لە شەستەمین ساڵیادی دامەزراندنیدا، پیرۆزبایی لە سەرجەم کارمەندانی کارگێڕی و کادیرانی دەنگی کوردستان دەکەین کە بەوپەڕی هیممەت و مکوڕییەوە لە سەختترین و دژوارترین دۆخەکاندا خزمەتی دۆزی گەلی کوردستانمانیان کرد، هەروەها دەستی ئەو برا تێکۆشەرانە دەگووشین کە ئەم ئێزگەیەیان دامەزراند و پێداویستییەکانی بەگەڕخستنیان دەستەبەر کرد، بۆ ئەوەی کاروانی ئێزگەی دەنگی هەق، دەنگی کوردستان دەست پێبکات.

ئێزگەی دەنگی کوردستان بە درێژایی دەیان ساڵی خەباتی گەلی کوردستان، دەنگی بڵندی شۆڕش و سەرکەوتنەکانی پێشمەرگە بوو و، قوربانیدانی ڕۆڵەکانی گەلی جوامێرمانی بەڵگەدار و تۆمار کرد

دامەزراندنی ئەم ئێزگەیە ڕۆڵێکی سەرەکیی هەبوو لە گەیاندنی هیوا و خواستەکانی گەلەکەمان بە جیهان و ناوچەکە،
ئێزگەی دەنگی کوردستان بە ڕاستی ئەو دەنگەی شۆڕشگێڕان بوو کە سەرەڕای هەموو ئالنگارییەکان هەرگیز کپ نەبوو

ئەمڕۆ کە ئاهەنگ بۆ ئێزگەی پێشمەرگە و شۆڕشەکانی کوردستان دەگێڕین، هیوای پێشکەوتن و گەشەسەندنی بەردەوام بۆ ئەم دامەزراوە دێرینە و کادیرە بەڕێزەکانی لە خزمەتی کوردستان و دۆزە ڕەواکانی گەلەکەمان دەخوازین.

هەموو ساڵێک بە خۆشی و سەرکەوتن

براتان
دکتۆر کەمال کەرکووکی
بەرپرسی مەکتەبی ڕێکخستنی پارێزگای کەرکووک - گەرمیان
28ی ئەیلوولی 2023