روژھەلاتا ناڤین ب گشتی و وەلاتێن ئەقلیمی و ناوچە یا دگھورینا دا، رەوشا کوردستانێ گەلەک یا ھەستیارە و ژ گەلەک روویان ڤە شەرعیەت نەمایە، تایبەت ژی جھێ تێپەراندنا یاسایا کو پەرلەمانە.

ھەبوونا ھەرێما کوردستانێ د ناوچەیەکا تەژی ئالوزی، یا پێدڤی ب حکومەتەکا ب ھێزە
حکومەتا بھێز ب ھەمی رامانێن خوەڤە تایبەت ژی حوکمدارییەکا ل دوویڤ وان سنورێن دەستورێ عیراقێ رێک پێدای و شەرعیەت دایێ، ل ژێر ئێک ئالا ب دلسوزی و ھەستکرن ب بەرپرسیایەتیێ و زانینا قەبارە و رولێ خوە، دیسان ژی ئێک ھێزا ئێکگرتی یا لەشکەری و نەھێلانا وان دەرزێن دەلیڤا بو گەندەلیێ پەیدا دکەن د ھەمی سازیێن حکومەتێ دا، تایبەت پەروەردە، لەشکەری، ساخلەمی...

ھەر حیزبەکا د ھێتە د ناڤ حکومەتێ دا، قەبارێ خوە ل گورەی دەنگێن ب دەست خوە ئێخستی بزانیت و ل دوویڤ کورسیێن وێ دەستھەلاتا بەردکەڤیت یا پێ رازی بیت، ھەر وەسا یا خوە سەپێنەر نەبیت و پروتوکولەک بھێتە ئیمزاکرن کو ئەو حیزبا دھێتە د ناڤ حکومەتێ دا نابیت ب چ رەنگا رولێ ئوپزسیونێ بگێریت و ئەو ب خوە ئاستەنگا پەیدا بکەت بۆ حکومەتێ.

خالەکا دی یا گرنگ شەفافیەتە و چاکساخیەکا ریشەی یە، کو پێدڤییە حکومەتەکا شەفاف بیت و چ گومانێ بۆ خەلکی نەھێلیت تایبەت ژی د بوارێ داھاتی دا. واتا حکومەت یا خەلکی بیت.
ھەر دیسان یا فەرە د ڤێ کابینێ داھەرێم ببیتە خودان دەستورێ خوە کو مفایێن ھەبوونا دەستوری بابەتەک دویر و درێژە.

ھەر چەندە د دیتنا من پێک ئینانا حکومەتێ ڤێ جارێ یا ب ساناھی نابیت، دێ گەلەک دەم پێ چیت تا حکومەت دھێتە پێک ئینان چونکێ چ ھێزێن کوردی نەشیاینە کورسیێن پێویست بو پێک ئینانا حکومەتەکا ئێک لایەنی ب دەست خوە بێخن، حەتا ئێک ژ حیزبێن کوردستانێ تایبەت ( پارتی و ئێکەتیێ) ٥٠+ ١ کورسی ژی بربان یا ب ساناھی نە دبۆ حکومەتێ پێک بینن و حکومەتەکا سەرکەفتی نەدبۆ ژبەر ھەستیارییا ناوچەی.

گەلەک یا گرنگە حکومەتەکا ب لەز بھێتە دورستکرن ژبەر ڤان ئەگەرانە:-
١- عیراق، تاکو تە حکومەتەکا شەرعی نەبیتن تو نەشێی د چ بواران دا دانوستاندنێ د گەل عیراقێ بکەی ل سەر وان کێشێن ھەلاویستی ڤێجا ( دارای بن یان جوگرافی و دەستوری بن).
باوەرم ژی کو عیراق حەزناکەت چ حکومەت ژی بھێنە پێک ئینان ئەوژی بابەتەک دویر و درێژە

٢- تورکیا و ئیران، ھەردو وەلاتێن مەزن کارتێکرنا ھێزێ و ھزری یا ل سەر ھەرێمێ ھەی، ئەگەر ب لەز حکومەت نەھێتە پێک ئینان دویر نەگرە فشارێن ھەردو وەلاتا ل سەر ھەرێمێ زێدەتر لێبێن، خودێ نەکەت ھەرێما مە ھەی دوبارە چالدیرانەکا دی تێدا روی بدەت.

٣- وەلاتێن ھاوپەیمانڤە، د بیت ئەوژی ئێدی ب گەرم و گور پشتەڤان نەبن بۆ ھەرێمێ کو د نوکەدا گەلەک د ھاریکارن د گەلەک بواران دا.

٤- ژبەر خەلکێ ھەرێمێ ب خوە، خەلکی یا خوە ل سەر ملێت خوە راکر و ب رێژەکا باش بەژداری ھەلبژارتنان بوون کو وان ژی ھەست ب گرنگیا دەنگدانێن ڤێجارێ دکر، ڤێجا ھندی زویتر حکومەت بھێتە دورستکرن دێ زویتر شێن خزمەتا خەلکی کەن کو ئەڤجارە خەلک گەلەک یێل چاڤەرێ پێنگاڤ و خزمەتێن حکومەتێ، د حەقن ژی چونکی براستی خەلکێ ھەرێمێ گەلەک وەستیا ژ بەر ھەڤرکییا نەشرعیا حزبێن کوردستانێ.

٥- ژبەر قەوارە و قەبارێ ھەرێمێ، ھەر وەسا ئەمن و ئاسایشا ھەرێمێ.

٦- بێ بەھر نەبوون د ھەر گورانکاریەکا ل ناوچێ دھێتە رودان.
رەنگە دیزاینەکا نوی بو روژھەلاتا ناڤین بھێتە کرن دڤان سالێن د پێشیا مەدا، لەوا نوکە دەمێ قایشکێشانێ و ھەڤرکی و خوە سەپاندنێ نینە، دا دەرسێ ژ رابرو و مێژوویا خوە وەربگرین، لەوا د نوکەدا ھەرێما کوردستانێ پێدڤی ب حکومەتا بھێزا یاسی و دامەزراوەی یە