سوپای ئەڵمانیا گرێبەستێكی بە بڕی 1.3 ملیار یۆرۆ واژۆ كرد بۆ دابینکردنی تەقەمەنی
هێزە چەکدارەکانی ئەڵمانیا گرێبەستێکیان لەگەڵ کۆمپانیای پیشەسازی بەرگری "راین میتال" واژۆ کرد بۆ دابینکردنی سەدان هەزار تەقەمەنی تۆپخانە بە بەهای یەک ملیار و ٣٠٠ ملیۆن یۆرۆ.
کۆمپانیاكە ڕاگەیندراوێكی بڵاوكردوەتەوە و لە ڕاگەیەندراوەکەی ئەم کۆمپانیایە ئەڵمانیەدا هاتووە: كە سوپای ئەڵمانیا گرێبەستێکی واژۆکرد بە بەهای یەک ملیار و 300 ملیۆن یۆرۆ، کە تا ساڵی 2029 بەردەوام دەبێت، بە مەبەستی نوێکردنەوەی یەدەگی تەقەمەنی بۆ وڵاتەکەی. پێشبینی دەکرێت بەم نزیکانە یەکەم گەیاندنی چەک بە بەهای 127 ملیۆن یۆرۆ ئەنجام بدرێت.
بەگوێرەی ڕاپۆرتە میدیاییەکانی ئەڵمانیا، کۆمپانیای "راین میتال" سوودێکی زۆر لە ململانێکانی ئۆکرانیا وەردەگرێت و پێشبینی دەکرێت لە ساڵانی داهاتوودا دوو هێندە گەشەی فرۆشتنی چەک تۆمار بکات.
گوڵان: سەردار خەلیل
