لە ئەنجامی کەوتنەخوارەوەی فڕۆکەیەکی نەفەرهەڵگر لە ناوچەکانی ناوەڕاستی نیپاڵ، بەلایەنی کەمەوە ٦٨ کەس گیانیان لەدەستدا.

ڕۆژنامەی "کاتماندو پۆست"ی نیپاڵ بڵاویکردەوە، فڕۆکەیەک کە 68 سەرنشین و 4 ئەندامی تیمی فڕۆکەوانی تێدابوو، لە شاری پۆخارا لە ناوەڕاستی وڵات کەوتە خوارەوە و لانیکەم 68 کەس گیانیان لەدەستدا.

بەوپێیەش ئه م فڕۆکه نه فەرهەڵگرە "ATR 72"ی سه ڕ به هێڵی ئاسمانی یتی که له کاتماندۆوه بۆ پۆخارا ده گه ڕێته وه و له نزیک ڕووباری سێتی کەوتووەتە خوارەوە.

بەرپرسانی ناوخۆی پۆخارا ڕایانگەیاند: کە فڕۆکەکە بە دووری 1.6 کیلۆمەتر لە فڕۆکەخانەی شارەکەوە کەوتووەتە خوارەوە و دەڵێن کە تەرمی 68 کەسی ناو فڕۆکەکە دۆزراوەتەوە.

بە وتەی وتەبێژی کۆمپانیای یتی، ئەم فڕۆکەیە 68 سەرنشین و 4 ئەندامی تیمی فڕۆکەوانی هەڵگرتبوو. بەگوێرەی ڕاگەیاندنی ئەم کۆمپانیایە 10 هاوڵاتی بیانی و 2 منداڵی ساوا لەنێو سەرنشینەکاندا بوون.

هەروەها ڕێکخراوی فڕۆکەوانی نیپاڵ ڕایگەیاند، کە پێنج هاووڵاتی هیندی و چوار هاووڵاتی ڕووسیا و دوو هاووڵاتی کۆریای باشوور و هاووڵاتیانی وڵاتانی ئێرلەندا، ئەرجەنتین، ئوسترالیا و فەرەنسا لە سەرنشینانی ئەم فڕۆکەیە بوون.

لە گرتەیەکی ڤیدیۆییدا کە لەلایەن تەلەفزیۆنی دەوڵەتی نیپاڵەوە پەخش کراوە، بڵێسەی ئاگر و دوکەڵ لە فڕۆکە کەوتووەکە لە دامێنی بەرزاییەکانی هیمالایا دەبینرێت.

حکومەتی نیپاڵ ڕۆژی دووشەممە ماتەمینی گشتی ڕاگەیاند و تیمێکی پێنج کەسی بە سەرۆکایەتی وەزیری گەشتیاری ئەم وڵاتە ئەرکی بەدواداچوونی ئەم ڕووداوەیان لە ئەستۆ گرتووە.

 

 

گوڵان: سەردار خەلیل