فارۆق حاجی مستەفا، ڕۆژنامەنووس و نووسەری دیاری سووریا و سەرۆكی (دامەزراوەی بەرچاڤ بۆ میدیا و ئازادییەكان)ـە و كەسایەتییەكی بەناوبانگە لە داكۆكیكردن لە مافەكانی گەلی كورد لە ناوەندە نێودەوڵەتییەكاندا. لەدیدارێكی تایبەت لەگەڵ گۆڤاری گوڵان بەمجۆرە دید و بۆچوونەكانی سەبارەت بە ڕۆڵی كورد لە گۆڕانكارییەكانی ئەم دواییەی ڕۆژهەڵاتی ناوەڕاست و بەتایبەتی ڕۆڵی سەرۆك بارزانی لە پرۆسەی ئاشتی خستەڕوو.

 

 

* ڕۆڵی كورد لە گۆڕانكارییەكانی ئەم دواییەی ڕۆژهەڵاتی ناوەڕاست بەتایبەتی بارودۆخی كوردانی ڕۆژئاوا چۆن دەبینیت و هەڵسەنگاندنت بۆ بارودۆخەكە چۆنە؟

- ڕۆژهەڵاتی ناوەڕاست بە بارودۆخێكی هەستیاردا تێپەڕ دەبێت، بارودۆخێك كە شێوازی حوكمڕانی و سیستەم و یاساكانی زۆر وڵاتی تێدا دەگۆڕێت، كوردیش وەكو نەتەوەیەكی ڕەسەنی ئەم ناوچەیە بەدەر نییە لەم گۆڕانكارییانە، هەرچەندە لە ڕووی تیۆری و ڕژێمەكانی ناوچەكە و هەڵكشانی مەددی گرووپە توندڕەوە ئیسلامییەكان و بوونی ئایدیۆلۆژیای قەومی عەرەبی ئالنگاریی زۆری لەبەردەمدایە، ڕووبەرووبوونەوەی ئەم ئاڵنگارییانەش بەشی زۆری دەكەوێتە سەر خودی كورد وەكو نەتەوەیەك، بەوەی تاچەند لە ڕوانگەی هەستكردنی بە بەرپرسیارێتی نەتەوەییەوە هەڵسوكەوت دەكات. چونكە لەسەر ئاستی ڕژێمە حوكمڕانەكانی هەر چوار وڵات كە كوردی بەسەردا دابەش بووە، كۆمەڵگەكانیان ڕانەهێنراون بەوەی كورد نەتەوەیەكی ڕەسەنی ڕۆژهەڵاتی ناوەڕاستە و مافی نەتەوەیی هەیە. ئەم حاڵەتە بۆ كوردانی ڕۆژئاوا زۆر نالەبارترە، ئەگەر بەراورد بكرێت لەگەڵ بارودۆخی كوردەكانی هەرێمی كوردستان، بەو پێیەی لە دەستوور و یاساكانی سووریادا شتێك نییە بە ناوی كوردەوە، بگرە ڕژێمی سووریا لە هیچ یاسا و بڕیارێكدا وەكو هاووڵاتییەكی سووری ددانی بە كورددا نەناوە، بۆ نموونە لە دەستووری 1920ی سووریادا تاكو ئەمڕۆشی لەگەڵدا بێت، وشەی كورد لە بەڵگەنامە دەستووری و یاساییەكانی سووریادا بوونی نییە، تەنانەت بوونی كورد لە سووریا ڕەت كراوەتەوە، بۆیە ئێمە جگە لەوەی لەبەردەم ئاستەنگی بیركردنەوەی ڕژێمە حوكمڕانەكان و كۆمەڵگەكانیانین، لەبەردەم ئەركێكی قورسی گۆڕینی عەقڵییەتی بیركردنەوە و یاساكانیشداین، كە بەردەوام گەل و تاكی كوردیان خستووەتە خانەی تاوانباركردنیەوە بە جیاخوازی و پارچەپارچەكردنی وڵات، ئەم تۆمەتباركردنەی كورد دوای ڕووخانی ڕژێمی ئەسەد زەقتر دەركەوتووە و بەردەوامی هەیە. لەم ڕوانگەیەوە چەند گۆڕانگارییەكانی ڕۆژهەڵاتی ناوەڕاست گەورەیە، هێندەی ئەوە ئالنگاری و مەترسییەكانی سەر نەتەوەی كورد لە ڕۆژئاوای كوردستان گەورەترە، ئەمە لەكاتێكدا تەمەنی دۆزی ڕەوای گەلی كورد لە سووریا هێندەی تەمەنی 100 ساڵی دامەزرانی دەوڵەتی سووریایە، بەداخەوە نەك تەنیا لەسەر ئاستی حوكمڕانی نوێی ئەم وڵاتە، بگرە لەسەر ئاستی توێژی ڕۆشنبیران و توێژە جۆراوجۆرەكانیش ناهوشیارییەك هەیە و لەوە تێنەگەیشتوون كە لە ڕۆژهەڵاتی ناوەڕاست دۆزی ڕەوای نەتەوەیەك هەیە و ڕەهەندێكی سیاسی و ئابووری و یاسایی هەیە و پێویستی بە چارەسەركردنە. لەم ڕوانگەیەوە كاتێك باس لە ڕژێمی نوێی سووریا و گۆڕانكاریی لە حوكمڕانی و سیستەمی بەڕێوەچوونی وڵات و مافە سرووشتی و یاساییەكانی هاووڵاتیانی كورد دەكرێت، هەموو ئەم گۆڕانكارییانە لە پابەندبوونی ڕژێمی نوێی سووریاوە دەستپێدەكات، بەوەی تا چەند ئەم ڕژێمە نوێیە جددییە و پابەندە بەرانبەر دابینكردنی مافەكانی نەتەوەی كورد و پێكهاتەكان و بەشداریكردنیان لە پرۆسەی سیاسی و حوكمڕانیدا، بۆ بەدەستهێنانی ئەم ماف و بەشدارییە سیاسییەش كوردانی ڕۆژئاوا لەبەردەم میكانیزمی خەباتێكی جیاواز و وەرشەیەكی كاری نوێی سیاسی و یاسایی و حزبیی چڕ و جیاوازدان.   

