لە سەلاحەددین سەرۆك مەسعود بارزانی پێشوازی لە باڵوێزی نوێی ڕۆمانیا لە عێراق كرد و لەبارەی بارودۆخی سیاسیی عێراق و ئاستەنگه‌كانی بەردەم پێكهێنانی حكوومەتی تازەی عێراق ئاڵوگۆڕ كرا.

ئه‌مڕۆ دووشەممە 6/6/2022، له‌ سه‌ڵاحه‌دین سه‌رۆك مه‌سعود بارزانی، پێشوازی له‌ ڕادۆ دۆبرێ، باڵوێزی نوێی ڕۆمانیا لە عێراق كرد، لە دیدارەكەدا بیروڕا لەبارەی بارودۆخی سیاسیی عێراق و ئاستەنگ و كێشەكانی بەردەم پێكهێنانی حكوومەتی تازەی عێراق ئاڵوگۆڕ كرا، پەیوەست بە بارودۆخی عێراق سەرۆك بارزانی ئەوەی دووپاتكردەوە كە هاووڵاتیانی عێراق شایانی ئەوەن دەوڵەتێكی دامەزراوەیی و خەدەمات و سەقامگیرییان هەبێ و، لە دوای 2003 ئەو دەرفەتە هەبوو عێراق بكەوێتە سەر ڕێگەیەكی دروستەوە بەڵام بەداخەوە سوود لەو دەرفەتە وەرنەگیرا.

هەر لەو دیدارەدا پەیوەندییەكانی نێوان هەرێمی كوردستان و وڵاتی ڕۆمانیا تاوتوێ كرا باڵیۆزی ڕۆمانیا ئامادەیی وڵاتەکەی بۆ پەرەپێدانی پەیوەندییەکان و كاری هاوبەش و هەماهەنگیی لە گەڵ هەرێمی کوردستان لە بوارە جیاجیاكان دەربڕی.

لە بەشێكی تری ئەو دیدارەدا سەرۆك بارزانی پیرۆزبایی لە باڵیۆزی نوێی ڕۆمانیا كرد و هیوای سەركەوتنی بۆ خواست لە ئەرك و كاری تازەیدا.