرچی بۆیان بكەین هەر كەمە، جگە لە مووچەكە پێویستە هاوكاری و خزمەتی تریشیان پێشكەش بكرێت وەكو ئەوەی لە یاساكەی بەغداوە هاتووە، ماوەی مانەوەی زیندانی سیاسیی پێویستە بە خزمەتی وەزیفی حیساب بكرێت.
راوبۆچوونم ئەوەیە با موچە زیاد نەكەین، بەڵكو بازاڕ چاك بكەین
گوڵان: باسی ئەوەمان كرد سیستەمی موچە هەروەكو بەغدا بەڕێوە دەچێت ئەو نرخ و هەڵئاوسانەی لە كوردستان هەیە پێویستە چارەسەر بكرێت تاوەكو بەهای مووچە كەمەكان بەرز بكرێتەوە بۆ ئەمە چی دەتوانن بكەن؟
بایز تاڵەبانی: خۆی ئاراستەی ئێمە بازاڕی ئازادە و ناشمانەوێت دەست بخەینە ناو بازاڕ و ئێمە نرخ دیاری بكەین، پێویستە ململانێیەكی یان كێبڕكێیەكی باش و جوان لە بازاڕ هەبێت، بەڵام بەداخەوە زیادكردنی مووچە بۆ هەر ئاست و توێژ و چینێك بێت لەلایەكی دیكە دەموودەست بازاڕ بەرز دەبێتەوە، من شەخسی راوبۆچوونم ئەوەیە با موچە زیاد نەكەین، بەڵكو بازاڕ چاك بكەین و بازاڕیش بەوە چاك ناكرێت ئێمە بچین نرخیان بۆ دابنێین، دەبێ كێبڕكێیەكی راست و دروست بێت بۆ خزمەتی هاووڵاتیان.
بزنسمان و سەرمایەدارانی كوردستان هەوڵدەن كاڵا و شمەكی باش و كوالێتی بەرز بێنن نەك خراپ و ئێكسپایەر
گوڵان: تا چەند لە كار و ئیشەكانی بزنسمانان و سەرمایەدارانی كوردستان رازیت؟
بایز تاڵەبانی: لە كاتێك بارودۆخی كوردستان خراپ و ناخۆش بووە هەندێ كەسان و سەرمایەدارانی خۆمان كاریان دەكرد و پارەی خۆیان خستبووە كار وەنەشیان دەزانی چارەنووسی سەرمایەكەیان چییە، بەڵام خزمەتی كوردستانیان لەلا گرنگ بوو، ئەمانە زۆر جێگای رێز و تەقدیرن و قەت ناتوانرێ لە بیر بكرێن چونكە بۆ نیشتمان و مرۆڤایەتی بۆ مێژوو كارێكی وا باشیان تۆمار كردووەو قەتاوقەت لە بیر ناكرێن، ئەمانە چەند كەسی دیار و بەرچاون گەرچی ئێستا خەڵكەكەی ئێمە لە بواری بازرگانی و كەرتی تایبەت كاردەكەن پێویستە بیر لە هاووڵاتیان بكەنەوە چۆن گوزەران و ژیانیان خۆش بكەن و هەوڵدەن كاڵا و شمەكی باش و كوالێتی بەرز بێنن نەك خراپ و ئێكسپایەر و نەچن گڵۆپێك بێنن بڵێن با بۆدوو كاتژمێر كار بكات من ناڵێم هەر هەمووی خراپن بەڵكو كەس و سەرمایەداریی زۆر باش و دڵسۆز هەیە حەز دەكات تەنیا خزمەت بە وڵاتەكەی بكات ئاواتە خوازم ئەوانەی باشن هەر باش و باشتربن و ئەوانەی باشیش نینە بێنە سەر ڕێگای راست و باشبن.
پێموایە وەزیری دارایی و ئابووری سروشتی كارەكەی ئاوایە كەم لە ڕاگەیاندنەكان دەردەكەوێت
گوڵان: بۆچی بەڕێز بایز تاڵەبانی كەم لە راگەیاندن دەردەكەوێت؟
بایز تاڵەبانی: بەراوبۆچوونی خۆم پێموایە وەزیری دارایی و ئابووری سروشتی كارەكەی ئاوایە كە كەم لە راگەیاندن دەردەكەوێت، من(7) ساڵ سەرۆكی چاودێری دارایی بوومە و (8 بۆ 9) ساڵە وەزیری دارایی و ئابووریم چ لە ئیدارەی سلێمانی چ ئێستاكە، ئەمەش بۆ ئەوە ناگەڕێتەوە كە لە راگەیاندن بترسم، بەڵام هەندێك لە راگەیاندن و راگەیاندنكاران بەبێ بنەما و بەبێ رەحمانە قسە دەكەن من ناچمە ناو ئەو بابەتانە چۆن قسە دەكەن با بیكەن، بەڵام خۆزگە هەموو كارو شتێك راستیەكەی و هەموو لایەنەكانی باس بكرابوایە
لە كۆتاییدا من سوپاسی هاتنی ئێوە دەكەم بۆ ئەو دیمانەیە و ئومێد دەخوازم گۆڤارەكەتان هەر بەرەو پێشەوە بچێت و گۆڤارەكەم هەموو ژمارەیەكی بۆ دێت و موتابعەی زۆری دەكەم و دەیخوێنمەوە و دەیبەمەوە ماڵەوە، زیاتر شەوان دەیخوێنمەوە و دووبارە داواكارم پتر خزمەت بكەن.