(مەلا) رێینشاندەرێ رێکا راست ودورستە بو مروڤی وجڤاکێ ئەو رێکا مروڤ ل دونیایێ پێ سەرفەراز دبیت ول ئاخرەتێ ژی پاداشتێ خوە ژ خودایێ خوە وەردگریت ود چیتە خوشیا بەهشتێ.

لەوما ئەرک وکارێ (مەلایی) ب ئایینی و دونیایێ ڤە د هێتە گرێدانێ، چونکو (مەلا) ئایینێ خودێ نیشا جڤاکی دکەت، وئایین ژی رێکا خودێ یە و دبیتە ئەگەرێ سەرفەرازیا مروڤی وجڤاکی ل دونیایێ ول ئاخرەتێ.

 (مەلایێن کوردستانێ) خزمەتا ئایینێ ئیسلامێ دکر ود هەمان دەم دا خەباتا وەلات ومللەتێ خوە ژی دکر، و(مەلایێن کوردپەروەر) وەسا د دیت کە گرێدانا ئایینی ب مللەتینیێ ڤە رێکا سەرفەرازیێ یە دا مللەت رزگار ببیت و وەلات ئازاد ببیت، چونکو هەکە جڤاک یێ ساخلەم نەبیت ومروڤ تێدا یێ ئاڤاکەر نەبیت پاشەروژا مللەتی دێ بەرزەبوون وهەڕفین بیت، وهەکە (مەلا) بەڕەڤانی ژ مافێن وەلاتیان وبەرژەوەندیا جڤاکی نەکەت و ببیتە داردەستێ دەستهەلاتا- نەدادپەروەر- بێگومان دێ سەنگا خوە ژ دەست دەت وبهایێ وی زور دێ هێتە خاری و چ رومەت بو نامینیت.

فەرە (مەلا) پێگیری ئایینێ خودێ بیت وحەز ژ وەلات ومللەتێ خوە بکەت وبەڕەڤانیێ ژ مافێن وەلاتیان وجڤاکی بگشتی بکەت وەک پێشمەرگەیەکێ نیشتیمانپەروەر ودلسوز وخەمخور وهووسا دێ بیتە (مەلایەکێ کوردپەروەر ونیشتیمانپەروەر) و دێ د ناڤ جڤاکێ کوردستانێ دا ب رومەت کەڤیت ودێ سەنگا خوە هەبیت ودێ گوهداریا ئاخفتن وپەیڤا وی هیتە کرن، هەروەسا دێ رێزەک زور هەژی لێ هێتە گرتن.

 ئێک ژ نموونێن ڤان (مەلایێن نیشتیمانپەروەر) ودلسوز بو ئایینی وخەمخور بو جڤاکی خودێ ژێ رازی: ماموستا (مەلا علی مەلا نبی صالح میرخان گەرماڤی ١٩٥٣- ٢٩/٦/ ٢٠٠٦) بوو چونکو:

1. مەلایەکێ زور پێگیر بوو ب رێنمایێن قورئانا پیروز وحەدیسێ ویێ گرێدایی خێرێ وقەنجیێ بوو، عەقیدەیەکا پاقژ وبژوین هەبوو، (موزایەدە) ل سەر ئایینێ خودێ قەبوول نەدکر، وبەڕەڤانکەرەکێ زیرەک و وێرەک بوو ژ موسلمانەتیێ.

2. مروڤەکێ راستگوو بوو دگەل هەڤال ونەیاران د گەل دوست ونەحەزان.. یێ دەق ودەق بوو، ئاخفتنا راستیێ دگوت هەکە خوە دژی وی بخوە بایە و زیانا وی بخوە یا کەسایەتی ژی تێدا بایە خوە ژ راستیێ نە ددا پاش و(چەپەرێ راستیێ) بەرنەددا.

3. مەلایەکێ مروڤخواز وئاشتیخواز بوو، هەڤالێ باشێن هەمی تەخ وچینێن جڤاکی بوو، لێبورین وپێکڤەژیان دروشمێ وی یێ ب کریار بوو، کەسەکێ خێرخواز ودلوڤان بوو ئانکو مروڤایەتی سالوخەتێ هەرە دیارێ وی بوو هەتا وەغەر کری.

4. زانایەکێ تێگەهشتی وخودان شیان بوو، بەردەوام د زڤروکا خواندنا دا بوو، جار وانە دگوتن وماموستا بوو، وجار دیڤچوون وڤەکولین دکر هەتا ماجستێر و دکتورا ژی خواندی، وب بەلگە رایا راستەقینە وەردگرت، چونکو ئەوی بخوە ژی دیتن وبوچوون وتێبینیێن خوە هەبوون.

5. مەلایەکێ مەرد وناندە ودلفرە بوو، هەردەم کوچکا وی یا تژی مێهڤان وپڕی مروڤ بوو ژ خویانیا وبیانیا، وب ڤێ چەندی زور یێ کەیفخووش و بەختەوەر بوو وجهێ دلرەحەتی وشانازییا وی بوو.

6. مەلایەکێ جڤاکی وسەردەمی بوو، خوە ل بابەت وکێشێن جڤاکی یێن روژانە دکرە خودان، ول دویف شیایان بزاڤا چارەسەرکرنێ ددا، و د پەیڤا روژا ئەینیێ ژی دا ل سەر مینبەرا مزگەفتێ ل دور بابەتێن ئایینی یێن گرێدایی رویدان ودیاردە و روژانێن جڤاکی د ئاخفت و ریکا راست و دروست بو نڤێژکەران دیار و بەرچاڤ دکر.

