Sibe duyemîn kongreya awarte ya Partiya Aştî û Demokrasiyê (BDP) tê sazkirin. Nûnerên partiyên kurdî yên weke, PDK, YNK, Tevgera Goran, PYD, partiyên Îslamî yên Herêma Kurdistanê û ji Tirkiyê jî gelek partî, sazî û rêxistin beşdarî kongreya BDPê dibin. BDPê, AKP ji bo kongreya xwe venexwend. Ji rojavayê Kurdistanê jî nûnerên Desteya Bilind a Kurdî (DBK) beşdar dibin.

Kongreya BDPê sibe li Salona Sporê ya Ahmet Taner Kişlali ya li Enqereyê tê lidarxistin. Tê çaverêkirin ku carekî din hevserokên BDP’ê Gultan Kişanak û Selahattîn Demîrtaş weke hevserokên giştî bên hilbijartin.

Dê hezar û 190 delege beşdarî kongreyê bibin. Hêjmarek zêde ya çapemeniyê jî beşdarî kongreyê dibin. 44 saziyên çapemeniya Kurdistanî û navneteweyî ji bo beşdarbûna kongreyê serî li BDP’ê dane û dê zêdetirê 200 rojnamevan kongreyê bişopînin. Herwiha, dê gelek kanalên televîzyonê kongreyê bi awayeke zindî biweşînin. Rojnameyên wekî, Star, Zaman, Sabah û Yeni Şafak ên nêzî hikûmetê jî beşdarî kontreyê dibin.

Ji parçeyên din ên Kurdistanê jî nûnerên partiyên siyasî û kesayet beşdar dibin. Vê carê ji

Başûrê Kurdistanê jî eleqeyeke zêde ji bo kongreya BDPê heye. Rojavayê Kurdistanê jî di asta Desteya Bilind a Kurd de û herwiha nunerên partiyên Rojhilatê Kurdistanê jî amade dibin.

Serokê Herêma Kurdistanê Mesûd Barzanî û sekreterê giştî yê Yekîtiya Nîştîmaniya Kurdistanê (YNK) Celal Talabanî jî ji bo kongreyê hatine vexwendin. Lê rojnameya Zaman a Tirkiyê belav kir ku Mesûd Barzanî beşdarî kongreya BDPê nabe.

AKPê, 30ê îlona borî 4. kongreya xwe ya awarte lidarxistibû û BDP ji bo kongreyê nehatibû vexwendin. BDPê jî li hemberî vê yekê AKP û MHPê ji bo kongreya xwe venexwend. Lê BDPê ji CHP, ODP, TKP û partiyên din ê Tirkiyê re dawetname şandiye.

Bi operasyonên di bin navê KCKê de hêjmarekî zêde ya endamên BDPê hatine girtin. Ji 110 endamêm Meclisa Partiyê (PM) yên BDPê, 56 di girtîgehê de ne.

Li gor ANFê kesên beşdarî kongreyê BDPê dibin evin;

Ji Başûrê Kurdistanê:

Serokê berê yê Parlamentoya Herêma Kurdistanê Kemal Kerkukî, Berpirsê Polîtburoya YNK’ê Mele Bextiyar, Nunerê Enqere yê YNK’ê Behrûz Gelalî, ji Berpirsên Derve yên PDK’ê Ehmed Kanî û Hêmin Hewramî, Nunerê Enqereyê yê PDK’ê Salar Ebdulkerîm, Berpirsê Peywendiyên Derve û Berpirsê Sekreteriya Tevgera Goran Êvar Îbrahîm, Parlamentera Goran a Parlamentoya Herêma Kurdistanê Kwêstan Mihemed, Parlamenterê Goran ê Parlamentoya Iraqê Hewal Kwêstanî, Hevserokê Partiya Çareseriya Demokratîk a Kurdistanê (PÇDK) Diyar Xerîb, nunerên PÇDK’ê Azad Mahmud Qadir, Xelil Fereç, Çinûr Xerîb û Ebdullah Îsmaîl Ebdullah, Alîkarê Serokê Giştî yê Komeleya Îslamî ya Kurdistanê Ehmed Silêman Ebdullah, Serokê Giştî yê Partiya Zehmetkêşan Belên Ebdullah, Endamê Lijneya Rêveberiya Navendî (LRN) û Berpisê Peywendiyên Derve yên Zehmetkêşan Hîwa Seyid Selîm, Alîkarê Serokê Giştî yê Yekgirtûya Îslamî ya Kurdistanê Seîd Elî Ebo, Endamê LRN ya Yekgirtûy Îslamî Ebûbekîr Elî Mihemed Emîn, Endamê Polîtburoya Partiya Komunîst a Kurdistanê Muhemed Şêxanî, ji Partiya Yekitiya Niştîmanî Demokrtîk a Kurdistanê (YNDK) Helo Hesen Seîd.

Ji rojavayê Kurdistanê, nunerê Desteya Bilind a Kurd (DBK) Xerîb Huso, Nunerê DBK’ê Îsa Huso, Federasyona Rêxistina Ne Hukmiyekanî Kurdistan (FRHK) Ednan Enwer Beg, Endamên Serokatiya FRHK Çîmen Heme Tekyeddîn, Berzan Heme Tekyeddîn, Dana Cemal Ehmed, Soran Celal Xerenî û Îsmaîl Mihemed.

Nunerên partî û rêxistinên siyasî yên ku dê ji derveyê welat beşdarî kongreyê bibin ev in:

Parlamenterê Partiya Çepgir a Alman û Endamê MPKE (Meclîsa Parlamenterên Konseya Ewropayê) Andrej Hunko, Nunera Partiya Sosyal-Demokrat a Swêdê Bertil Kinnunen, Nunera Partiya Sosyal Demokrat û Ombudsman Evîn Çetîn, Parlamenterê Partiya Çepgir a Swêdê Jacob Johnson, Parlamenterê Partiya Demokrat a Sirbîstanê Konstantin Samofalov, Parlamenterê Baskî yê Parlamentoya Ewropayê Jon Inarritu, Sekreterê Desteya Rêveberiya Partiya Nû ya Qibrisê Mûrat Katanli, Serokê Qibrisa Yekbûyî Îzzet Îzcan, Sekreterê Rêxistina Partiya Qibrisa Yekbûyî Abdullah Kormazhan, Dîrektora Tirkiyeyê ya Weqfa Rosa Luxemburgê Kadriye Karci, Seroka Ciwanan a Partiya Sosyal-Demokrat a Swêdê Evîn Încîr.

Rudaw