* ڕۆڵی سەرۆك بارزانی لەم گۆڕانكارییانە چۆن دەبینیت، بەتایبەتی بۆ هێوركردنەوە و ڕێگاگرتن لە پێكدادانەكان لە نێوان توركیا و هێزە كوردییەكان؟ پەیامی سەرۆك بارزانی تا چەند كاریگەریی لەسەر عەرەبی سووریا و سەركردەكانی ئۆپۆزسیۆن و كۆكردنەوەی هەركوردانی هەر چوار پارچەی كوردستان هەیە؟

- ڕۆڵی زۆر گەورەی سەرۆك بارزانی وەكو مەرجەع و سیمبولی نەتەوەیی كورد لەسەر ئاستی هەر چوار پارچەی كوردستان دیار و لەبەرچاوە، خەبات و كاری بەردەوامی سەرۆك بارزانی بۆ بەدەستهێنانی مافە ڕەواكانی نەتەوەی كورد بەرز دەنرخێنم و بە هیچ شێوەیەك بە درێژایی تەمەنی لەم ئەركەی كەمتەرخەم نەبووە. بارزانی كەسایەتیی یەكەمی كوردە و لە لووتكەدایە و خاوەن كەسایەتییەكی بەهێزە و پەیوەندییەكی فراوانی نێودەوڵەتی هەیە، بۆیە هەمووان لەسەر ئاستی پراكتیكی و شارەزایی و مەرجەعییەتی نەتەوەیی ئومێدی زۆرمان لەسەر ڕۆڵ و پێگەی ئەم سەركردە مێژووییە هەڵچنیوە. ئێمە وەكو كوردی ڕۆژئاوا لە كاتە سەخت و دژوارەكاندا پیرۆزی و گەورەیی سەرۆكمان بینیوە، لە كۆبانێ لە سەردەمی ڕووبەڕووبوونەوەی داعش داوای هاوكاریی سەرۆك بارزانیمان كرد و بە هانامانەوە هات و بەڕێزیان پێشمەرگەی ناردە كۆبانێ و چاودێری و سەرپەرشتی ڕەوشەكەی كرد، تا ئەو كاتەی كۆبانێ ئازاد كرا. بۆیە بە بانگهێشتكردنی مەزڵووم عەبدی وەكو سەركردەیەكی تێكۆشەر و خەباتگێڕی كوردی ڕۆژئاوا و گفتوگۆكردنی لەگەڵیدا، ئەوەندەی دیكەی دڵخۆش كردین و ئومێدی پێداین، لەم بارودۆخە هەستیار و پڕ لە مەترسییەدا ئاراستەمان بكات، بەرەو یەكڕیزی و تەبایی، بەتایبەتی كاتێك دەڕۆین بەرەو دیمەشق، زۆر پێویستیمان بە شارەزایی و پڕئەزموونیی سەرۆك بارزانی هەیە. ئەم چاوپێكەوتنەی سەرۆك بارزانی لەگەڵ مەزڵووم عەبدی ئومێدبەخشە بەوەی ئەم هەلە لەدەست نەدەین و وەكو كوردی سووریا سوود لە پێگەی بەهێزی نێودەوڵەتی و ڕاوێژكردن بە سەرۆك بارزانی وەربگرین بۆ بەدەستهێنانی مافەكانمان لەسووریا.