7. هەڤالشرین وجڤاکدوست بوو، مروڤەکێ وەفادار و خێرخواز و هاریکار بوو بو هەڤال ودوستێن خوە وبو جڤاکی بگشتی، زور یێ ب مروڤانی وب دلوڤانی بوو، بەردەوام سەرەدانا هەڤال و زانا ونەخوش و بریندار ولێقەومایان ومالباتێن شەهید و وەغەرکریان دکر.

8. زور سادە (متواضع) بوو، چ خوە مەزنکرن ل دەف نەبوو، کاروبارێن مالێ ورەزڤانی وچاندن وکولان وچنین وی بخوە دکر.

9. ژ خوەشەرم وب رێزگرتن بوو، خودان رەوشتەکێ بلند بوو، چ جاران خوە نە شکاند ود چەماند بەرامبەری پارەی وهەر بەرژەوەندییەکێ، بەلکو یێ خوڕاگر بوو ومروڤەکێ سەبرکێش بوو ل سەر ئاستەنگێن ژیارێ ونەخوشیێن ژیانا دونیایێ.

10. خودان هەلویست و رول بوو، دەربارا ئەو بابەتێن د هاتنە بەر سینگێ ئێکەتیا زانایێن ئایینی ومەلایان خوە کەڕ وبێ دەنگ نە دکر، بەلکو دیتن وبوچوونا خوە هەبوو و دیار دکر وبابەت چەند یێ هەستیار ژی بایە ئاخفتنا خوە دکر وهەلویستێ خوە زور ب شارەزایی وب ئاشکەرایی بەرچاڤ دکر.

11. زور دەستپاک وسەرکەفتی وسەربلند بوو د ناڤ دەزگەهێ (ئێکەتیا زانایێن ئایینی) وجهێن دی دا، کە دەستپاکی بگشتی گرنگترین تاقیکرنە بو هەر خودان بەرپرسایەتیەکێ، چونکو زور کەس تێدا ب سەرناکەڤن وژێ دەرناچن و(ساقط) دبن د چاڤێن جڤاکی دا ژ بەر گەندەلیێ!.

12. بوو حەز ژ تێکڤەدانێ وژێکڤەبوونێ وکوتلانێ نە دکر، بەلکو دلەکێ پاقژ وسافی هەبوو وهەمی دەمان پالێ ئێکرێزیێ وئێکگرتنێ بوو، وبەردەوام د گوت: تەنها ئێکگرتنە رێکا سەرکەفتنێ وگەهشتنا ئارمانجێن پیروز (وَٱعْتَصِمُواْ بِحَبْلِ ٱللَّهِ جَمِيعًا وَلَا تَفَرَّقُواْ).

13. بەرنیاس وخودان پێوەندیێن بەرفرەهـ بوو، وخودان دوست وناسیار بوو ل سەر ئاستێ کوردستانێ و دەرڤە ژی.

14. مەلایەکێ رێبەر وسەرکێش وخودان کەسایەتیەکا بهێز بوو، د دەلیڤێن تەنگاڤ دا خوە نە ددا پاش وژ بەرپرسایەتیێ نە د رەڤی، بەلکو ملێ خوە دا بەر تەنگاڤیێ وسەرکێشیا هەڤالێن خوە دکر، وپێنگاڤێن دروست د هاڤێتن بو چارەسەریێ وقورتالبوونێ ژ تەنگاڤیێ وئاستەنگێ.

15. مەلایەکێ نیشتیمانپەوەر بوو، یێ گرێدایی وەلات ومللەتێ خوە ڤە، خودان هەلویست و وژدان بوو دەربارا دوزێن وەلاتی ومافێن مللەتی، چ جاران دوودلی نەدکر د بوارێ دوز ومافێن رەوا وعادیلانە دا، بەلکو وەک پێشمەرگه وپارێزەر ومەلایەکێ کوردپەروەر بەڕەڤانی ژ مافێن گەلێ کوردستانێ دکر.

16. پشتەڤانی بەرژەوەندیێن جڤاکی بوو، وبەرەڤانی ژ مافێن وەلاتیان دکر، وئەڤ چەندە زور ب زیرەکی وب شارەزایی ل سەر منبەرا مزگەفتێ دگوت ودکر، هەروەسا د کومبوونێن د گەل بەرپرس ودەستهەلاتی ژی دا بخوە ب دەرفەت د زانی بەڕەڤانیێ ژ مافێ وەلاتیان وبەرژەوەندیێن جڤاکی بکەت زور ب مێرانی وبێ ترس وڕەجفین.

17. ژ خودێترس وب تەقوا بوو و مزگەفت خوشترین جهێ رحەتیا دلێ وی وئارامیا دەرونێ وی بوو، ب تایبەتی دەمێ قورئانا پیروز دخواند و وانە دگوتن وشیرەت دکرن، وب دەهان جاران سەرەدانا مالا خودێ کربوو وچوبوویە (حەجی و عومرێ).

 ژ بەر ڤان خالێن ل سەری هاتینە دیار کرن ماموستایێ خودێ ژێ رازی (مەلا علی گەرماڤی) رومەتەکا زور مەزن وسەنگەکا گەلەک هەژی د ناڤ جڤاکی دا هەبوو، چونکو خوە ددەینا ئێک ژ جڤاکی وخزمەتکارێ جڤاکی- روحا وی ل بەهشتێ شاد وئارام بیت- وخودێ مەلایێن وەسا د ناڤ مللەتێ مە دا پەیدا بکەت.