لە دوای هەر ڕووداوێكی كۆمەڵایەتییەوە، هەندێك كەس كە وەك چالاكان و كەسایەتیی ئایینی و مەدەنیی جۆراوجۆر خۆیان دەناسێنن، دژ بە ڕێكخراوەكانی كۆمەڵگەی مەدەنی بە گشتی و ڕێكخراوەكانی ئافرەتان بەتایبەتی، دەست بە چالاكیی جۆراوجۆری وەك كەمپین و هاشتاگ و نووسینی وتار دەكەن‌، ئەمانە ئەگەرچی كێشە جەوهەرییەكەیان ڕوون نییە، بەڵام ئەگەر بۆیان بكرێت، نەك هەموو ڕێكخراوەكانی تایبەت بە پرسی ئافرەتان دادەخەن، بەڵكو ڕێگری لە هەموو هەنگاو و پرۆژەیەك دەكەن، كە هەوڵی كرانەوەی زیاتر و ئازادیی زیاتری ئافرەتان دەدەن و پارێزگاری لە شكۆی ئافرەتان دەكەن.

لە كوردستان زیاتر لە (5500) ڕێكخراوی كۆمەڵگەی مەدەنی هەن، كە لەو ژمارەیەیش (100) ڕێكخراویان كار بۆ پرسی ئافرەت دەكەن و پشتوانی ئەو پرسەن، ئەوانەی كە دەیانەوێت دژ بە هەنگاوەكانی ئافرەتان بوەستنەوە، سەرەتا لەو ڕێكخراوانەوە دەست پێ دەكەن، كەموكووڕیی چەند ڕێكخراوێكیان زەق دەكەنەوە و لەوێوە هەوڵی بێبەهاكردن و سووكایەتیكردن بە ئافرەت و پرسەكەی دەدەن.

ئەگەر لەو ژمارە زۆرە، بەشێكیان ئامانجیان ئەوە بێت كە لە پەنای پرسی ئافرەتانەوە، هەوڵی بەدیهێنانی ئامانجە داراییەكان بدەن، ناكرێت ئەوانە وەك نموونەیەكی زەق بهێنرێنەوە و بەو هۆیەوە تۆمەت بدرێتە پاڵ هەموویان، چونكە لە ئەجێندای هیچ ڕێكخراوێكدا نییە، كار بۆ تێكدانی شیرازەی خێزان و داوای بێڕێزیكردن بە تاك و خێزان و هەڵوەشاندنەوەی خێزانەكان بكات، بە پێچەوانەوە ئەجێندا و ئامانجی ڕێكخراوەكان، برەودانە بە هۆشیاركردنەوەی ئافرەتان لە ڕووی یاسایی و كۆمەڵایەتی و بەختەوەریی خێزانی و پەرەپێدانی خۆشەویستیی نێوان تاكەكانی كۆمەڵگە‌، زۆربەشیان لەو ڕووەوە ڕۆڵی باشیان هەبووە.

 نابێت ئافرەتی كورد گرنگیی ئەو ڕێكخراوانە لەبیر بكات، كە توانییان پێگە و كەسایەتیی ژنی كورد بەهێز بكەن، تا لە هەموو بوارەكاندا بتوانن ئەركی خۆیان بەجێ بگەیەنن، بە تایبەت لە كاری ئیداری و سیاسی و ڕێكخراوەیی و میدیایی، ئەوە ڕۆڵ و كاریگەریی ڕێكخراوەكان بوو، كە بوو بە هۆی هەمواركردنەوەی چەندین یاسا و دەركردنی یاسای باش لە خزمەت ئافرەتان و پرسەكەیاندا، ئەوە ڕێكخراوەكان بوون، چ بە كاری ڕێكخراوەیی و چ لەسەر شەقامیش، كاریان بۆ پرسی ئافرەتان دەكرد و چەندین گۆڕانكاریی كۆمەڵایەتییان هێنا ئارا، هەوڵیان دا كە پێگەی ئافرەت بە پارێزراوی بچەسپێنن، تا بە كەم سەیر نەكرێن و خۆیشیان بە كەمیش ڕازی نەبن، هەروەها ئافرەتیان هۆشیار كردەوە لەوەی كە پێداگری لەسەر وەرگرتنی مافی خۆی و خێزانەكەی و كۆمەڵگەكەی بكات.

ئەوەندەی ئاگادار بم، زۆربەی ڕێكخراوەكانی ئافرەتان، جگە لە ئەجێندا و كاری قازانج نەویستی خۆیان، پردێكیش بوون بۆ گواستنەوەی داوا و ویستەكانی ئافرەت و دەنگێك بوون بۆ ئەو ئافرەتانەی كە ماف و ئازادییان پێشێل كراون‌. ئافرەتی كورد لە ڕێگەی هەر مینبەرێكەوە داوای ئازادی كردبێت، زانیویەتی چی دەوێت، شەڕی لەسەر مافی خۆی كردووە، تا تێگەیشتنە هەڵەكانی كۆمەڵگە لە بەرانبەر ئەو بگۆڕێت، بە تێگەیشتنێكی درووست و وەك مرۆڤێكی تەواو مافی هەبێت، هەروەها لە ئیشوكار و هەلی بەرەوپێشچووندا، كار بە بنەمای یەكسانیی جێندەری بكرێت، ڕێكخراوەكانی ئافرەتانیش بۆ هەمان مەبەست تێكۆشاون، بۆیە ڕۆژ بە ڕۆژ لە بەرەوپێشبردنی ڕەوشی مافی ئافرەتان و پرسەكەیاندا، ڕۆڵ و كاریگەرییان زیاتر دەردەكەون، ڕۆژ بە ڕۆژیش ئەوانەی كە دژیان دەوەستنەوە، ماندوو و تەنگەنەفەستر دەبن.

كاری ڕێكخراوەیی كارێكی بەرز و پیرۆز و ئامانجدارە، ڕێكخراوەكانی ئافرەتانیش كار بۆ بەرزڕاگرتنی بەهای مرۆڤ بە گشتی و ئافرەت بە تایبەتی دەكەن، بۆیە پێدانی هەر وەسفێكی دی بە ویست و داواكارییەكانی ئافرەتان و ڕێكخراوەكانی تایبەت بە پرسی ئافرەتان، بەدەر لە جەوهەری ویست و داواكارییەكانی ئافرەتان و ئەجێندای تایبەتی ڕێكخراوەكان، هەوڵدانە بۆ بەلاڕێدابردنی ڕاستییەكان و پاشقولگرتنە لە ئافرەت و هێز و تواناكەی و لێدانە لەو ئامانجە درووستانەی، كە ڕێكخراوەكانی ئافرەتانی لە پێناو دامەزراون، بۆیە دەزانین ئەوانەی كە بەو كارانە هەڵدەستن، خەمی چییانە و كوێیان دێشێ!

 

 

 

حەیات مەجید