سەرۆک بارزانی پێشوازی لە باڵیۆزی ئیتاڵیا لە عێراق دەکات
ڕۆژی یەکشەممە ٢٨ـی تشرینی دووەمی ٢٠٢١ لە سەلاحەددین، سەرۆک مەسعود بارزانی پێشوازی لە برۆنۆ ئەنتۆنیۆ پاسکوینۆ باڵیۆزی ئیتالیا لە عێراق کرد.
لە دیدارەکەدا کە باڵیۆزی ئیتالیا بە مەبەستی ماڵئاوایی و کۆتایھێنانی ئەرک و کاری لە عێراق سەردانی سەرۆک مەسعود بارزانی کردبوو، پێزانینی بۆ خۆڕاگری وقوربانیدانی گەلی کوردستان لە شەری تیرۆر ھەبوو ، ئەوەشی دووپات کردەوە کە وڵاتەکەی بەردەوام دەبێ لە پاڵپشتیکردنی ھێزی پێشمەرگەی کوردستان.
باڵیۆزی ئیتالیا گەلی کوردستانی وەک دۆستی نزیکی گەلی ئیتالیا وەسف کرد و جەختیشی لە کاریگەری ھەرێمی کوردستان لە سەقامگیری عێراق و ناوچەکە کردەوە .
ھەر لەو کۆبوونەوەیەدا سەرۆک بارزانی سوپاسی گەل و حکومەتی ئیتالیای کرد کە پاڵپشتی گەلی کوردستان و پێشمەرگە بوونە و پێشوازیشی لە پەرەپێدان و دۆستایەتی و پەیوەندیەکانی ھەردوولا کرد.
بارودۆخی سیاسی عێراق و ھەڵبژاردنی ئەنجومەنی نوێنەرانی عێراق و دەرئەنجامەکانی، تەوەری تری ئەو کۆبوونەوەیە بوون. پەیوەست بە هەڕەشەی تیرۆر و هزری توندرۆیی هەردوولا لەسەر ئەوە هاوڕا بوون کە تیرۆر هێشتا هەڕەشەیەکی هاوبەشە لەسەر هەموو جیهان و ئەو هۆکارانەی بوونەتە هۆی سەرهەڵدانی تیرۆر هێشتا هەر ماون و چارەسەر نەکراون.
جێگەی ئاماژە پێکردنە مێشێلێ کامێرۆتا کونسوڵی نوێی ئیتالیا لە ھەولێر ئامادەی کۆبوونەوەکە بوو ، سەرۆک بارزانی ھیوای سەرکەوتنی بۆ خواست لە ئەرک و کارەکانیدا.
