وێڕای ئاستەنگەكانی بەردەم حوكمڕانی و گەیشتن بە حكومەتێكی بەهێز و حوكمڕانییەكی باش، كابینەی نۆیەمی حكومەتی هەرێمی كوردستان توانی ڕۆژە سەختەكان ببڕێت و لەسەر پێی خۆی بوەستێت. گۆڤاری گوڵان لە دیدارێكی تایبەتدا لەگەڵ دكتۆر جوتیار عادل وتەبێژی حكومەتی هەرێمی كوردستان و سەرۆكی فەرمانگەی میدیا و زانیاری، لەسەر ئەم پرسە و چەند تەوەرێكی دیكەی پەیوەندیدار بە هەنگاوەكانی چاكسازی و شەفافییەت و كەمكردنەوەی ڕۆتین و تێكەڵاونەكردنی ململانێی حزبایەتی لە كاروبارەكانی حكومەت، گفتوگۆیەكی ئەنجام دا، لێرەدا پوختەی وتەكانی بڵاو دەكەینەوە.

 

 

* لەگەڵ ئەوەی ئەولەوییەتی كابینەی نۆیەمی حكومەتی هەرێمی كوردستان هەوڵدان بوو بۆ چارەسەكردنی كێشە هەڵواسراوەكانی نێوان هەولێر و بەغدا و دابینكردنی خزمەتگوزاریی زیاتر بۆ هاووڵاتیان، بەڵام بەغدا هاریكار نەبوو بۆ ئەوەی ئەو كێشانە چارەسەر بكرێت، دوای ئەوەش پەتای كۆڤید 19 هات و هێندەی دیكە باری سەرشانی حكومەتی هەرێمی كوردستانی قورس كرد، بەڵام پاش سێ ساڵ ئێستاش كە سەیر دەكەین، دەبینین كابینەی نۆیەم ئەو ئاستەنگانەی تێپەڕاندووە و هەنگاو بۆ ئایندەیەكی گەش هەڵدەگرێت. ئایا ئەو هۆكارانە چی بوون كە وای كرد كابینەی نۆیەم نەك هەر نەكەوێت، بەڵكو لەسەر پێی خۆی ڕابوەستێت و هەنگاوی زیاتر بۆ پێشەوە هەڵبگرێت؟

- كابینەی نۆیەمی حكومەتی هەرێمی كوردستان، لە بارودۆخێكی هەستیاردا دەستبەكار بوو، دابەزینی بەهای نەوت و بڕینی بودجەی هەرێمی كوردستان لەلایەن حكومەتی فیدڕاڵییەوە، دۆخێكی دژواری بۆ هەرێمی كوردستان دروست كرد، كاتێكیش پەتای كۆڤید 19 لە هەموو جیهاندا بڵاو بووەوە و بووە هۆی داڕمانی زۆرێك لە حكومەتەكانی دونیا، ئێمەش لە پێناو سەلامەتیی هاووڵاتیان كەرەنتینەمان ڕاگەیاند، ئەوەش ئەوەندەی دی بارگرانیی خستە سەرشانی حكومەت، بە خۆشحاڵییەوە بە ئیرادەی ڕێزدار مسرور بارزانی، سەرۆكی حكومەتی هەرێمی كوردستان و تیمە وەزارییەكەی توانرا ڕۆژە سەختەكان بەڕێ بكرێن و بەسەر زۆر ئاستەنگ و بەربەستدا زاڵ بین. هەنگاوەكانی چاكسازی و ئەو گۆڕانكارییەی لە پەیكەری ئابووریی هەرێمدا هەنگاوی بۆ نراوە، ئاراستەی ئابووریی گۆڕی و وەرچەرخانی لە زۆر سێكتەردا دروست كرد، بە شێوەیەك كە لە ماوەیەكی كەمدا توانرا داهاتەكان ڕێك بخرێن و خەرجی ناپێویست ڕابگیرێت. لە ڕووی خزمەتگوزارییەكانیشەوە ئەنجومەنی وەزیران سەرجەم وەزارەتەكان و دامەزراوەكانی حكومەتی هەرێمی كوردستانی ڕاسپاردووە بەپێی تایبەتمەندییەكان كار بۆ چارەسەركردنی كێشە و پێداویستییەكانی هاووڵاتیان بكەن، بە هۆی چاكسازی لە كەرتی وزە و سێكتەرەكانی دیكەدا، داهاتەكانمان زیادی كرد و خەرجییە ناپێویستەكانمان كەم كردەوە، بەمەش وێڕای ئەوەی حكومەتی عێراق بە ئیلتیزاماتەكانی سەرشانی پابەند نەبوو، بەڵام بە هەوڵ و كۆششی بەردەوامی حكومەت و هەنگاوەكانی چاكسازی و گۆڕانكاری لە هەردوو سێكتەری داهات و خەرجییەكاندا، توانرا تا ڕاددەیەك هاوسەنگییەك لە نێوان داهات و خەرجییەكاندا بكەین و، لە وادەی خۆیدا مووچەكان دابەش بكەین و بەردەوامی بە خزمەتگوزارییەكان بدەین و، زۆر لە پڕۆژە گەورە و ستراتیژییەكان و پڕۆژەی گەورەی وەبەرهێنان جێبەجێ بكەین.

