بەهۆی داڕمانی کانێکی زێڕ لە سودان دە كەس گیانیان لەدەستدا
دوابەدوای داڕمانی کانێکی زێڕ لە باکووری سودان 10 کەس گیانیان لەدەستدا و چەند کەسێکی دیکەش بێسەروشوێن بوون.
بەگوێرەی ڕاپۆرتی هەواڵدەریی فەرمیی سودان "سونا"، دوای داڕمانی کانێکی زێڕ لە شاری وادی حەلفای ئەم وڵاتە بەلایەنیکەم 14 كرێكاری كانەكە گیانیان لەدەستدا و ٣ كەسی دیکەش بریندار بوون.
لەسەر بنەمای ئەمەش ئەو ڕووداوەی سەرەوە شەوی ڕابردوو ڕوویداوە و تا ئێستاش چەند کرێكاری دیکە بێسەروشوێنن.
هەروەها هەڵمەتێکی گەڕان و دەرهێنانی کرێکاران لە ژێرداروپەردوو دەستی پێکردووە.
پێویستە ئاماژە بەوە بکرێت کە دەرهێنانی زێڕ سەرچاوەیەکی گرنگە بۆ حکومەتی سودان و دوای سەربەخۆیی باشووری سودان لە ساڵی ٢٠١١دا سێ لەسەر چواری داهاتی نەوتی لەدەست داوە و نزیکەی لەسەدا ٨٠ی سەرچاوەکانی ئاڵوگۆڕی دەرەكیشی لەدەست داوە.
گوڵان: سەردار خەلیل