لە چەندین وێستگەی پێشوو سەرۆك بارزانی ڕۆڵی لە پرۆسەی ئاشتی و هێوركردنەوەی دۆخەكە بینیوە، ناردنی نامەكەی ئۆجەلان بە شاندی ئیمڕاڵی بۆ سەرۆك بارزانی بۆ پاڵپشتی و پشتگیریی هەوڵەكانی سەرۆك بارزانییە، تاوەكو ڕۆڵی زیاتر بگێڕێت بۆ دۆزینەوەی ڕێگا چارەسەری ئاشتییانە بۆ دۆزی كورد لە توركیا، لەم قۆناغەدا توركیا كە لەڕێگەی هێزە ئیسلامییە توندڕەوەكانەوە خاكێكی زۆری ئێمەیان لە سووریا داگیر كردووە. ئەم دوو بابەتەی ئاشتی لە كوردستانی توركیا و بەدەستهێنانی مافەكانی كورد لە سووریا پەیوەندییەكی بەهێزیان لەنێواندایە و سنوورێكی دوور و درێژمان پێكەوەیە، بۆیە چەند پەیوەندیی كورد لەگەڵ توركیا باش بێت، ئەوەندە كوردەكان لە بەشەكانی دیكەی كوردستان هەست بە ئارامی و سەقامگیری دەكەن و ئاڵنگارییەكانیان كەم دەبێتەوە. وابزانم سەرۆك بارزانی بەو پێگەو ناو و ناوبانگەی لەناو دامەزراوەكانی توركیا و حزبی دادوگەشەپێدان و پارتی گەلی كۆماری (جەهەپە) و هێزە كوردییەكان هەیەتی، ئەمە وێڕای ئەزموون و شارەزایی لە دانوستان و گفتوگۆ و پرۆسەی ئاشتی، دەتوانێت ڕۆڵێكی باش و كاریگەر لە پرۆسەی ئاشتی بگێڕێت. بەو ئومێدەی دۆخەكە بە هەمان ڕێڕەوی پێشوو تێنەپەڕێت و هەمووان هاوكار و یارمەتیدەری سەرۆك بارزانی بین و ڕێگای چارەسەر بێت و گۆڕانكاریی گەورە دروست بكات.

* تا چەند هێزە ئیسلامییە توندڕەوەكان لە سووریا جێگای مەترسین بۆ سەر ڕۆژئاوای كوردستان و هەرێمی كوردستان، بەتایبەتی كە هێزەكانی سوپای نیشتمانیی سووریا كە توركیا پشتیوانیان لێ دەكات، جێگای مەترسین؟