*  زۆر جار لە گەلێك بۆنەدا سەرۆكی حكومەتی هەرێمی كوردستان زۆر جەخت لە ڕاگرتنی گەندەڵی و ڕێكخستنەوەی داهات و كەمكردنەوەی خەرجیی حكومەت دەكات، لەمەش زیاتر باس لەوە دەكات كابینەی نۆیەم لە ماوەی سێ ساڵی ڕابردوودا، نەك هەر قەرزی نەكردووە، بەڵكو دوو ملیار دۆلار قەرزی كابینەكانی دیكەی داوەتەوە. ئایا گرنگترین ئەو هەنگاوانە چین كە لە بواری چاكسازیدا كابینەی نۆیەم هەنگاوی بۆ هەڵگرتووە و، ئەم وەرچەرخانەی لە زیادكردنی داهات و فرەچەشنكردنی لە سەرچاوەكانی داهات بۆ هەرێمی كوردستان دروست كردووە؟

- چاكسازی پرۆسەیەكی فراوان و بەردەوام و گشتگیرە، ئەم پرۆسەیە دادپەروەری و خۆشگوزەرانی بۆ هاووڵاتیان دابین دەكات، یەكێك لەو تەحەددییانەی ڕووبەڕووی كابینەی نۆیەمی حكومەتی هەرێمی كوردستان بووەوە، ڕووبەڕووبوونەوەی گەندەڵی بوو، ئامانجی حكومەت و بەتایبەت بەڕێز سەرۆكی حكومەتی هەرێمی كوردستان، نەهێشتنی ژینگەی گەندەڵییە كە زۆر جار بوونی دۆخێكی نالەبارە بۆ ئەنجامدانی گەندەڵی، بۆیە ئەركی حكومەت نەهیشتنی گەندەڵییە. كاتێك لە زۆر بوار و سێكتەردا گەندەڵیمان ڕاگرت، ڕاستەوخۆ داهاتەكان زیادی كرد و، خەرجییەكان كەمیان كردەوە، بەڵام ئاستەنگ و بەربەستیش لە بەردەم گەندەڵی لێرە و لەوێ هەبوو، حكومەتی هەرێمی كوردستان لە ڕێگەی داواكاری گشتی و دادگا و چەسپاندنی یاسا و پاڵپشتیی خەڵكەوە، ڕێگەی لە زیاتر تەشەنەكردنی گەندەڵی گرت و، زۆر كەس و كۆمپانیاش ڕووبەڕووی سزای یاسایی و دارایی كرانەوە. مەحسوبییەت و ڕۆتینمان كەم كردەوە و تاوەكو ئێستاش كاری جددی دەكەین بۆ گەڕانەوەی هەموو داهاتەكان لە ناو یەك خەزێنەی حكومەتدا. فرەچەشنكردنی داهاتەكان و گرنگیدان بە هەرسێ سێكتەری كشتوكاڵ و پیشەسازی و گەشتیاری و ڕەخساندنی هەلی كار و بووژاندنەوەی ئابووری، دۆخی بازاڕ و بژێوی خەڵكی ڕووی لە باشی كرد، ئێمە لەم كابینەیەدا نەك هەر قەرزمان نەكرد، بەڵكو داهاتەكانیشمان زیاد كرد و قەرزیشمان دایەوە، لە بواری چاكسازیی كەرتی گشتی دوو سێ مووچەییمان نەهێشت و دەوامی فەرمانگەكانمان بۆ خزمەتكردنی هاووڵاتیان ڕێك خستەوە و دەیان كاری دیكەمان بۆ كەمكردنەوەی ڕۆتین كرد.

