سەرۆکی حکومەتی هەرێمی کوردستان و وەزیری پلاندانانی حکومەتی عێراق جەخت لە گرنگیی جێبەجێکردنی هەموو ئەو ڕێککەوتنانە دەکەنەوە کە لە کارنامەی حکومەتی فیدراڵدا ئاماژەیان پێدراوە.

ئەمڕۆ دووشەممە 1ـی ئایاری 2023، مەسرور بارزانی، سەرۆکی حکومەتی هەرێمی کوردستان، پێشوازی لە محەممەد عەلی تەمیم، جێگری سەرۆک وەزیران و وەزیری پلاندانانی حکومەتی فیدراڵ کرد.

بەگوێرەی راگەیەندراوی حکومەتی هەرێمی کوردستان، لە کۆبوونەوەکەدا، گفتوگۆ لەبارەی بارودۆخی گشتیی عێراق و گرنگیی پەسەندکردنی یاسای بودجەی فیدرال لە ئەنجومەنی نوێنەران لە زووترین کاتدا کرا، بەو هیوایەی ببێتە سەرەتایەک بۆ چارەسەرکردنی کێشەکانی نێوان هەرێمی کوردستان و حکومەتی فیدرال لەسەر بنەمای دەستوور و دابینکردنی ماف و شایستە دەستوورییەکانی خەڵکی کوردستان .

ئاماژە بەوەش دراوە، هەروەها جەخت لە گرنگیی جێبەجێکردنی هەموو ئەو ڕێککەوتنانە کرایەوە کە لە کارنامەی حکومەتی فیدراڵدا ئاماژەیان پێدراوە.