MÊRDÎN – Di şerekî çekdarî de keçeke 15 salî hat kuştin
Li navçeya Qoser a Mêrdîna Bakurê Kurdistanê, di navbera 2 malbatan de li ser mijara çerandina hespan, nîqaşekê rû da û ew nîqaş mezin bû û veguherî şerê çekdarî.
Li gor zanyariyan, piştî wê nîqaşê, kesê bi navê D.O, bi çeka nêçîrê, êrişî malbata din kir û deriyê wê malê da ber guleyan.
Di encama wê êrişê de keça bi navê Berfîn Ç. ku wê demê li pişt derî bû, guleyek bi serî ket û bi giranî birîndar bû.
Piştî agahdarkirinê, tîmên tendirustî gihiştin cihê bûyerê û Berfîn rakirin bo Nexweşxaneya Dewletê ya Qoserê, lêbelê tevî hemû hewldanên pizîşkî, ew keça 15 salî nehat rizgarkirin û canê xwe ji dest da.
Herwiha piştî rûdana bûyerê, kesûkarên wê keçikê, êrişî malbata din kirin û agir berdan xaniyê wê malbatê.
Kesê êrişkar ê bi navê D.O jî ji aliyê hêzên emnî yên Tirkiyê ve hat desteserkirin û derbarê bûyerê de lêkolîn hat destpêkirin.
Rudaw