* سەرۆكی حكومەت زۆر جەخت لەسەر شەفافیەت و كەمكردنەوەی ڕۆتین دەكات، بۆ ئەمەش ماوەیەك لەمەوبەر ڕایگەیاند لە ساڵی 2025 حكومەتی هەرێمی كوردستان دەبێتە حكومەتێكی دیجیتاڵی، ئایا حكومەتی دیجیتاڵی چییە؟ ئایا چۆن تەكنەلۆژیا دەبێتە هۆكارێك بۆ چالاككردنی كارەكانی حكومەت و هەنگاوهەڵگرتن بۆ حوكمڕانیی باش؟

- بەدیجیتاڵكردن و حكومەتی ئەلەكترۆنی هەنگاوێكی گرنگە بەرەو بونیادنانەوەی ژێرخانی دیجیتاڵی و پێشكەوتنی خزمەتگوزارییەكان و كەمكردنەوەی ڕۆتین و بیرۆكراتیەتی نێگەتیڤ، مامەڵە و بەڕێوەچوونی كاری هاووڵاتیان خێراتر دەكات و لە زۆر بواریشدا شەفافییەت بە كاروبارەكان دەدات. لەم پێناوەدا سەرۆكی حكومەتی هەرێمی كوردستان نەخشە ڕێگایەكی دەست پێ كرد بۆ جێبەجێكردنی ستراتیژیەتی دیجیتاڵی، لە بوارەكانی سیستەمی نوێی تۆماركردنی كۆمپانیاكان و دیجیتاڵی مۆڵەتی شۆفێری و چەندین بواری دیكە كەوتووەتە كاری پراكتیكییەوە. لە مانگی داهاتووش سیستەمی فیزای ئەلیكترۆنییش دەخرێتە كار. حكومەتی دیجیتاڵی لە بوارەكانی پۆستی ئەلیكترۆنی و مامەڵەی ئەلیكترۆنی و سكاڵای ئەلیكترۆنی و هەموو هەنگاوەكانی دیكەی تایبەت كە لە پۆرتاڵی خزمەتدا هەیە و ڕاستەوخۆ لە ڕێگەی ئەلیكترۆنی و دیجیتاڵییەوە كارئاسانی بۆ كاروباری هاووڵاتیان دەكات و ناڕاستەوخۆ و ڕاستەوخۆ دەچێتە ناو خزمەتی ستراتیجیەتی دیجیتاڵییەوەو وەرچەرخانێكی گەورە لە دامەزراوەكانی حكومەت و كارئاسانی بۆ كەرتی تایبەت و پێشكەشكردنی خزمەتگوزاریی ڕوو دەدات، ئەمەش دەستكەوتێكی دیكەی گرنگی كابینەی نۆیەمی حكومەتی هەرێمی كوردستانە.

