موعجیزەیەکی تر ڕوویدا؛ دوای ٢٥٧ کاتژمێر ژنێک لە ژێر داروپەردوو ڕزگارکرا
تیمەکانی فریاگوزاری تورکیا لە یازدەهەمین ڕۆژی دوای بوومەلەرزەکە، ژنێکیان لە ژێر داروپەردووی شاری قەهرامان ماڕاش ڕزگار کرد.
تیمەکانی گەڕان و فریاگوزاری تورکیا، لە درێژەدان بە هەوڵە بەردەوامەکانیان لە ناوچە بوومەلەرزەلێدراوەکان، دوو سەد و پەنجا و حەوت کاتژمێر دوای بوومەلەرزەکەی پارێزگای قەهرەمان ماڕاش ژنێكیان بەناوی« نەسلیحان کیلیچیان » ڕزگار کرد.
ئۆپەراسیۆنی ڕزگارکردنی ئەم ژنە تەمەن 42 ساڵە بۆ ماوەی چەند کاتژمێرێک بەردەوام بوو و دوای ئەوەی لە ژێر داروپەردوو هێنایانە دەرەوە ، بۆ چارەسەرکردن ڕەوانەی نەخۆشخانە کرا.
پێویستە ئاماژە بەوە بکرێت کە ڕۆژی دووشەممە ٦ی شوبات ، دوو بوومەلەرزە بە گوڕی ٧.٧ و ٧.٦ بە پێوەری ڕێختەر، ١١ پارێزگای تورکیای هەژاند، کە ناوەندی شارەکانی پازارجیك و ئەلبوستانی سەر بە پارێزگای قەهرەمان ماراش بوو.
گوڵان: سەردار خەلیل
