ئەگەر بۆ سەرەتاكانی دروستبوونی ئەم هەرێمە و حكومەتی هەرێمی كوردستان بگەڕێینەوە، هەر لە سەرتاوە سیستمی فرەحزبی و بەشداریی سیاسی و دیموكراسییەت بناغەی دامەزراندنی بووە، مافی بەشداریی سیاسی و دەنگدان و هەڵبژاردن كراوەتە دروشم و بنەمای كاركردنی، بەڵام ئەگەر بۆ مێژووی ٣٠ ساڵی ڕابردووی كابینە یەك لە دوای یەكەكانی بگەڕێینەوە، دەبینین ئەم ئازادی و دیموكراسی و بەشدارییە بە هۆی شەڕی ناوخۆ و گرژییە سیاسی و ململانێكانی ناوخۆ، پلان و هێرش و هەڕەشە و دەستتێوەردان و ئەجێندای دەرەكییەوە زیانی پێ گەیشتووە، لە هەمان كاتیشدا بە هۆی میدیا و سۆشیاڵ میدیای نابەرپرسەوە بە هەمان شێوە، بۆیە كابینە دوای كابینە قەیران لە دوای قەیران و گرفت لە دوای گرفت دروست كراوە بۆ ئەم هەرێمە، تاوەكو ئەو سیما جوانەی دەیەوێت لە دیموكراسی و ئازادیدا پێشكەشی بكات، لەكەدار بكرێت، جگە لەوەی ئەم ململانێ و هەوڵە نادۆستییانە كارێكی كرد كە دامودەزگا تەشریعی و تەنفیزییەكانیش پەك بخات، لەولاشەوە متمانە لە نێوان حكومەت و دامودەزگاكان و خەڵكدا نەهێڵێت، بۆیە لە ماوەی ڕابردوودا چەندین هەوڵی ناوخۆیی و دەرەكی بۆ لەباربردنی ئەم ئەزموونە دراوە، بەڵام بەهێزیی سەركردایەتیی كورد و خۆڕاگریی حكومەت و كابینەكان توانیویەتی تا ڕاددەیەكی زۆر لە بەردەم ئەم شەپۆلانەدا خۆی بگرێت. ئەگەر زیاتر تایبەتی بكەین بە سەردەمی كابینەی نۆیەم دەتوانین بڵێین سەردەمی خەستبوونەوە و چڕبوونەوەی قەیرانەكان بووە لە بەردەمیدا، چ لەسەر ئاستی ناوخۆیی، چ لەسەر ئاستی دەرەكی، قەیرانی ناوخۆیی ناوچەیی جیهانی هەر هەمووی بە جۆرێك لە جۆرەكان دەیوست لەرزە بەم كابینەیە بكات، بەڵام لەگەڵ خۆراگڕی لە بەردەم قەیرانەكان و زاڵبوون بە سەر قەیرانەكاندا، توانرا سەقامگیرییەكی ئەمنی و ماددی و دەروونی بۆ هاووڵاتیان فەراهەم بكرێت. بەشێكی زۆری پلان و بەرنامەكان لە ماوەی سێ ساڵی ڕابردوودا جێبەجێ بكات. دەتوانین بڵێين لەسەر ئاستی دیپلۆماسییەت و بەشداری لە پرس و بابەتە جیهانییەكاندا ڕۆڵێكی بەرچاو و گەشەسەندووی هەبووە، توانیشی تا ڕاددەیەكی زۆر ڕووبەڕووی بەربەست و هەڕەشە دەرەكییەكان چ لەلایەن حكومەتی ناوەندی بەغدا و چ لەلایەن هێزە دەرەكییەكان ببێتەوە و، متمانەیەكی زۆری جیهانی و ناوچەیی بەدەست بهێنێت. ئەوەی ئێستا گرنگە، پاراستی ئەو دیموكراسییەت و متمانەیەشە لەسەر ئاستی ناوخۆ، دیموكراسییەت دەبێت بەردەوام پارێزگاری لێ بكرێت، بە تەنیا حكومەتیش ناتوانێت پارێزگاری لێ بكات، بەڵكو دیموكراسییەت بە هەر سی لایەنی (حكومەت، دامودەزگاكان، هاووڵاتی) پارێزگاری لێ دەكرێت. پێویستە ڕیفۆرمی سیستمی سیاسیی دەزگاكانمان بكەین، تا وا لە خەڵك بكات كە هەست بكات گوێی لێ دەگیرێت، پێویستە چیرۆكی ڕاستەقینە بڵێین دەربارەی خۆمان، ئەگەرنا چۆن دەتوانین پێكەوە بژین سەرباری جیاوازییەكانمان؟