* سەرچاوەی مرۆیی و توانا و لێهاتوویی گەنجەكانی كوردستان، لایەنێكی دیكەی جێی بایەخی كابینەی نۆیەمی حكومەتی هەرێمی كوردستان بووە، بۆ ئەوەی ئەم بایەخدانەش ببێتە كردەیی، سەرۆكی حكومەت لە ماوەی ڕابردوو دامەزراوەی داهێنان و نوێگەری «KII» كردەوە، كاری ئەم دامەزراوە تازەیە چییە و ئایا تا چەند ئەم دامەزراوەیە دەبێتە پردێك لە نێوان توانا و لێهاتوویی گەنجەكانمان لە ناوخۆ و دەرەوەی وڵات؟

- هەروەك لە هێڵە گشتییەكانی بەرنامەی كاری حكومەتی هەرێمی كوردستاندا هاتووە، لەسەر ئاستی چاكسازی و خزمەتگوزاری و ئابووری و كارگێڕی گرنگیی تایبەت بە پەرەپێدانی سەرمایەی مرۆیی دراوە، بەتایبەتی گەنجەكانمان، لە خاڵی پانزدەیەمی خزمەتگوزارییەكانیشدا هاتووە: «گەنجانمان سەرمایەیەكی نیشتمانیی گەورە و كاریگەری مرۆیین و ئایندەسازی وڵاتەكەمانن، بۆیە لە میانەی كار و بەرنامەی گشت وەزارەتەكان، كار دەكەین بۆ بەكارخستن و ئاراستەكردنی تواناكانیان بەرەو بنیادنانی كۆمەڵگەیەكی تەندروست و پێشكەتوو، كە ئایندەیەكی گەشتر بۆ وڵات فەراهەم بكات».

لەم ڕوانگەیەوە لە هەموو هەنگاوەكاندا گرنگی بە توانای گەنجەكان و دۆزینەوەی هەلی كار لە كەرتی تایبەت دراوە، بگرە مەرج دانراوە كۆمپانیا ناوخۆییەكان لە سەرووی 75% كار بۆ گەنجەكانی نێوخۆ دابین بكەن و، بەپێی ئەو بەدواداچوونانەی ئەنجاممان داوە زۆربەی هەرە زۆری كۆمپانیاكان پابەندی ئەم بڕیارە بوون و ئەوەی پابەندیش نابێت، ئیجرائاتی توندی بەرانبەر دەگیرێتە بەر. سەبارەت بە دامەزراوەی داهێنان و نوێگەری KII گرنگی بە تواناكانی لاوان دەدات و كار بۆ دابینكردنی ژینگەیەكی لەبار دەكات بۆ داهێنان، هەروەها ئەم دامەزراوەیە جگە لەوەی بۆشایی نێوان كەرتی گشتی و تایبەتی پڕ دەكاتەوە، لە ڕووی داهێنان و فیكرەوە، پردێكی پەیوەندیی باشیش لە نێوان گەنجانی ناوخۆ و گەنجانی دەرەوە دروست دەكات. ئەم دامەزراوەیە هەنگاوێكی گرنگە لە پێناو خزمەتكردنی هەموو ئەو توانا و داهێنان و بەهرانەی گەنجەكانمان هەیانە و لەناو دامەزراوەیەكدا كۆدەكرێنەوە. كاتی ئەوە هاتووە گەنجەكانمان بەلاڕێدا نەبرێن و هان بدرێین بۆ بەردەوامیدان بەو خولیا و ئارەزوو و داهێنانەی هەیانە و پاڵپشتی بكرێن. هەروەها لەم نزیكانە یاسای پارێزگاریكردن لە خاوەندارێتی بیرۆكە ئامادە دەكرێت، بۆ ئەوەی مافی هەر كەسێك كە داهێنانێكی نوێی هەیە بپارێزرێت.