- هێزە ئیسلامییە توندڕەوەكان لە سووریا و ناوچەكە بە هۆی كردەوە تیرۆریستییەكان و كوشتن و توندوتیژییەكانەوە بەگشتی جێگای مەترسین و ناو و ناوبانگێكی خراپیان هەیە. هەركاتێك گوێبیستی ناوی ئەم گرووپە جیهادییانە دەبین، مەترسیی تیرۆر و نائارامی و ناسەقامگیری دێتە پێشەوە. لە سووریا هەر لە بەرەی نوسرە و داعش و حوراس دین و جند ئەقسا و چەندین گرووپی چەكداری دیكە هەر هەموویان جێگای مەترسین. من لە كۆبانێ بە چاوی خۆم قەبارەی ئەو مەترسییەی گرووپە ئیسلامییە توندڕەوەكانم بینیوە. ئەمانە هەڵوێستیان بەرانبەر بە كورد باش نییە و هەروەكو چۆن بینیمان دەیانەوێت قەسەدە دەستبەرداری چەكی خۆی بێت و چەكدارەكانی پەكەكە دوور بخەنەوە، ئەمە بەبێ پرۆسەی چاكسازی لە دامەزراوەی سەربازی لەسەر ئاستی وەزارەتی بەرگری، لە كاتێكدا گرووپە چەكدارە بەكرێگیراوە بیانییە توندڕەوەكان لە باشوری ڕۆژئاوای سووریادا لە سوپای نیشتمانی سووریا لە لیبیا و ئازەربایجان و چەندین ناوچەی دیكەی جیهان شەڕ و ئیرهابیان ئەنجام داوە، بۆیە دامەزراوەی سەربازی لەم وڵاتەدا پێویستی بە چاكسازی و پاككردنەوە هەیە لەم گرووپ و كەسە مەترسیدارە بەناو جیهادییە بیانییانە، ئەگەر ئەم گرووپە جیهادی و توندڕەوانە بگەنە سنوورەكانی هەرێمی كوردستان لە ئەگەری دانانی چەكی هێزەكانی قەسەدە، ئەوا جێگەی مەترسین و شوێنەواری خراپیان دەبێت، بەتایبەتی كە ئەمانە بیروبۆچوونیان بەرانبەر پرسی نەتەوەیی كورد و مافەكانی باش نییە و لەژێر ئەم ئاڵایە كوردیان قەتڵوعام كردووە و لە چەندین وێستگەدا كۆمەڵكوژیی كوردیان ئەنجام داوە، لەهەرێمی كوردستانیش ئەم گرووپانە زیانی گەورەیان بە پرۆسەی نەتەوەیی كورد گەیاندووە. ئەم گرووپانە جگە لەشەڕ و كوشتار و زیانگەیاندن بە هزری نەتەوەیی، دەستكەوتی دیكەیان نەبووە، هەر بۆیە گرووپە توندڕەوە ئیسلامییەكان دژی دیالۆگ و گەشە و پێكەوەژیان و ئاوەدانین، بۆیە سەقامگیریی خاڵی بەهێزی هەرێمی كوردستانە و گەشە و هەڵكشانی ئەم گرووپە توندڕەوانەش دژی ئەم هەنگاوانەیە كە بەڕێزان سەرۆكی هەرێمی كوردستان و سەرۆكی حكومەتی هەرێمی كوردستان هەنگاوی بۆ دەنێن. لەم ڕوانگەیەوە ئەگەر هێزەكانی سووریای دیموكرات بە زەمانەتەوە بچنە دیمەشق و تەواوی مافە نەتەوەییەكانی كورد لەڕووی سیاسییەوە زامن بكەن و كورد ئیدارەی لامەركەزی ناوچەكانی بكات و دیمەشق لە مەركەزییەتی توندڕەوی ئیسلامیی جیهادی دەرباز بكرێت و لەم قۆناغە ڕاگوزەرەوە بەرەو قۆناغی بونیادنانی دەوڵەت و دامەزراوەكانی هەنگاو بنرێت، پارێزگاریی لە مافی نەتەوەكان و ئایین و ئایینزاكان دەكرێت.  

* ئایا تا چەند ئەو ڕژێمەی جێگای ڕژێمەكەی بەشار ئەسەدی گرتووەتەوە، بە هەمان شێوەی ئایدیۆلۆژیەتی قەومی عەرەبی و بگرە توندڕەویی ئیسلامیی سیاسیشەوە جێگەی مەترسین؟

- فكری بەعسی قەومچێتیی عەرەبی تەمەنی زیاتر لە 60 ساڵە و بووەتە ئایدیۆلۆژیایەك لە سووریا دژ بە كورد و درووز و پێكهاتەكانی دیكە و كەمینەكان، كە فكری توندڕەویی ئیسلامی (هەیئەی تەحریر شام)یشی چووەتە سەر بە ئایدیۆلۆژیایەكی جیهادیی تازەوە، هەموو ئەمانە جێگای مەترسییەكی زۆر گەورەن، بەتایبەتی كە وەزارەتی بەرگرییان دامەزراندووەتەوە، بێ چاكسازی و هیچ هەنگاوێكی نوێیان بۆ بەشداریی پێكهاتەكانی دیكەیان لەناو ئەم دامەزراوە گرنگە نەناوە، تەنانەت خزانە ناو دامەزراوەی سەربازییەوە لەلایەن ئەم گرووپە جیهادییە توندڕەوانە، زۆر مەترسیدارترە لە ڕژێمە دیكتاتۆرەكانی ناوچەكە.

