غەفوور مەخموورى لە زانکۆى تیشکى نێودەوڵەتى TIU : پێویستە راشكاوانه كێماسییه‌كان ده‌ستنیشان بكه‌ین و چاره‌سه‌ری گونجاویان بۆ بدۆزینه‌وه
میدیا - هەولێر :
ئەمڕۆ پێنجشەممە 15ی کانوونى یەکەمى 2022 ، غەفوور مەخموورى سکرتێرى گشتیى یەکێتى نەتەوەیى دیموکراتى کوردستان YNDK لەسەر بانگهێشتی زانکۆى تیشکى نێودەوڵەتى و دەزگاى بنیاد و پێگەیاندنى نیشتمان بەشدارى سمینارى بەرزڕاگرتنى رۆژى ئاڵاى کوردستانى کرد، کە بە ئامادەبوونى ژمارەیەکى زۆر لە مامۆستایان و خوێندەڤانان و میوانان لە بەشى پەیوەندییە نێودەوڵەتیى و دیپلۆماسییەکانى زانکۆى تیشکى نێودەوڵەتى بەڕێوەچوو، لە سمینارەکەدا؛ غەفوور مەخموورى بابەتێکى بەناونیشانى (باشوورى کوردستان و دەستتێوەردانە دەرەکییەکان) پێشکەشکرد، مەخموورى بۆ رووبەڕووبوونەوەى هەڕەشەو دەستتێوەردانە دەرەکییەکان جەختیکردەوە سەر خورتکردنى دیالۆگی نیشتمانی بۆ یەکڕیزی و بۆ چارەسەرکردنی کێشەکانى باشوورى کوردستان.
لەسەرەتاى رێورەسمەکەدا بەڕێز د. محەمەد ساڵح سەرۆکى بەشى پەیوەندییە نێودەوڵەتیى و دیپلۆماسییەکانى زانکۆى تیشکى نێودەوڵەتى، بەناوى زانکۆى تیشک و دەزگاى بنیاد و پێگەیاندنى نیشتمان بەخێرهاتنی ئامادەبووانی كردو, باسی لە گرنگی بابەتی سمینارەکەى مەخمووری كرد, ئنجا غەفوور مەخموورى سکرتێرى گشتیى YNDK وێڕای بەخێرهاتنكردنی میوانان خۆشحاڵی خۆی بۆ ئەو میوانداری و ئامادەبوونی میوانان دەربڕی و سوپاسی رێکخەرانى سمینارەکەى كرد بۆ رێكخستنی ئەو دیدارە لەگەڵ ئامادەبووان, دواتر هاتە سەر پێشكەشكردنی بابەتێک بەناونیشانى (باشوورى کوردستان و دەستتێوەردانە دەرەکییەکان) و تیشکى خستەسەر رەوشى سیاسى هەموو بەشەکانى کوردستان و هەڕەشەو پیلانى داگیرکەرانى کوردستان و، وتى: (ئه‌مڕۆ كوردستان و ناوچه‌كه به‌گشتی به قۆناغێكی هه‌ستیاردا تێپه‌ڕده‌بن، به‌تایبه‌ت ئێستا کەوا رژێمى داگیرکەرى تورکیا بە شێوەیەکى نامرۆڤانە شەڕى دژى رۆژئاواى کوردستان راگەیاندووەو زۆر دڕندانە موشەکبارانى رۆژئاواى دەکات و، رژێمى تورکیا شه‌ڕێكی قورسى له دژى باكوورو رۆژئاوای كوردستان بەرپاکردووە، پێویسته بۆ تێپه‌ڕاندنی ئه‌م قۆناغه سه‌خته پشتگیری و هه‌ماهه‌نگی له‌نێوان سه‌رجه‌م هێزو لایه‌نه سیاسییە‌كانى کوردستان هه‌بێ بۆ ئه‌وه‌ی بتوانین ئه‌و به‌شه‌ی وڵات به‌ده‌ستكه‌وته‌كانیانه‌وه بپارێزین کە بەشێکن له‌ده‌ستكه‌وته‌كانی نه‌ته‌وه‌كه‌مان، هێرش و سنووربه‌زاندنی ده‌وڵه‌تی توركیا و رێگەخۆشکردنى تورکیا بۆ هه‌ڵهاتنی سه‌رانی داعش له‌ناو به‌ندینخانه‌كان زۆر مه‌ترسیدارن و بۆ ئه‌وه‌یه ئه‌و ده‌ستكه‌وتانه له‌بارببه‌ن و لۆزانێكی دیكه به‌سه‌ر كورددا بهێنن و دیمۆگرافیای كوردستان بشێوێنن، له رۆژهه‌ڵاتی كوردستانیش بارودۆخه‌كه ئاڵۆزه‌و لە تەواوى شارەکانى رۆژهەڵات گەل راپەڕیوەو داواى ئازادى دەکات، بۆ كپكردنی ده‌نگی ناڕەزایى خەڵک و گواستنەوەى کێشەکانى بۆ دەرەوەى سنوور، رژێمی ئێران به‌رده‌وام ناوچه سنوورییه‌كان و گوندنشینه‌كان و کەمپەکانى ئاوارەکانى رۆژهەڵات لە باشوورى کوردستان موشەکباران و تۆپباران ده‌كات، سەرەڕاى ئەمانە ره‌شبگیری له‌ناوچه‌کانى رۆژهەڵاتى كوردستان به‌رده‌وامه و رۆژانه ده‌یان لاوی كورد بە فیشەکى پاسداران و له‌ژێر ئه‌شكه‌نجه‌و په‌تی سێداره‌ی رژێمى ئێران شه‌هید ده‌كرێن.)