* لەگەڵ ئەوەی ئەنجومەنی وەزیران لە ماوەی سێ ساڵی ڕابردووی كابینەی نۆیەمدا وەك یەك تیم كاری كردووە، بەڵام بەم دواییانە هەست دەكەین جێگری سەرۆكی ئەنجومەنی وەزیران بەشداریی كۆبوونەوەكانی ئەنجومەنی وەزیران ناكات، ئایا ئەم بایكۆتكردنەی جێگری سەرۆك وەزیران پەیوەندی بە كێشەی ناو كابینەكە هەیە، یان كێشەیەكی سیاسییە و تێكەڵی كارەكانی حكومەت دەكرێت؟

- تێوەگلانی حكومەت لە ململانێی حزبی كارێكی خراپە، سەرۆكی حكومەتی هەرێمی كوردستان چەندین جار جەختی لەسەر ئەوە كردووەتەوە كە بەرژەوەندیی گشتیی هاووڵاتیان لە سەرووی هەموو بەرژەوەندییەكەوەیە، سەرۆكی حكومەتی هەرێمی كوردستان لە كۆڕبەندی ئاشتی و ئاسایشی ڕۆژهەڵاتی ناوەڕاستدا جەختی لەسەر ئەوە كردەوە كە بەڕێزیان وەكو سەرۆك وەزیرانێك ڕەفتار دەكات، نەوەكو نوێنەری پارتێك. ئێمە چاوەڕوانین لە سەرجەم حزبەكانی كوردستان ئەوەی لەناو پرۆسەی حوكمڕانی بێت، یان ئۆپۆزسیۆن بێت، هەمووان بەشدارن لە بابەتێك كە پێی دەوترێت پاراستنی بەرژەوەندیی گشتی، دەزانن فەرمانبەرێك، یان كاسبكارێك، یان هەر چین و توێژێكی دیكە بێت، كاتێك بەیانی لە ماڵەوە دەردەچێت، ماڵ و منداڵ و خێزانی بەسەر حكومەتدا بەجێ دەهێڵێت و دەیەوێت كاتێك دەچێتە سەر كاسبی و دەوامی فەرمی خۆی، ژیانی خۆی لە كارەكەی و ژیانی ماڵ و منداڵەكەی پارێزراو بێت، بەمەش ئەركی سەرەكیی حكومەتی هەرێمی كوردستان پاراستنی ئەمن و ئاسایشی ژیانی هاووڵاتیانە بە جیاوازی حزبی و ئایدیۆلۆژیا و نەتەوە و ئایین و ئایینزاوە. خەڵكی باشوور و ناوەڕاستی عێراق و لە هەر چوار پارچەی كوردستان و وڵاتانی دەوروبەریشەوە كاتێك دێنە كوردستان لەبەر ئەم ئەمن و ئاسایشەیە كە لێرە هەیە، بۆیە ئەمە داوای ئێمە نییە لە حزبەكان، بەڵكو داوای هاووڵاتیانی كوردستانە ئارامی و ئاسایشی هەرێمەكە بپارێزن. سەبارەت بە دەوام و بایكۆتكردن هیچ كەسێك لە هەر پۆستێكی حكومەتدا بێت، ناتوانێت بەرانبەر خزمەتكردنی گەلەكەی بایكۆت بكات، ڕەنگە ڕەخنە و گلەیی و بۆچوونی جیاواز هەبێت، ئەمانە هەمووی دواجار هەر بە گفتوگۆ و لێكتێگەیشتن لە ناو ئەنجومەنی وەزیران چارەسەر دەكرێن.