* تاچەند كوردانی سووریا دەتوانن سوود لەم گۆڕانكارییە گەورەیە وەربگرن و یەكڕیزیی خۆیان بپارێزن و مامەڵەیەكی لۆژیكانە لەگەڵ ئەم گۆڕانكارییانەدا بكەن و دەرفەت و سوودی لێوەربگرن، بەتایبەتی لەگەڵ هاتنی ترەمپ و ئیدارەی نوێی ئەمریكا؟

- كورد وەكو نەتەوەیەكی ڕەسەن و گەورە كە خاوەن خەبات و دۆزێكی ڕەوای 100 ساڵەیە، لەم گۆڕانكارییە گەورەو خێراییانەی ڕۆژهەڵاتی ناوەڕاست لە بەردەم یەكخستنی گوتار و یەكڕیزیدایە، بەتایبەتی لە كوردستانی ڕۆژئاوا كە پرسی كورد ڕەهەندێكی سیاسی و یاسایی هەیە و لە بەردەم ئیستحقاقات و مافی نەتەوەییدایە، بۆ ئەوەی بە یەكڕیزی ڕوو لە دیمەشق بكات و لە پرۆسەی سیاسیی ئەو وڵاتەدا بەشدار بێت، بەڵام گرنگە كورد چاوەڕوانی پێدانی مافەكانی نەبێت لەلایەن ڕژێم و دەوڵەتەكانەوە، بەتایبەتی لە گۆڕانكارییە گەورەكاندا، بە هاوشێوەی ئەزموونی سەرۆك بارزانی كە زۆر پێویستە هەمووان لە دەوری ئەو سەركردەیە كۆببنەوە و كار بە ئامۆژگاری و ڕاسپاردەكانی بكەین و وەبەرهێنانی هەموو توانا سیاسی و سەربازیی و ئیدارییەكانمان بكەین، هەمووی لە پێناو بەدەستهێنانی مافەكانمان و چارەسەری دۆزی ڕەوای نەتەوەی كورد لە ڕۆژهەڵاتی ناوەڕاست بێت. لەو دەمەی ئەحمەد شەرع بە شەرعییەتی شۆڕش و فەقهی بووە سەرۆكی ڕاگوزەر و ژمارەیەك وڵاتی عەرەبی و پێنچ وڵاتی ڕۆژئاواش پیرۆزباییان لێكردووە، بەڵام ئەمریكا تاكو ئێستا هەڵوێستی لەقۆناغی ڕاگوزەری سووریا ڕوون نییە، چونكە لە ناوخۆی ئیدارەی نوێی ترەمپدا بە هاوشێوەی زۆر دەوڵەتی دیكەی ڕۆژئاوایی دەنگێكی زۆر هەیە كە گومان لە توانا و ویستی ئەحمەد شەرع (جۆلانی) دەكەن بۆ جێبەجێكردنی گۆڕانكاریی گەورە لە قۆناغی ئینتقالیدا. بەیانی عەقەبەی 1 و 2 و بەیانی ڕیاز و كۆنگرەی پاریس و دیدارەكانی میونخ و زۆر ئامۆژگاریی دیكە هەیە بەوەی حكومەتی ڕاگوزەر لە سووریا سەرتاپاگیر و فراوان بێت و هەمووی تێدا بەشدار بێت و مافەكانی مرۆڤ و پێكهاتە و كەمینەكان بپارێزن، داواكارییش هەیە بە تێكەڵكردنی هێزەكانی سووریای دیموكراتی بە سوپای سووریا، چونكە هێزەكانی سووریای دیموكرات تەنیا زەمانەتی دامەزراندنی هێزێكی نیشتمانی پیشەییە كە فكری جیهادی و ئینتحاری نەبێت و تەنانەت هێزەكانی پێشمەرگەی ڕۆژئاواش لەناو ئەم دامەزراوە سەربازییەدا لەخۆ بگرێت، وڵاتانی ڕۆژئاواش بۆ ڕێگریكردن لە تەشەنەكردنی فكری جیهادی و توندوتیژی، زۆر پێویستیان بە هێزەكانی پێشمەرگە و شەڕڤانان هەیە، كە زامنی دامەزرانی هێزێكی سەربازییە دوور لە هزری توندڕەوی. تا ئەم كاتە پاڵپشتییەكی گەورە بۆ ئیدارەی نوێی سوووریا بوونی نییە و بارودۆخەكە ناهەموار و قورسە و هەژاری و بێكاری و غیابی دامەزراوەی سوپا و ناوخۆ و وەزارەتە خزمەتگوزارییەكانی دیكەی حكومەت و بوونی زۆر گرووپی چەكدار و جیهادی و توندڕەو، سووریای نەگەیاندووەتە شێوازێكی پێشكەوتووی دەوڵەت و چالاكی و كاری ڕێكخراوەیی كۆمەڵگەی مەدەنی، تەنانەت لە یەكەم چالاكیی دیالۆگیدا لە حمس، هێزە میانڕەو و عەلمانی و چەپەكان و دەستگیركراوانی سیاسیی ڕژێمی پێشوو لەم چاوپێكەوتن و ڕاوێژكردنەدا دوور خرانەوە. 