جگە لەم بێمتمانەییەی خەڵك بە دامودەزگا حكوومییەكان، زەمینەی هاوبەشی لێكتێگەیشتنی هاوبەش لە نێوان لایەنەكانیشدا نەماوە و، دەبێت دروستی بكەیەنەوە، چونكە دابڕان دروست بووە و هیچ كام لە لایەنەكان ئەوانەی بەشدارن لە حكومەت و ئەوانەشی بەشدار نین، بەرامبەر ڕووادوەكان خۆیان بە بەرپرسیار نازانن جگە لە پارتی دیموكراتی كوردستان، هاوكێشە سیاسیەكانیش گۆڕاون و تێكچوون، بۆیە لەگەڵ ئەو هەنگاوە چاكسازی و بناغەییەی كە حكومەت ناویەتی و بە هەوڵی سەركردەكان و سەرۆكایەتییەكان، توانرا ئەم هەرێمە لەم ئاستەدا ڕابگیرێت و پلانیشی هەیە شەڕ بۆ ئایندەی خۆی بكات و بەشداریی هاوكێشە جیهانییەكان بكات، بەڵام بە بێ بەشداریكردنەوەی هاووڵاتی و لێكنزیكبوونەوە و دروستكردنی كۆمینیكەیشنێكی دروست لە نێوان حكومەت و خەڵك و لە نێوان لایەنە سیاسییەكان و دروستكردنی پشتێنەیەكی بەهێزی نیشتمانی، ناتوانین نە ئەم ئەزموونە بپارێزین، نە دیموكراسییەتی ئەم هەرێمەش گەشە پێ بدەین، بۆیە هەوڵەكانی ئایندەمان دەبێت لەسەر ئەو ئاستە ئاسۆییە بێت و خەڵك و حكومەت و خەڵك و دامودەزگاكان، خەڵك و لایەنە سیاسییەكان و لایەنە سیاسییەكان لێك نزیك بكەینەوە و ئاشتیان بكەینەوە و، متمانە لە نێوانیان بگەڕێنینەوە، بۆ ئەمەش دەبێت سەركردەكان كۆمینیكەیشنی زیاتر بكەن لەگەڵ خەڵك. بێگومان هەڵبژاردنێكی سەركەوتووانە ئامرازێك دەبێت لەو ئامرازە كاریگەرانەی كە ئەم متمانە و لێكنزیكبوونەوەیە تا ڕاددەیەك بەرهەم بهێنێت و دامودەزگاكان ئەكتیڤ بكاتەوە. دەبێت زەمینەیەكی هاوبەش بۆ كاركردن دروست بكەینەوە، ئەگەرنا دواخستن، یان ئەنجامنەدانی هەڵبژاردن ئەو بۆشاییە گەورە و ئەو بڵقە بەجێ دەهێڵن كە دواجار دەبێتە خۆرەی دەستكەوتەكانی دیكەی ئەم هەرێمە، خوانەخواستە بەرەو دابڕانی ئایدیا و بیرۆبۆچوون دەڕۆین و دەرگا دەكاتەوە بۆ جەنگێكی مەترسیداری ناوخۆیی، كە ئەویش (جەنگی كولتووریی ناوخۆییە) كە یەكتر ڕەتكردنەوە و نەمانی ئینتیمای نەتەوەیی و پێكەوەژیانی لێ دەكەوێتەوە، وەك ئەوەی ئێستا لە عێراق دەگوزەرێت، كە نەك یەكتر ڕەت دەكەنەوە، بەڵكو نوێژەكەرەكانیشیان ئامادە نین لە یەك مزگەوت نوێژ بكەن، چ جای ئەوەی لەگەڵ یەك حوكم بكەن و پێكەوە بژین، كە ڕەنگە وتاری ئایندەم لەسەر ئەوە بێت (ئایا كوردستان لە بەردەم جەنگی ناوخۆیی كولتووریدایە، یان نا ؟).