پرسی هەموار كردنی یاسای باری كەسیی عێراق، بۆتە ڕۆژەڤ لە ناو ڕای گشتیی كوردستان و ڕای گشتیی شەقامی عێراقیشدا، هۆكاری سەرەكیش بۆ ناڕەزایی لەم هەموارە ئەوەیە دەرگا دەكاتەوە كە تەمەنی هاوسەرگیری بە تەمەنی باڵق بوونەوە گرێبدرێتەوە وەك خۆیان دەڵێن تەمەنی 9 ساڵی، بەڵام تەمەنی باڵق بوون لە شەریعەتی ئیسلامیدا گرێدراوەتەوە ئاستی ئەوەی تاچەند ئەو تەمەنە گونجاوە بۆ ئەوەی ئەو بەرپرسیاریەتییە بخرێتە سەر شانی، زانایانی ئایینی ئیسلامی لە هەرێمی كوردستان گفتوگۆی زۆریان لەسەر ئەم مەسەلەیە كردووە لە ناو پەرلەمانی كوردستان قسەی لەسەر كراوە، بۆیە ئێمە گەیشتووینەتە ئەو قەناعەتەی كە كچی ئێمە نەك لە 9 ساڵی بەڵكو لە خوار 18 ساڵی ناكرێت پرۆسەی هاوسەرگیری ئەنجامبدات، ئەمەش لەبەر ئەوەیە هەتا 18ساڵ تەواو نەكات لە ڕووی بایۆلۆژییەوە جەستەی پێگەیشتوو نابێت بۆ ئەوەی ببێتە دایك، بۆیە ئێمە وەك زانایانی ئایینی  لە وتارەكانیشمان لە نوێژی هەینی ئامۆژگاری دایك و باوكان دەكەین كە هاوسەرگیری لە تەمەنی منداڵیدا ئاكامەكەی باش نابێت.

من وەك زانایەكی ئایینی لە سەنتەری توندوتیژی دژی خێزان كار دەكەم، ئەو كێشانەی دێنە لای ئێمە، بەشی هەرە زۆریان هی ئەو كوڕ و كچانەن كە لە تەمەنی مناڵیدا هاوسەرگیریان كردووە، هۆكاری ئەمەش دەگەڕێتەوە بۆ ئەوەی لەسەر بنەمایەكی دروست هاوسەرگیریان نەكردووە و خێزانیان پێكنەهێناوەو، نەژنەكە مافی پیاوەكە دەزانێ چیە، نە پیاوەكە دەزانێت مافی ژنەكەی چییە؟ بۆیە لێكتێناگەن و دێن و دەیانەوێت لەیەكتری جیاببنەوە.

بەداخەوە پرسی تەڵاق و هەڵوەشانەوەی خێزانەكان زۆر زیادی كردووە، هۆكاری ئەو لێكجیابوونەوەیەش زۆر گەورە نین وەختە بڵێم بۆتە چاو لێكەری، ئەمەش گەلێك هۆكاری لە پشتەوەیە وەك نەبوونی ڕۆشنبیری، كاریگەریی دەوروبەر، ئەو دراما تەلەفیزیۆنییە بیانیانەی كە بۆ كوردی دۆبلاژ دەكرێن.

لەگەڵ ئەوەی ئەو پێشنیار هەمواركردنەی ئێستا دەیانەوێت لە پەرلەمانی عێراق تێپەڕێنن، لەكوردستان جێبەجێ ناكرێت و كوردستان لەساڵی 2008ئەو یاسایەی هەمواركردووە و یاسای باری كەسیی خۆی هەیە، بەڵام بمانەوێت یان نەمانەوێت ئێمەش بەشێكین  لە عێراق و پڕیشكی دەرهاویشتە خراپەكانی بەر هەرێمی كوردستانیش دەكەوێت.