مەسرور بارزانی سەرۆکی حکومەتی هەرێمی کوردستان رایگەیاند: ژیانی کرێکاران باشتر دەکەین و بەمزووانە ماف و ئەرکەکانی کرێکاران و خاوەنکاران رێک دەخەینەوە.

سەرۆکی حکومەتی هەرێمی کوردستان، لە توییتێکدا بەبۆنەی رۆژی جیهانی کرێکاران، نووسیویەتی: "رۆژی کرێکاران پیرۆز بێت. ژیانی کرێکاران باشتر دەکەین و بەمزووانە ماف و ئەرکەکانی کرێکاران و خاوەنکاران رێک دەخەینەوە".

هەر ئەمڕۆ مەسرور بارزانی، لە پەیامێکی دیکە و بە هەمان بۆنەوە رایگەیاندبوو: "حکومەتی هەرێمی کوردستان، بەردەوام دەبێت لە پرۆسەی چاکسازییەکانی لە پێناو باشترکردنی گوزەرانی کرێکارانی کوردستان، لەم رووەوە، پەسەندکردنی یاسای کار لە هەرێمی کوردستان لە ماوەی رابردوودا، بەشێکە لە  چاکسازییەکانی کابینەی نۆیەم لە بواری باشترکردنی ژیان و مسۆگەرکردنی مافەکانی کرێکاران لە رووی تەندروستی و سەلامەتی پیشەیی و دابینکردنی مافە یاساییەکانیان و سنووردانان بۆ هەموو جۆرە ستەم و چەوساندنەوەیەکی کرێکاران".