لە حەمە هاشمـەوە، ڕووتكاری

بەر لەوەی دوایین پیشانگای هونەرمەند حەمە هاشم ببینم، كە لە تشرینی یەكەمی 2022دا لە هۆڵی میدیا - هەولێر كرایەوە، هێندە لەو ڕەوتەی هونەرەوە نزیك نەبووم، بە گومانەوە لە هەر تابلۆیەكم دەڕوانی كە خاوەنەكەی بە ناوی ڕووتكارییەوە كێشا بێتی. بڕواشم وا بوو، هونەرمەندی نیگاركێش لە بێ بەهرەیی و دەست كورتیی خۆی لە هونەری نیگاردا، پەنا بۆ گەمەیەكی ڕەنگسازی دەبات، ئنجا وەك هونەرێكی باڵا، بە ناوی ڕووتكاری (ئەبستراكت)ـەوە، بە ئێمەی هەواداری هونەری دەفرۆشێتەوە. ئەم بۆچوونە پەیوەست بە كاری بەشێكی زۆر لە هونەرمەندان ڕێی تێ دەچێت. بۆ نا..؟ هونەرمەند هەیە لە هێڵكاری و ڕەنگسازیدا دەستەپاچە و ناتوانایە، ناتوانێ بە بەژنی هونەری نیگاردا هەڵزنێت، ڕووتكاری بۆ ئەو دەبێتە پەنا و پەسارێك، دەیكاتە بەهانە و پاساوێك، خەوشی بێ بەهرەیی خۆی و ناتواناییەكەی لە پەنای ئەودا دەشارێتەوە. باشە چ شتێك لە پیشانگایەكەی حەمە هاشم وای كرد من وەك هونەر دۆستێك بۆچوونم بگۆڕێت؟ هەر خۆم وڵام دەدەمەوە.

خەسڵەتێكی سەرەكیی نیگار ئەوەیە، لە یەكەم نیگادا، تۆ بڵێ هەر بە دەم یەك سەرنجەوە، هەستی بینەر ڕاو بكات، لە دنیای دەوروبەری داببڕێت و كەمەندكێشی نێو جیهانی ستاتیكای خۆی بكات. حەمە هاشم لە تابلۆیەكانی ئەو پیشانگایەیدا، ئەو مەرجەی بەجێ گەیاندووە. چاوێكی ئاشنای هونەر و دیدەیەكی مەشقەندەی ستاتیكا، بە جار و دوو جار، بگرە بە دەیان جاریش، لە تەماشا كردنی تابلۆیەكانی تێر نابێت. ڕەنگ و پێكهاتەی تابلۆیەكانی سەرنج ڕاكێش بوون. لە داڕشتندا فرەییەكی زۆری لە تەكنیك و مانۆری زیاتریشی لە گەڵاڵە كردندا كردووە. بابەت بە گشتی و وەك گوتاری پیشانگایەكە، كە بە دەوری كێشە خەمێكی مرۆڤانەدا دەخولایەوە، هێندەی دیكە بەرهەمەكانی ئەوی لە دەروونی بینەر نزیك دەكردەوە. ئەو لە بەكار هێنان و دانانی ڕەنگدا كارامەییەكی زۆری نواندووە، ئەزموونێكی چڕی خستووەتە ڕوو. تەكنیك و ستایلی كار كردن لە لای ئەو دەوڵەمەند و فرە جەمسەرە، وشە و دەقی بە شێوەیەكی داهێنەرانە و تایبەت لە تابلۆدا بەكار هێناوە. هەموو ئەمانە ڕەگەزی گرنگ و پاڵپشتن بۆ ستایلی ڕووتكارانەی كار كردنی ئەو وەك نیگاركێشێك.