* دوای زیاتر لە ساڵێك لە هەڵبژاردنەكانی ئۆكتۆبەری 2021، توانرا حكومەتێكی تازەی عێراق بە سەرۆكایەتیی محەمەد شیاع سوودانی پێك بهێنرێت، بەپێی ئەو بەرنامە وەزارییە كە پێشكەشی كردووە و هەموو لایەنەكانی هاوپەیمانییەكە ئیمزایان لەسەر كردووە، بەرنامەیەكی زۆر باشە بۆ چارەسەركردنی كێشەكانی عێراق و هەروەها كێشەكانی نێوان هەرێم و بەغدا، ئایا حكومەتی هەرێمی كوردستان تا چەند ئامادەیە بۆ جێبەجێكردنی ئەو بەرنامەیە هاوكاریی بەغدا بكات؟

- كابینەی نۆیەمی حكومەتی هەرێمی كوردستان هەر لە دەستێپكی كارەكانیدا نییەتی جددی بوو لەوەی ڕێككەوتن بكات، بەداخەوە لە حكومەتی پێشوو بەربەستی سیاسیی زۆر هەبوو، نەتوانرا ڕێكەوتنەكە وەكو خۆی جێبەجێ بكرێت، لە ئێستاشدا بە جددی كار دەكەین لەگەڵ حكومەتی نوێی عێراق و شاندیش پێكهێنراوە و چاوەڕوانی بەغداین تاوەكو لە دەرفەتێكدا بچین گفتوگۆ لەسەر ئەو ڕێككەوتنە بكەین كە لایەنە سیاسییەكان لەسەری ڕێككەوتوون. ئەم بابەتە بەشێكی پەیوەستە بە لایەنی جێبەجێكردنەوە و بەشەكەی دیكەی لایەنی تەشریعاتییە، گرنگترینی ئەو بابەتانە لە لایەنی جێبەجێكردنەوە بابەتەكانی (مەسەلەی نەوت و بودجە و ماددەی 140ی دەستووری)یە، ئەمانەش پەیوەندییەكی گرنگیان بە مافەكانی گەلی كوردستانەوە هەیە. ڕێككەوتنی سیاسی لەسەر ئەم بابەتانە كراوە، بە تایبەتی جێبەجێكردنی ماددەی 140 كە بەشێكی زۆری پەیوەندی بە ناوچە كوردستانییەكانی دەرەوەی ئیدارەی هەرێمەوە هەیە و دەبێت لێژنەی باڵای جێبەجێكردنی ئەو ماددەیە دەست بەكارەكانی بكاتەوە و بودجە بۆ جێبەجێكردنی دابنرێت، هەروەها دەمانەوێت لەسەر مەسەلەی نەوت بگەینە ڕێككەوتنی هاوبەش لە بەرژەوەندیی هەردوو گەلی عێراق و كوردستان و لە ماوەی شەش مانگ بە هاوبەشی و لێكتێگەیشتن و ڕەچاوكردنی بەرژەوەندیی هاوبەش، ڕەشنووسی یاسای نەوت و غازی فیدڕاڵی دابڕێژرێت و پەسەند بكرێت، ئەمە جگە لە دامەزراندنی ئەنجومەنی ئیتحادی كە تا ئێستا دانەمەزراوە، عێراق وڵاتێكی فیدڕاڵییە و دەبێت ئەو ئەنجومەنەی هەبێت، هاوكات قسەی جددیمان لەسەر یاسای دادگای فیدڕاڵی دەبێت، خۆی لە خۆیدا تاكو ئێستا ئەو دادگایە یاسای نییە و دەستتێوەردانی گەورەی تێدایە، لە بواری تەكنیكیشدا ئێمە ئامادەیی تەواومان نیشان داوە، ئەوەتا گفتوگۆ و هەماهەنگیمان بووە و وردەكاری تەواوی هەموو داتا و زانیارییەكانی تایبەت بە داهات و خەرجی و فەرمانبەرانمان لە ڕێگەی دیوانی چاودێریی دارایی هەرێمەوە بە دیوانی چاودێریی دارایی بەغدا داوە. لەسەر شێوازی داڕشتنەوەی ڕەشنووسی یاسای بودجە و پشكی هەرێمی كوردستان لە بودجەدا كە ئایا لە 12.64% دەبێت، یان لە 14%ی وەزارەتی پلاندانانی عێراق دەبێت، كاتێكیش پشكی هەرێمی كوردستان لە بودجەی گشتی 2023 عێراقی فیدڕاڵیدا دیاری كرا، لەسەر ئەو بنەمایە دەست بە ئامادەكردنی ڕەشنووسی یاسای بودجەی 2023ی كوردستانیش دەكەین. ئێمە لە حكومەتی هەرێمی كوردستان گفتوگۆمان لەسەر نەخشەڕێگای حكومەتی هەرێمی كوردستان بۆ پەیوەندیی نێوان هەولێر و بەغدا كردووە و تەئكید لەسەر چارەسەركردنی كێشە هەڵپەسێردراوەكانی نێوان هەردوو لا كراوەتەوە لە چوارچێوەی دەستووردا .