، مەخموورى داوایکرد بۆ رووبەڕووبوونەوەى پیلانى داگیرکەران تەواوى هێزە سیاسییەکان و گەلى کوردستان یەکڕیزبن و کار بۆ یەکێتى نەتەوەیى و نیشتمانى بکەن و وتى: (كوردستان و ناوچه‌كه له‌به‌رده‌م قه‌یران و گرفت و گۆڕانكاری گه‌وره‌دان، پێویستە به‌شێوه‌یه‌كی سه‌رده‌میانه دیالۆگ و له‌یه‌كگه‌یشتن و قسه‌و باس له‌سه‌ر هه‌موو ئه‌و پرسانه بكه‌ین كه په‌یوه‌ندی به‌چاره‌نووسی گه‌لی كوردستان و خاكه‌كه‌یەوە هەیە، ده‌بێ راشكاوانه گفتوگۆبكه‌ین و كێماسییه‌كان ده‌ستنیشان بكه‌ین و چاره‌سه‌ری گونجاویان بۆ بدۆزینه‌وه.).
غەفوور مەخموورى سەبارەت بە رەوشى سیاسى باشوورى کوردستان روانینى خۆى خستەڕوو و، وتى : (هەردوو رژێمى داگیرکەرى کوردستان تورکیا و ئێران بەردەوام هەڕەشە لە باشووری كوردستان دەکەن و هەوڵدەدەن دەستوەردان لە باشورى کوردستان بکەن، جگە لە هەڕەشەى داگیرکەران تا ئێستا مەترسى شەڕى تیرۆریستانى داعش ماوە، ئه‌مه سه‌ره‌ڕای ئەوەى کەوا باشوورى کوردستان لە کۆمەڵێ تەنگژەو قەیراندایە لە سەرووى هەموویانەوە قەیرانى ئابوورى و كێشه هه‌ڵواسراوه‌كانی نێوان حكومه‌تی كوردستان و عێراق و نەبوونى عەدالەتى سیاسى و کۆمەڵایەتى، ئەوانە هەموویان پێویستیان بە چارەسەرێکى بەپەلە هەیە، لەهەمان کاتدا قەیرانى سیاسى و ناکۆکى نێوان بەشێک لە لایەنە سیاسییەکانى دەسەڵات بۆتە هۆى نیگەرانى خەڵکى کوردستان، ئەم کیشە و گرفتانەى نێوان لایەنە سیاسییەکان پێویستیان بە چارەسەرى خێرا هەیە.).
غەفوور مەخموورى لە سمینارەکەیدا داواى لە هەموو لایەنە سیاسییەکان کرد کەوا لەیەکدى نزیکببنەوەو وتى: (بۆ دەربازکردنى ئەم رەوشە نالەبارانه‌و رێکخستنەوەى ناوەندى سیاسى کوردستان و داڕشتنى ستراتیژێکى نەتەوەیى، پێویستە هەموو لایەکمان بەرژەوەندى نەتەوەیى و نیشتمانى لەبەرچاوبگرین و سەرەڕاى سەختى قۆناخەکە کار بۆ یەکێتى نەتەوەیى و یەکڕیزى نیشتمانى بکەین، لەبەرئەوەى بارودۆخى نێودەوڵەتى و رەوشى هەستیارى کوردستان لە هەموو لایەکمان دەخوازێ کەوا له یه‌كتری نزیکبین.)
بۆ رووبەڕبوونەوەى زیاترى هەڕەشەکان مەخموورى داوایکرد کەوا هەموو لایەک کار بۆ بەهێزکردنى حکومەتى کوردستان بکەن و وتى: (پێویستە حکومەتى کوردستان بکەین بە حکومەتێکى یەکگرتوو و بەهێز کەوا ئیدارەى هەموو کوردستان بکات و، خاوەن یەک لەشکرى یەکگرتوو بین بۆ ئەمەش پێویستە بە زووترین کات هێزى پێشمەرگەى کوردستان یەکبخرێتىەوە، هەروەها پێویستە هێزەکانى پۆلیس و دەزگاکانى ئاسایش و دەزگا هەواڵگرییەکان یەکبخرێنەوەو لەژێر رکێفى حکومەتدابن نەک حزبەکان.).
شایانى باسە دواى پێشەشکردنى بابەتەکەى مەخموورى دەرگاى گفتۆگۆ بۆ ئامادەبووان کرایەوە و، روانینى خۆیان سەبارەت بە بابەتەکەى مەخموورى خستەڕوو.