* تا چەند بوونی هێزەكانی پەكەكە و قەندیل گەمەكردنە بە چارەنووسی ڕۆژئاوا؟ ئایا هێزەكانی سووریای دیموكرات دەتوانن خۆیان دەرباز بكەن لە پەكەكە و دەرگای گفتوگۆ و دیالۆگ لەگەڵ توركیا بكەنەوە؟

- بوونی هێزەكانی پەكەكە لە ڕۆژئاوای كوردستان پێویست نییە و زیان بەو دەرفەتە دەگەیەنێت كە ڕووی لە كورد كردووە. ڕاستە ئەوان پاڵپشت و هاوكارێكی باشی ڕووبەڕووبوونەوە و تێكشكانی داعش بوون لە ڕۆژئاوا، بەڵام وەزعی نوێی سووریا و فشارەكانی توركیا و هاوكێشە نوێیەكەی ئەم وڵاتە، ئەوە دەخوازێت نەك تەنیا پەكەكە بەڵكو بیانییەكانی ناو گرووپە جیهادییە توندڕەوەكانیش چیتر لەو وڵاتە نەبن، بۆ كورد بارودۆخەكە وەكو ئاماژەم پێدا هەستیارە و قۆناغی شەڕی پارتیزانی و گیڤارایی بەسەر چووە، نابێت كورد ئەم هەلە نوێیە لەدەست بدات. دەبێت هەموو هێز و چەكدارەكانی كورد لە ڕۆژئاوای كوردستان مۆركی ئەو وڵاتەیان پێوە بێت.

* لە لێدوانێكدا باسی ئەوەت كردووە، ئەگەر نەتەوە یەكگرتووەكان چاودێریی پرۆسەی سووریا نەكەن و ناوی كورد لە وڵاتەكە و دەستووردا جێگای نەكرێتەوە و ڕێگا لە دەستتێوەردانی توركیا نەگیرێت، ئەوا چارەنووسی ڕۆژئاوای سووریا جێگای مەترسییە، لەو بارەیەوە ڕوونكردنەوەی زیاترتان چییە؟

- بوونی زەمانەتی نێودەوڵەتی و نەتەوە یەكگرتووەكان بۆ كورد لە قۆناغی ئینتقالی لە سووریا زۆر گرنگە، بڕیاری 2254 لە 2015دا تا ڕاددەیەكی باش ئەو زەمانەتەیە كە جەخت لەسەر حوكمێكی ڕاگوزەر دەكات بە هەموو فاكتەرەكانی نووسینەوەی دەستوور و هەڵبژاردنێكی پاك و بێگەرد و حكومەتێكی دوور لە ئایدیای مەزهەبی كە هەمووان لەخۆ بگرێت و چاكسازی لە دامەزراوەكانی دەوڵەتدا بكرێت. ئەمە حاڵی هەموو دەوڵەتێكی خۆسەپێنە كە بە كودتا، یان بە شەڕ بگۆدرێت و خەڵك خوازیاری ڕژێمێكی نوێی دیموكراسی بێت، ئەوەش پێویستی بە هاوكاری و چاودێریی نێودەوڵەتی و نەتەوە یەكگرتووەكان و ئاژانسەكانی هەیە، تاوەكو فرتوفێڵ و پەراوێزخستنی پێكهاتەكان و مافی مرۆڤ پێشێل نەكرێت و هەر سێ دەسەڵاتی یاسادانان و جێبەجێكار و داد، بە سەربەخۆیی و پیشەگەریی دوور لە دەستتێوەردانەوە كاری خۆیان بكەن، بەمەش دەكرێت سووریا بكرێتە خاڵی وەرچەرخان بۆ بونیادنانی ڕۆژهەڵاتێكی نوێی جیاواز لە ڕۆژهەڵاتی ڕژێمە دیكتاتۆر و گرووپە جیهادی و هێزە ئیسلامییە توندڕەوەكان، كە تێیدا كورد ڕۆڵێكی كاریگەر و گرنگ بگێڕێت، بە پێچەوانەوە بارودۆخەكە ڕوو لە باشی ناكات.