ئەوەی زۆر بە لای ئێمەوە گرنگە جێبەجێكردنی ماددەی 140ی دەستووری و ڕاگرتنی پێشێلكاریی دەرهەق بە خەڵكی ڕەسەنی ئەو ناوچە كوردستانییانە و پاراستنی مافە دەستووری و شایستە داراییەكانی خەڵكی كوردستانە، بە خۆشحاڵییەوە ئەمجارە وەزیری دادی حكومەتی عێراق كەسێكی كوردە و چاوەڕوان دەكرێت لەم چوارچێوەیەدا هاوكاریی حكومەت بكات بۆ چارەسەری ئەم گرفتە.

* سەبارەت بە هێرشەكانی ئێران و توركیا و زیانگەیاندن بە هاووڵاتیانی سڤیل تا چەند قسە لەگەڵ دۆستەكانمان و هاوپەیمانان كراوە، بۆ دانانی سنوورێك لەسەر ئەم پێشێلكارییانە؟

- حكومەتی هەرێمی كوردستان بە توندی سەركۆنەی ئەو هێرشانە دەكات و داوای لە دۆست و هاوبەشانی لە حكومەتی فیدڕاڵی و نەتەوە یەكگرتووەكان و كۆمەڵگەی نێودەوڵەتی و بگرە خودی هەر دوو وڵاتی دراوسێ كردووە، ئەم هێرش و تۆپبباران و مووشەكباران و هێرشی فڕۆكە و درۆنانە ڕابگرن، ئەمانە پێشێلكاریی بەردەوامی سەروەریی عێراق و هەرێمی كوردستانن، داوا لە هەموو لایەك دەكەین لە ڕێگەی گفتوگۆوە كێشەكانیان چارەسەر بكەن و گرفت و كێشەی نێوخۆیان نەهێننە هەرێمی كوردستان. حكومەتی هەرێمی كوردستان ڕێز لە دراوسێتی و ئارامی و ئاسایشی دراوسێكانی دەگرێت و بە هیچ شێوەیەك ڕێگای نەداوە و نادات لە سنوورەكانییەوە هێرش بكرێتە سەر وڵاتانی دراوسێ. هێرشەكانی سەر هەرێمی كوردستان هیچ پاساوێكی بۆ نییە و پێشێلی سەروەرییە و پێویستە هەموو لایەك پەنا بۆ گفتوگۆ و دانوستاندان بەرن و هەوڵی ناردنە دەرەوەی كێشەكانی خۆیان بۆ دەرەوەی سنوورەكان نەدەن. ئێمە ڕێز لە سەروەری و ئارامی و ئاسایشی وڵاتانی دراوسێ دەگرین، پێویستە ئەوانیش ڕێز لە سەروەری و خاكی هەرێمی كوردستان بگرن، ئێمە ئامادەین بە گفتوگۆ و ئاشتییانە لەسەر هەر كێشەیەك بێت، لەگەڵ ئەو وڵاتانە گفتوگۆ بكەین، ئێمە بەرژەوەندیی هاوبەش و مافی دراوسێتیمان هەیە، ناكرێت دۆخەكە بەو شێوەیە ئاڵۆز بكرێت، چونكە ناسەقامگیری هەرێم، ناسەقامگیری بۆ ناوچەكە بەدوای خۆیدا دەهێنێت.